Nwoyo Cik 28

Gum mabino pi gwoko cik

(Lev 26:3-13; Nwo 7:12-24)

11

Moses owaco bot lwak pa jo Icrael ni, “Ka wubiworo dog Rwot Lubangawu, ma wugwoke kun wulubu cike ducu ma acikowu kwede tin, ci Rwot Lubangawu bipilo wiwu makato rok ducu ma wi loboni. 2Kace wuworo dog Rwot Lubangawu, ci en bimiyo gum man ducu bibedo mewu matwal:

3Wubibedo ki gum i taunwu madito ducu dok wubibedo ki gum i potiwu.

4Gum bibedo ikom lutino ma wubinywalogi, ki ikom cam ma bicek i potiwu; ikom lutino dyangiwu ki ikom lutino romiwu ki dyegiwu.

5Ci Lubanga bimiyo camwu bicek mapol dok wubibedo ki ginacama ma oromo.

6Wubibedo ki gum i kwowu, dok bene wubilimo gum i tic ducu ma wutiyo.

7Rwot bimiyo wuloyo lumerokwu ducu ma bibino kalweny ikomwu, miyo wubinekogi woko ki inyimwu. Gibimol kalweny ikomwu ki i yoo acel, ento gibiringowu ci gibiket woko ki inyimwu i yoo abiro mapatpat.

8Rwot Lubangawu bimiyowu gum ci cam bibedo ma opongo derowu ducu, ki ikom gin ducu ma wubitiyo; bimiyowu gum i lobo ma en bimiyo botwuni.

9Rwot bimokowu me bedo lwake maleng kit mayam okwongo kwede botwu, kace wumako cik pa Rwot Lubangawu, kun wulubu yone ducu. 10Jo ma iwi lobo ducu gibineno ka kilwongowu ki nying Rwot, ci gibilworowu. 11Rwot bimiyo wulony ki lwak jami mapol; bimiyo wunywalo lutino mapol bimiyo limwu makwo nya madwong ma potiwu bene ceko cam mabup. 12Rwot biyabo polo pirwu, ma en ot kano lime maber, ci miyo kot cwer i lobowu i karene, ci miyo gum ikom tic ducu ma wutiyo. Jo me rok mapol gibimako banya botwu ento wun pe wubimako banya mo. 13Rwot bimiyo wubedo jo ma telo nyim, pe jo ma coko ter; wubibedo kacito anyim ma pe dong wudok cen, teke wubedo kalubu cik pa Rwot Lubangawu ma acikowu kwede tin kun wugwoke ka cobogi maber. 14Ento wunen ni wugwoke ma pe wuloke me kwero lubu lok ducu ma acikowu kwede tin pi woro lubanga mukene ki pi tic pirgi.”

Can ma bino pi bedo ludingo

(Lev 26:14-46)

15“Kace pe wuworo dog Rwot Lubangawu nyo pe wugwoke kalubu lok ma en ociko ducu ki cike ma acikowu kwede tini, ci lwak cen magi ducu bipoto ikomwu ci moko ikomwu:

16Ci Rwot bimiyo cen bedo ikomwu ki i taunwu ducu wa i potiwu.

17Rwot bene bimiyo cen bibedo ikom camwu ducu ma i potiwu wa ikom otakowu me tedowu ducu.

18Cen bibedo ikom lutino ma wubinywalogi, ki ikom cam ma bicek i potiwu, ikom lutino dyangiwu ki ikom lutino romiwu ki dyegiwu.

19Cen bibedo ikomwu ka wudonyo i ot, ci cen bibedo ikomwu ka wukato woko.

20Kace wubwoto Rwot, ma wubedo katiyo gin marac, ci Rwot bicwalo cen ikomwu ma bibangowu woko ci bijukuwu i gin ducu ma wutemo tiyone nio ka wuto wutum woko oyotoyot. 21Rwot bimiyo two gemo marac poto ikomwu nio ka bityekowu woko ki i lobo ma wubicito iye ka camone. 22Rwot bipwodowu ki two mamato kom dano woko, two aburu, two akwota, ki lyeto madwong; dok bene bicwalo yamo mager labongo kot i lobowu, ci miyo camwu ma i poto bware dok two woko. 23Kot pe bicwer i lobowu, ki ngomwu bene bibedo ma otwo woko matek likang macalo nyonyo. 24Rwot bicwalo lapiro apulu ki apwa matego ma ka kot i lobowu kun a ki malo duny ikomwu nio ka otyekowu woko.

