Nwoyo Cik 30

Jo Icrael bidok cen bot Rwot

1Moses owaco bot jo Icrael ni, “Dong atyeko keto inyimwu gum ma a ki i woro dog Rwot ki acena ma jemo ikom Rwot kelo. Ento ka wubiyero jemo ikom Rwot, ka gin magi ducu dong bipoto ikomwu, ci wubipo pire ki ikin rok ducu kama Rwot Lubangawu bikeyowu iyeni. 2Kace wudwogo cen bot Rwot Lubangawu, wun ki likwayowu, ci wucako woro doge ilok ducu ma acikowu kwede tin ki cwinywu ducu ki tipuwu ducu, 3ci Rwot Lubangawu bidwoko gum mewu botwu; en dok bicokowu woko ki ikin rok ducu kama yam okeyowu iyeni. 4Kadi wa jowu ma obayogi kamabor wa i agiki te polo, Rwot Lubangawu bicokogi woko ki kunu; ci biomowu woko ki kunu. 5Rwot Lubangawu bikelowu i lobo mayam kwariwu gucamoni wek wun bene wucam obed mewu. Lubanga bimiyo wubedo ki lwak lonyo mabeco, kun wunya mapol makato kwariwu. 6Rwot Lubangawu bimiyo wubedo jo ma cwinygi ber dok winyo lok, wun ki likwayowu bene, wek wumar Rwot Lubangawu ki cwinywu ducu ki tipuwu ducu wek wubed makwo. 7Rwot Lubangawu biketo acena magi ducu ikom lumonewu ki ikom lumerokwu ma guunuwu, 8ci wun dok wubiworo dog Rwot kun wugwoko cike ducu ma acikowu kwede tin. 9Rwot Lubangawu bimiyo wubedo ki jami mabeco madwong mada ma wubinongo pi ticwu; wubibedo ki lutino mapol, limwu makwo binya mapol bene, potiwu biceko cam mabup, pien cwiny Rwot dok bibedo yom pi miyowu lonyo ki jami mabeco, kit mayam cwinye obedo yom ikom kwariwuni. 10Kace wubiworo dog Rwot Lubangawu, ma wugwoko cike ki gin ma ociko ducu ma kicoyo i buk man me cik, kace wudwogo cen bot Rwot Lubangawu ki cwinywu ducu ki tipuwu ducu, ci Lubanga bimiyowu gum man.

11Pien cik ma acikowu kwede tin pe tek tutwal ma cobone loyowu, dok niang iye pe tek tutwal. 121Pe tye wa i polo, ma kono omiyo wuwac ni, ‘Anga ma bicito ka omone wa ki malo i polo kuca, wek okel botwa ka wek wawiny loke ci walubi?’ 13Dok pe tye wa loka nam, ma kono omiyo wuwac ni, ‘Anga ma bicito pirwa wa loka nam kuca, wek okel botwa ka wek wawiny loke ci walubi?’ 14Ento loke tye cok kwedwu; wumako dong i cwinywu, ci wubedo ka tucune ki dogwu, miyo wutwero lubune.

15Wunen maber ni, tin atyeko keto inyimwu kwo ki lonyo, to ki keckom. 16Kace wuworo cik pa Rwot Lubangawu ma ocikowu kwede tin, wek wumar Rwot Lubangawu, kun wulubu yone dok wugwoko cike ki gin ma en ociko nyo ongolo ducu, ci wubikwo dok wubinya mapol, dok Rwot Lubangawu bimiyowu gum i lobo ma wubidonyo iye kacamoneni. 17Ento kace cwinywu odok cen karyebe inyim lubanga mukene ki tiyo botgi ma wukwero winyo dog Rwot, 18ci nen, tin aloko atir botwu ni wubito wutum woko; pe wubirii pi kare malac i lobo ma wubicito iye loka Jordan kacamoneni. 19Alwongo polo ki lobo me bedo lucaden ikomwu tin, dong atyeko keto inyimwu kwo ki to, gum ki acena; ma omiyo wuyer kwo wek wun ki likwayowu wubed makwo. 202 Wumar Rwot Lubangawu, wuwor doge ci wumok ikome matek; en aye kelo kwo botwu, ci miyo wurii pi kare malac, wek wubed i lobo mayam Rwot okwongo pire bot kwariwu Abraim, Icaka ki Yakobo ni ebimiyogi.”