Yocwa 10

Jo Icrael oloyo jo Amor

1Adoni-jedek rwot me Jerucalem owinyo kit ma Yocwa otyeko mako kwede Ai, ki kit ma ojwero woko liweng kun otiyo ikom Ai ki rwote kit ma otiyo kwede ikom Jeriko ki rwote. En owinyo bene kit ma jo Gibeon guyubu kwede lok me bedo ki kuc ki jo Icrael, ci dong gitye bene ikin gi. 2Ci lworo omake matek tutwal, pien onongo Gibeon taun madit marom aroma ki taun ma dongo mukene, dok onongo dit makato Ai, ki jo ma gibedo iye gubedo twoni matego. 3Ma omiyo Adoni-jedek rwot me Jerucalem ocwalo kwena bot Kokam rwot me Kebron, Piram rwot me Jarmut, Japia rwot me Lakic ki Debir rwot me Eglon kun waco botgi ni, 4“Wubin bota, wukonya, wubin walwenyu ikom jo Gibeon, pien dong guyubu lok me bedo ki kuc ikin gi ki Yocwa: ki jo Icrael.” 5Ci luker pa jo Amor abici gucoko monygi, gucito kacel ki lulwenygi ducu, gutongo gony cok ki Gibeon, gucako lweny ikome.

6Ci jo Gibeon gucwalo kwena bot Yocwa wa i gony ma i Gilgal kun giwaco ni, “Pe i wekwa woko ata, wan lutici; bin botwa oyotoyot wek i larwa. Konywa pien luker ducu pa jo Amor ma gibedo i lobo godigodi ni gucoke ka monyowa.” 7Ma omiyo Yocwa oa ki i Gilgal ocito kunu kacel ki lumony ducu ki twoni oteka lweny ducu. 8Ci Rwot owaco bot Yocwa ni, “Pe ilwor, pien atyeko miyogi i cingi. Pe tye dano mo ma bicung inyimi.” 9Ci Yocwa orune obino ikomgi oyotoyot, kun oa ki i Gilgal owoto dyewor benebene. 10Ci Rwot oonyo atiba lworo ikom jo meno inyim jo Icrael, omiyo gunekogi ki cogi nek madito tutwal i Gibeon; ci guryemo korgi i yoo ma dok tung malo ma kemo Bet-koron, kun kinekogi nio kwede wa i Ajeka ki i Makeda. 11Ikare ma giringo inyim jo Icrael ma gilor kwede i lung me Bet-koron, Rwot Lubanga ocoro lwak pee madito ikomgi ma oa ki i polo nio kwede wa i Ajeka, ci merok oto mapol. Pee meno oneko lwak merok mapol makato ma jo Icrael onekogi ki pala lucwan.

12Inino ma Rwot omiyo iye jo Amor i cing jo Icrael, Yocwa oloko bot Rwot inyim jo Icrael kun waco ni,

“In ceng, cung mot iwi Gibeon,

ki in dwe, cung i nota me Aijalon.” 131

Ci ceng ocung mot atir, ki dwe bene obedo mot, nio ka jo Icrael guculu kwor ikom lumerokgi. Lok man kicoyo i buk pa Jacar. Ceng ocung mot i dye polo, pe orune me poto woko oyot macok romo nino acel kulu. 14Nino mo yam peya obedo kit man nia wa ikare macon nio kwede wa ikare man, ma Rwot owinyo iye dog dano; pien onongo Rwot aye obedo kalweny pi Icrael.

15Lacen Yocwa ki jo Icrael ducu gudok cen i gony me Gilgal.

16Luker meno abic guringo, gukane woko i boro ma inget Makeda. 17Ci kitito bot Yocwa ni, “Luker abici ki nongogi gukane i boro ma inget Makeda.” 18Ci Yocwa owaco ni, “Wulor dog boro woko ki kidi ma dongo, ci wuket dano gubed cok ka kurugi. 19Ento wun pe wubed kunu abeda, wucit wuryem kor lumerokwu, wulweny ikom jo ma odong cen i ngegi, pe dok wuwek gudony i taun gi madito; pien Rwot Lubanga dong otyeko miyogi i cingwu.” 20Ka Yocwa ki jo Icrael gutyeko neko lukworgi madwong tutwal, nio ka guyweyogi woko ducu, ci jo ma gubwote nongo dong gudonyo woko i taun gi madit ma kicelo ki cel gogo, 21ci lwak ducu gudok cen bot Yocwa ma onongo en tye i gony i Makeda. Nicake ikare meno, ngat mo pe dong oete kaloko lok mo me lweny ikom jo Icrael.