25Rwot bimiyo lumerokwu giloyowu woko. Wubilubu yo acel ka wucito kalweny ikomgi, ento wubiket woko ata kun wuringo woko ki inyimgi i yoo abiro mapatpat. Lworo bimako ker ducu ma wi lobo pi gin ma bitime ikomwu. 26Komwu ma otoni bibedo cam pa winyo ducu me polo, ki pa lee timgu; dok bene dano mo bibedo peke ma ryemogi. 27Rwot bipwodowu ki odeke kit mayam otimo ikom jo Ejipt, ki bur adola ki nyac ki gwenyo, ma cangone biloyowu woko. 28Rwot bipwodowu ki two apoya ki to wangwu, dok bene bibango tamwu woko. 29Wubipange apanga ata i dyeceng macalo lawange oto pange i colpiny, pe wubilimo gum mo i gin ducu ma wubitiyo. Kibibedo ka unuwu kun kiyako jamiwu jwijwi, dok lakonywu bene bibedo peke.

30Ibitongo keny ikom nyako, ento ngat mukene aye bibutu kwede. Ibigero ot ento pe i bibedo iye. Ibipito poto olok ento pe ibicamo nyige. 31Kibineko twonini inyimi ma ineno ento pe ibibilo ringone kadi ki acel. Kibimayo kanani ci kibiterogi woko ki tek ki inyimi, dok bene pe kibidwokone boti. Kibimiyo romini bot lumeroki, dok bene ngat mo ma bikonyi bibedo peke. 32Kibimiyo awobeni ki anyirani me bedo opii bot jo me rok mukene i wangi kit man ento pe i bibedo ki twero me gengogi wot. Ibibedo kakuru nino me dwogogi cen kwe ci piny biloyi woko. 33Rok mo mayam pe ingeyo aye bicamo cam ma ocek i potoni ducu ma iyele iye ki tic matek dok bene gibiuni ki kit auna madwong malit. 34Can ma ibikato ki iye bimiyo ibibange woko pi gin ma ibineno ki wangi. 35Rwot bipwodi ki odeke ma odet i congi ki i tyeni ma pe cang; odeke bimwono komi woko liweng kun cake ki i wii nio wa i tyeni.

36Rwot biterowu kacel ki rwotwu ma wuketo me loyowu i rok mukene mayam peya wungeyo kadi wa kwariwu bene peya gungeyo; wubiworo lwak lubanga mukene kunu ma kipayo calgi ki bao nyo ki got. 37Wubidoko gin makelo lworo ikin rok ducu kama Rwot biterowu iye, ci kibitic ki nyingwu macalo ginanywara ki me lok abola.

38Ibipito lwak kodi madwong i potoni, ento ibikayo cam manok keken, pien bonyo bicamo potoni woko. 39Ibipito poti olok, ibiyubugi maber, ento pe ibimato kongo bwinone, dok pe ibicoko nyige, pien kwidi bicamogi woko ducu. 40Yadi jeituni bidongo kaducu i dye loboni, ento pe ibinongo moo kadi ki acel, pien nyig olok ducu bio woko piny. 41Ibinywalo awobe ki anyira, ento pe gibibedo joni, pien kibiterogi woko i opii. 42Yadini ducu ki cam ma i potoni ducu bonyo bicamone woko. 43Lubedo ma gibedo ikinwu gibidoko wegi twero dok rwomgi biyito malo maloyowu, ento wun wubimede ameda ki rwenyo twerowu wa rwomwu ducu. 44Gin aye dok bimiyo wumako banya botgi, wun pe wubimiyo gimako banya ki botwu. Gin aye gibibedo jo ma telo nyim, wun wubicoko ter.

45Lwak atwom magi ducu bipoto ikomwu dok bibedo kwedwu nio ka bityekowu woko, pien wukwero winyo dog Rwot Lubangawu, dok bene pe wulubu cike ki gin mayam ocikowu kwede ducu. 46Can magi bibedo lanyut ikomwu kacel ki ikom likwayowu matwal pi kop ma Lubanga ongolo ikomwu. 47Yam Rwot Lubanga omiyowu lwak gum ento wun pe wutiyo bote ki yomcwiny. 48Pieno wun dong wubitic pi lumerokwu ma Rwot bicwalo kalweny ikomwu. Kec ki orwo pii binekowu, wubibedo munero ma can jami ducu omakowu, ci Rwot biriyo okol i ngutwu nio ka otyekowu woko ducu. 49Rwot bikelo rok mo ma gua ki kamabor ikomwu kamonyowu, ma pe wuniang lebgi, ci gin bipoto ikomwu macalo ocur ma tuk. 50Gin rok ma ger ma pe biparo pi jo ma otii, kadi wa pi timo kica ikom jo matino. 51Gibitero leewu woko ducu liweng, ki cam ducu ma ocek i potiwu nio ka kec bityekowu woko liweng. Gin pe biweko ngano mo, kongo bwino mo, ki moo jeituni mo. Dok dyangi, romi ki dyegiwu mo pe bidong botwu; piman wun wubito woko liweng. 52Lumerokwu bimonyo taunwu ducu ma oromo dye lobowu ma Rwot Lubangawu bimiyowu nio ka cel maboco ki gogo ma wugenoni bigwokowu ducu bipoto woko piny ki i lobowu.

