Nwoyo Cik 31:6

Yocwa oleyo katyen Moses

(Wel 27:12-23)

1Moses dok omede ki waco lok magi bot jo Icrael ducu. 21Owaco botgi ni, “An mwaka me dita dong romo miya ki pyere aryo tin, ci pe dong aromo wot ki dwogo kit ma iya mito. Rwot otyeko waco bota ni pe abikato loka Jordan. 3Rwot Lubangawu kikome aye dong bitelo nyimwu wa loka ca. En bityeko rok magi woko ducu ki inyimwu, ci wubicamo lobogi; ki Yocwa aye dong bikato loka ca katelo wiwu kit ma dong Rwot owaconi. 42Rwot bitimogi kit mayam otimo ikom Cikon ki Og ma luker pa jo Amor ki ikom lobogi ikare ma otyekogi kwede wokoni. 5Rwot bimiyo gipoto i cingwu, wun wubitimogi ma lubu cik ducu ma atyeko cikowu kwedeni. 6Wubed oteka ma cwinywu nwang; pe wulwor, pe atiba opot ikomwu pirgi, pien Rwot Lubangawu aye biwot kwedwu, pe bibwotowu ata, pe biwekowu wudong kenwu.”

7Lacen Moses olwongo Yocwa ci owaco bote ki inyim jo Icrael ducu ni, “Bed oteka ma cwinyi nwang, pien ibicito ki lwak man wa i lobo mayam Rwot okwongo pire bot kwarigi ni ebimiyogi, dok in aye ibimiyo gicamo doko meggi. 83Rwot aye bitelo nyimi, en bibedo kwedi, pe bibwoti ata, pe biweki keni. Pe ilwor, cwinyi pe opoti.”

Cik myero kikwan inge mwaka abiroabiro

9Moses ocoyo cik man ducu ci omiyo bot ajwaki ma gin likwayo pa Levi, mayam gitingo Canduk me Gicike pa Rwot, ki bot ludongo ducu pa jo Icrael. 104 En ocikogi ni, “Inge mwaka abiroabiro ducu, ikare ma kiciko pireni obed mwaka me weko banya, wubikwano iye cik man inino me Karama me Bolo. 11Wubilwongo jo Icrael ducu me bino inyim Rwot Lubangagi i kabedo ma en biyerone, ci wubikwano iye cik man inyim jo Icrael ducu wek guwiny. 12Wugur lwak kacel, co wa ki mon ki lutino, ki lubedo ma gibedo i taunwu, wek guwiny ci gupwony lworo Rwot Lubangawu, wek gugwoke kun gilubu lok ducu me cik man. 13Kitmeno, lutinogi ma peya gungeyo loke gibiwinyo ci gibipwonyo lworo Rwot Lubangawu ikare ducu ma wubedo i lobo ma wucito iye loka Jordan kacamo.”

Cik pa Rwot me agiki bot Moses

14Dok Rwot owaco ki Moses ni, “Nen, nino ma ibito iye dong onyiko cok. Lwong Yocwa ci wucung kwede i Kema me Rwate wek acike.” Ci Moses ki Yocwa gucito gucung i Kema me Rwate, 15ci Rwot onen i Kema ki wir me pol; ci wir me pol ocung okemo dogola me Kema.

16Ci Rwot owaco bot Moses ni, “Nen, in dong icok to woko, ci lwak man gibitware gibicito ka woro lubanga mogo ma welo kun gidoko jo ma pe gigene i lobo ma gicito kabedo iye. Gibibwota woko dok gibituru gicikena ma atyeko ketone ikinwa wan kwedgi. 17Dok kiniga bimaka ikomgi ikare meno, ci abitenyogi woko dok abikwero konyogi woko, miyo kibityekogi woko liweng. Gin maracu ki lwak ayela mapol bipoto ikomgi, mamiyo ikare meno gibiwaco ni, ‘Gin ma omiyo can man opoto ikomwa, pien Lubangawa dong pe tye ikinwa.’ 18Abikwero konyogi woko ikare meno adada pi lwak balgi ducu ma gubedo katimo, pien gudok woko cen bot lwak lubanga mukene. 19Kombedi dong i coo wer man. Pwony ki jo Icrael wek obed caden ma mera ikomgi. 20Pien ka akelogi i lobo ma miu maceko cam mapol mayam akwongo pire ni abimiyo bot kwarigi, ka gucamo ci guyeng gucwe kwede, ci gibidok cen bot lubanga mogo mukene. Gibiworogi ma kun gicaya woko, dok gituru gicikena. 21Dok ka gin maracu mapol ki lwak ayela mapol opoto ikomgi, ci wer man bicung inyimgi me bedo caden botgi, pien likwayogi pud gibiwero, wigi pe biwil iye. Pien angeyo tam ma gutyeko yubune ma onongo peya aterogi i lobo mayam akwongo pire ni abimiyogi.” 22Moses ocoyo wer meno inino meno kikome, ci opwonyo ki jo Icrael. 235

Ka Rwot ociko Yocwa wod pa Nun kun waco bote ni, “Bed oteka ma cwinyi nwang, pien in aye ibitero likwayo pa Icrael i lobo mayam akwongo pire ni abimiyo botgi, ci an abibedo kwedi.”

24Ka yam Moses otyeko coyo lok me Cik man ducu i buk nio ka otum woko ducu, 25ci ociko Lulevi ma gitingo Canduk me Gicike pa Rwot, 26ni, “Wugam buk man me cik, wuket inget Canduk me Gicike pa Rwot Lubangawu, wek obed kunu me bedo caden ikomwu. 27Pien angeyo kit jemowu ki kit ma ngutwu nwang kwede ducu. Nen, gin gubedo kajemo ikom Rwot ma an pud atye kwedwu ma akwo, ci jemowu bibedo dwong marom mene ka dong ato woko? 28Wumii ludongo ma i kakawu ducu ki ludito ticwu gugure kacel ka dong guwiny lok magi, kun alwongo polo ki lobo wek obed caden ikomgi. 29Pien angeyo adada ni, ka dong ato, ci wubitimo tim aranyi; wun wubiloke dok wubibare woko ki i yo ma acikowu kwede. Gin marac bipoto ikomwu ikare me anyim, pien wubitimo gin manen marac iwang Rwot kun wumiyo kiniga make pi gin ma wutiyo.”

Wer pa Moses

30Ci Moses okwano lok ma i wer man nio ka otyeko ducu, kun lwak jo Icrael ducu ma gugure kacel gubedo kawinyone.