22Yocwa dok owaco ni, “Dong wuyab dog boro woko, ci wukwany luker abici ki i boro, wukelgi bota kany.” 23Ci gutimo kitmeno; gukwanyo luker abici ki i boro gukelogi bote, rwot me Jerucalem, rwot me Kebron, rwot me Jarmut, rwot me Lakic ki rwot me Eglon. 24Ka dong kikwanyo luker ruu woko, ki kelogi bot Yocwa, ci Yocwa olwongo jo Icrael ducu, ci owaco bot ludito mony mayam gucito kwede ni, “Wubin cok, wuket tyenwu i ngut luker abici.” Gubino cok, ci guketo tyen gi i ngutgi. 25Yocwa dok owaco botgi ni, “Pe wulwor, pe cwinywu opoti; wubed oteka ma cwinywu nwang, pien Rwot bitimo lumerokwu ducu ma wubilwenyo kwedgi kitmeno.” 26Ka dong Yocwa ocobogi onekogi woko, ka ongabo komgi malo iwi yadi abic, gulyere iwi yadi nio wa otyeno. 27Ento ikare ma ceng dong mito poto, Yocwa ociko, ni kikwanygi woko ki iwi yadi, ci kibologi i boro ma nene gukane iye ni, kiloro dog boro woko ki godi madito ma pud gitye kunu nio wa onyo.

28Yocwa omako Makeda inino meno, oneko jo Makeda ki rwotgi ki pala lucwan, ojwerogi woko liweng, pe oweko iye dano mo ma obwot; otimo rwot me Makeda kit mayam otimo kwede rwot me Jerikoni.

29Yocwa oa woko ki i Makeda, okato ocito i Libna kacel ki jo Icrael ducu ci gulwenyo ikome. 30Rwot dok omiyo taun madit meno kacel ki rwote i cing jo Icrael. Ci guneko jo Libna ducu ki pala lucwan, ikom dano ducu matye iye pe guweko acel mo ma obwot; gutimo rwot ma kunu bene kit ma nene gutimo kwede rwot me Jeriko.

31Yocwa oa woko ki i Libna, okato ocito wa i Lakic kacel ki jo Icrael ducu, ci obutu orumu woko liking ka olwenyo ikome. 32Rwot omiyo Lakic i cing jo Icrael ci Yocwa omako woko inino me aryone, oneko jo Lakic woko ki pala lucwan, dano matye iye ducu, kit ma nene otimo ikom Libnani.

33Koram rwot me Gejar obino kakonyo jo Lakic, ci Yocwa olwenyo ikome, oneke kacel ki jone ducu, pe oweko dano mo obwot.

34Yocwa dok oa woko ki i Lakic okato ocito i Eglon kacel ki jo Icrael ducu; obutu orumu woko liking ci olwenyo ikome. 35Gumako woko inino meno, guneko jo Eglon ki pala lucwan, gujwero dano ducu ma gitye iye woko liweng, kit ma nene gutimo ikom Lakic.

36Yocwa dok oa woko ki i Eglon, ocito wa i Kebron kacel ki jo Icrael, olwenyo ikome, 37ci omako woko oneko jo Kebron woko ki pala lucwan kacel ki rwote ki jo ducu matye i taun gi madito ducu ma. Guneko dano ducu matye iye, pe guweko mo acel obwot. Yocwa ojwero woko liweng kacel ki dano ma gitye iye ducu, kit ma nene otimo ikom Eglon.

38Yocwa ki jo Icrael ducu guloke gudwogo cen ikom Debir, gulwenyo ikome, 39gumako woko kacel ki rwote ki taun ducu ma ingete, ci gunekogi woko ki pala lucwan. Yocwa ojwero dano ducu ma gitye iye woko liweng, pe oweko iye dano acel mo ma obwot. En bene otimo Debir ki rwote kit ma nene otimo ikom Kebron ki ikom Libna ki rwote.

40Yocwa oloyo lobonu ducu kitmeno, lobo godigodi ki Negeb ki apyel got ki lung ki lukergi ducu, pe oweko gin mo makwo obwot. Ojwero gin makwo woko ducu liweng kit mayam Rwot Lubanga pa Icrael ocikoni. 41Yocwa oloyogi cake ki i Kadec-barnea nio kwede wa i Gaja, kacel ki lobo Gocen ducu nio wa i Gibeon. 42Omako luker ruu ducu ki lobogi ducu lawangacel, pien Rwot Lubanga pa Icrael aye onongo obedo kalweny pi Icrael. 43Lacen inge man, Yocwa odok cen kacel ki jo Icrael i gony ma i Gilgal.