Nwoyo Cik 29

Gicike pa Rwot ki jo Icrael i lobo Moab

1Man aye lok me gicike mayam Rwot ociko ki Moses ma oketo ikin gi ki jo Icrael i lobo Moab, ma omedo ikom gicike mayam oketo ikin gi iwi got Koreb.

2Moses olwongo jo Icrael ducu ci owaco botgi ni, “Dong wutyeko neno gin ducu mayam Rwot otiyo i lobo Ejipt ki wangwu, gin ma en otimo ikom Parao ki ikom lutice ki i lobone ducu. 3Wun yam wuneno ki wangwu gemo mayam Rwot ocwalo ki lanyut ki tango madito ma en otiyo. 4Ento nio wa onyo Rwot peya omiyowu cwiny me niang gin ma wangwu oneno nyo ma itwu owinyo. 5Rwot dong omiyo atelo wiwu i dye tim mwaka pyere angwen ma bongowu pe otii ki ikomwu, dok war tyenwu bene pe gutii woko ki i tyenwu. 6Ikare meno amiyowu gin acama mapat ki mugati ma onongo yam wungeyo con, dok pe wumato kongo bwino nyo kongo makece mayam wungeyo con; wek wunge ni en aye Rwot Lubangawu. 71Ka dong wuo i kabedoni, ci Cikon rwot me Kecbon ki Og rwot me Bacan gubino karomo kwedwa i lweny, ento waloyogi woko, 82ci wamayo lobogi woko wamiyo odoko ginaleya pa jo pa Reuben, ki pa jo pa Gad, ki pa nucu kaka pa Manace. 9Pimeno omyero wugwoke kalubu lok ducu me gicike man, wek wulim gum ikom gin ducu ma wutiyo.

10Tin wun ducu wucung inyim Rwot Lubangawu, ludito wi kakawu, ludongowu, ludito ticwu ki co ducu pa jo Icrael, 11mon mewu kacel ki lutinowu ki lubedo ma gibedo i gonywu ma gin aye lubar yenwu ki lutwom piiwu. 12Wucung kany wek wun ducu wukwonge pi donyo i gicike man ma Rwot Lubangawu oketo ikinwu ki en tin, 13wek en omii wubed jone tin, wek en obed Lubangawu, kit mayam ocike kwede botwuni, ki kit mayam okwongo bot kwariwu Abraim, Icaka ki Yakobo. 14Pe aketo kwong man ki gicike man kwedwu keken, 15ento gicike man tye pi wan ma watye kany ki pi likwayowa ducu ma peya kinywalogi.

16Wun wungeyo kit mayam wabedo kwede i lobo Ejipt, kit ma wawoto wabino kwede kun wawok ki i dye rok mapol; 17dok wuneno gin me kwer ma gitye kwede ducu, cal lubangagi me bao ki me got, me ryal ki me jabu. 183 Omyero wunen ni pe tye laco mo, nyo dako mo, nyo dogolawu mo, nyo kakawu mo ma ikinwu ma biloke woko ki ikom Rwot Lubangawa, me cito ka woro lubanga mogo pa rok magi ducu. Ngat ma bingak woko ki ikinwu bibedo rom ki lwit yat matye ki kwir ma nyako nyige makec. 19Omyero wunen ni, pe tye ngat mo ikinwu kany matye kawinyo kwong ki gicike magi ducu ento bwole woko kene ni, ‘Gin mo marac ma bipoto ikoma bibedo peke kadi bed angak woko kun amede kitimo gin moni ma kikweroni.’ Kitmeno miyo kibijwero jo mabeco ki jo maracu woko ducu kacel. 20Rwot pe bitimo dano macalo meno kica, ento kiniga pa Rwot ki nyekone aye biduny macalo yito ikome, ki lok me ceno dano ma kicoyo i buk man bimoko ikome matwal, nio ka Rwot bijwayo nyinge woko ki ite polo. 21Rwot biketo en macalo labol ikin kaka pa jo Icrael ducu, ci bibolo can mapek ikome ma rwate ki lok ducu me ceno dano matye i gicike ma kicoyo i buk man me cik.

22Ci likwayowu ma gibilubowu, lutinowu ma gibileyo katyenwu, ki lurok ma gua ki i lobo mabor, gibineno lwak atwom ducu ma opoto i lobowu ki lwak can ma Rwot omiyo opoto i lobowu. 234Dok lobowu ducu bidoko aroo, ma opong ki gweng calfa ma mac olenyo, ki kado keken; kodi mo pe kibicoyo iye, gin mo pe dongo iye, wa lum ma lot bene bibedo peke iye. Lobo ma obale woko marom ki Codom ki Gomora ki Adma ki Jeboim, mayam Rwot obalo woko ki kiniga ki akecane. 24Ada, lobo ducu bineno man ci gibipenyo ni, ‘Pingo Rwot otimo loboni kit man? Lyeto me kinigane madwong marom man te loke ango?’ 25Ci gibigamo ni, ‘Rwot otimo kitmeno pien jo pa Rwot guweko lubu gicike pa Rwot Lubanga pa kwarigi woko, mayam ocike kwedgi ikare ma okwanyogi ki i Ejipt. 26Ma ka woro Rwot, gin gucito ka woro lwak lubanga mukene mayam pe gingeyo ki ryebe piny inyimgi, lwak lubanga mayam kikwero ni pe ki worgi. 27Ma omiyo kiniga omako Rwot ikom lobo man, ma okelo iye lwak lok ducu me ceno dano ma kicoyo i buk man. 28Rwot oputu lwitgi woko ki i lobogi pi kinigane ki akecane ki akemone madwong, ka obayogi woko wa i lobo mukene, kama gitye iye wa onyo.’”

29Moses dok omede kun waco ni, “Tye mung mogo ma Rwot Lubangawa pe oyabo botwa, meno obedo mung ma mere; ento gin ma dong en oyabo omiyo botwa dong obedo mewa ki pa likwayowa matwal, wek walub lok ducu ma i cik man.”