Yocwa 11

Yocwa oloyo Jabin ki jo ma oribe kwede

1Ka Jabin rwot me Kajor owinyo pi loc pa jo Icrael, ci ocwalo kwena bot Jobab rwot me Madon, ki bot rwot me Cimron ki rwot me Akicap, 2ki bot luker ma gitye tung kumalo i lobo ma obedo godigodi, ki i Araba inget nam me Kinerot matye tung kupiny, ki i lobo ma i apyel, ki i Napot-dor ma tung kupotoceng. 3Ka dok bene ocwalo kwena bot jo Kanaan ma tung kunyango ki tung kupotoceng, ki bot jo Amor, jo Kit, jo Perej, jo Jebuc ma i lobo ma obedo godigodi, ki jo Kiv ma ite got Kermon i lobo Mijpa. 4Luker magi ducu gubino ki buca monygi ducu, mony madwong ma welgi rom ki kweyo me dog nam, ki lwak aguragura ki gadigadi lweny mapol. 5Gutoro monygi ducu kacel, ci gubino gugony kacel inget pii me Merom pi lweny ikom jo Icrael.

6Ci Rwot owaco bot Yocwa ni, “Pe lworo omaki ikomgi, pien diki cawa onyo nongo dong amiyogi i cing jo Icrael, nongo dong kinekogi woko ducu. Wubitongo odon aguraguragi ducu, wuwango gadigadi lwenygi woko ki mac.” 7Yocwa ocito opoto ikomgi atura ki lwak monye ducu ki inget pii me Merom, olwenyo kwedgi. 8Ci Rwot omiyogi i cing jo Icrael, gulwenyo ikomgi matek, guryemo korgi nio kwede wa i Cidon Madite ki i Micrepot-maim, tung kupotoceng ki wa i nota me Mijpe tung kunyango kun kinekogi weng ma ngat acel mo pe ma obwot. 9Yocwa otimogi kit ma nene Rwot ocike kwede. Otongo odon aguraguragi ducu, owango gadigadi lwenygi woko awanga.

10Ikare meno rwot me Kajor onongo loyo luker mukene ca ducu, ci Yocwa oloke odok cen kamako Kajor, ci oneko rwote ki pala lucwan. 11Jo Icrael guneko jo ma onongo gitye iye ducu ki pala lucwan, gujwerogi woko liweng, pe guweko gin mo makwo obwot; ci guwango Kajor woko. 12Kitmeno Yocwa omako luker meno ducu, ki taun gi, onekogi woko ki pala lucwan, omedo ki jwerogi woko liweng macalo gin ma kidyero bot Rwot, kit ma Moses latic pa Rwot onongo ocike kwedeni. 13Ento jo Icrael pe guwango taun ma kigero iwi lobo ma kitoro malo macalo got, kono Kajor keken aye Yocwa owango woko. 14Jo Icrael guyako taun madito meno ducu, gutero lim makwo ki jami ma guyako obedo meggi; ento guneko dano woko ducu ki pala lucwan nio ka gutyekogi woko ducu, pe guweko gin mo makwo obwot. 15Kit macalo Rwot yam ociko ki latice Moses, ci Moses bene ociko ki Yocwa kitmeno, ci Yocwa oketgi ducu i tic; otiyo gin ducu mayam Rwot ociko ki Moses, pe oweko cik mo odong ma pe ocobo kakare.

16Yocwa omako lobo meno ducu, lobo godigodi, ki Negeb ducu, lobo Gocen, nota ki apyel got. En bene omako Araba ki lobo godigodi kacel ki nota me Jordan ki lobo apyelgu ma ingete. 17Ocake ki ikom got Kalak kama lobo otinge odok kwede tung Ceir, nio wa i Baal-gad ma i nota Lebanon ma ite got Kermon. En omako lukergi ducu, ci onekogi woko. 18Yocwa onongo obedo kalweny ki luker meno pi kare malac. 19Pe tye taun madit mo ma oyubu lok me kuc ki jo Icrael, kono nyo jo Kiv ma gibedo i Gibeon keken. Taun madito ducu jo Icrael omakogi ki lweny, 201pien Rwot aye obedo kamiyo cwinygi obedo tek wek gubin kalweny ikom jo Icrael ka wek kijwergi woko liweng ma pe kica mako dano mo ikomgi, ento kinekgi woko, ma pe mo odong, kit mayam Rwot ociko ki Moses.

21Ikare man bene Yocwa ocito kajwero jo Anak woko ki i lobo ma obedo godigodi; ojwerogi ki i Kebron, Debir ki Anab, i lobo godigodi me Juda ki me Icrael; en ojwerogi woko liweng kacel ki taun gi madito ducu. 22Pe guweko jo Anak mo obwot, ki i lobo pa jo Icrael; kono nyo ma i Gaja keken ki i Gat ki i Acidod, kunu aye jo Anak mogo gudong iye. 23Yocwa omako lobo ducu kitmeno, kit macalo yam Rwot oloko bot Moses; lacen omiyo bot jo Icrael me bedo lobogi i kakagi, malubu kit ma kwir omakogi kwede, ci lobo dong ocako ywe, ci lweny dong obedo peke.