53Ikare ma lumerokwu birumu taunwu woko, kec ki can madit bipoto ikomwu miyo wubicamo ringo kom lutinowu; ringo kom awobewu ki anyirawu ma Rwot Lubangawu omiyo botwu. 54-55Ikare ma lumerok bimonyo taunwu ducu, kadi wa co mayam kinywalogi i gang lonyo ma gudongo ki kuc, kec bicido wanggi woko miyo gibicamo lutinogi pien gin mo mudong botgi me acamo mapat dong pe tye. Dok bene gibitwono omegigi woko, ki mon gi ma gimaro, ki lutinogi mogo ma pud gudong; pe gibiye ni ngat mo ikin gi onywak camo kwedgi, en ringo kom lutinogi ma gitye kacamoneni. 562 Mon mayam kinywalogi i gang lonyo ma gudongo ki kuc, mayam gilworo wot ki tyen gi nono i ngom pien yam gigwoke mada bene gibitimo lakit tic acelu. Kec bicido wanggi woko ikare ma lumerok bimonyo taunwu ducu, 57miyo gibicamo byero me nywalgi imung ki ringo kom lutino ma gunywalo, dok bene gibitwono coggi wa ki awobegi ki anyiragi ma gimaro.

58Ka pe wugwoke kun wulubu lok ducu ma i cik man ma kicoyo i buk man wek wubed kalworo nying me deyo ki mapek pa Rwot Lubangawu, 59ci Rwot dok bikelo atwom madit ikomwu ki ikom likwayowu, en atwom malik ma bedo nakanaka, ki two magwa ma pe juke. 60En bikelo ikomwu kit two ducu pa jo Ejipt mayam wubedo kalworogi; twone biniang ikomwu matek dok pe bicang. 61Dok kit two ducu ki kit atwom ducu ma pe kicoyogi i buk man me cik Rwot aye bikelogi ikomwu, nio ka otyekowu woko liweng. 62Kadi onongo yam wunya mapol macalo lwak lakalatwe me polo, kibiweko welwu dong manok mo, pien pe wubedo ka woro dog Rwot Lubangawu. 63Kit mayam cwiny Rwot obedo yom ikomwu omiyo otimowu maber dok omiyo wunya mapol, kitmeno bene cwiny Rwot dok bibedo yom pi kelowu to piny ma bityekowu woko liweng; ci bikwanyowu woko ki i lobo ma dong wucok donyo iye kacamone.

64Rwot bikeyowu woko ata ikin rok ducu, cake i agiki lobo tung cel o kwede i agikine mukene tung cel. Wubiworo lwak lubanga mukene kunu ma kipayo calgi ki bao nyo ki got, mayam pe wungeyo kadi wa kwariwu bene pe gungeyo. 65Ikin lurok magi pe wubinongo iye kuc mo, dok pe wubinongo iye kayweyo tyenwu, ento Rwot bimiyo cwinywu myel kunu, wangwu bimyeno, tipu komwu bito woko lirut. 66Cwinywu bingabe angaba pi kwowu me anyim; wubibedo ki lworo madwong dyewor ki dyeceng, ma pe wutye ki gen mo i kwowu. 67Odiko wubiwaco ni, ‘Kono nene obedo otyeno!’ dok otyeno wubiwaco ni, ‘Kono nene obedo odiko!’ pi lworo madwong i cwinywu pi gin matye anyim ma wangwu bineno. 68Dok Rwot bidwokowu cen i Ejipt kun kiterowu i mel, wubidok i wot mayam aciko ni pe dok wubinwoyoneni. Wubimine kekenwu kunu bot lumerokwu kun wucate ni kiwilwu wubed opiigi ki angecagi, ento dano mo pe ma biwilowu.”