Nwoyo Cik 25

1Ci Moses omede ki lok ni, “Ka laro kop mo tye ikin dano, ka gubino kama kipido iye, ce langolkop ongolo kop ikin gi kun kitucu dano ma pe ki bal, ka kingolo kop loyo latim bal, 2ka dano ma labalo romo agoya, ci langolkop miyo en butu piny ci kigoye ki inyime ki wel odo muporo kit bale. 31Wel odo twero bedo pyere angwen, ento pe okat kenyo, wek pe kigoye ki lwak goco makato meno miyo wucayo ominwu. 42

Pe itwe dog twon ka tye ka nyono ngano me dinone.”

Lako dato

53

“Kace omego aryo gibedo kacel ce ngat acel ikin gi oto woko ma pe ki wode mo, pe wubiye dano ma welo ma pe ladogolagi tero dako pa lato. Omin cware aye bilako dakonu. 6Latin laco ma en binywalo bibedo ka wi omine, wek nying omine pe orweny woko ki i Icrael. 74Ento ka omin latoni pe mito lako ciomine, ci ciomine bicito kama ludongo me taun gucoke iye ci waco ni, ‘Ywera okwero nywalo wi omine wek nyinge pe orweny woko ki ikin jo Icrael; en pe oye cobo tic pa ywero ikoma.’ 8Ka ludongo ma i taun gi bilwongo laconu ci gibilok kwede. Kace en pud mede ki loke kun waco ni, ‘An pe amito lake,’ 9ciomine bicito cok bote inyim ludongo ci lunyu war woko ki i tyene, ka ngulu laa i wange kun waco ni, ‘Laco ma okwero nywalo lutino ka wi omine kibitimo kitmeno.’ 10Ki nying dogolane kibilwongo i Icrael ni, ‘Dogola pa dano ma kilunyu war woko ki ityene.’

11Kace co gitye kalweny keken gi, ka dako pa ngat acel onyiko cok ka laro cware ki i cing dano matye ka goyeni, ce ocwalo cinge omako kom me co pa laconi, 12ci ibitongo cing dako ingunu woko, ma kica pe maki ikome. 135

Pe i tim aram me bedo ki kidi lapim jami aryo i kicaani, mapek ki mayote. 14Pe i tim aram me bedo ki lapor jami aryo i odi, madite ki matidine. 15Ibibedo ki kidi lapim pek pa jami maber maromo kakare, ki agwata lapor jami maber maromo kakare, wek irii pi kare malac i lobo ma Rwot Lubangawu bimiyowu. 16Jo ducu ma gitimo gin macalo meno, ki jo ducu ma pe gitiyo gin matye atir, gibedo me kwer bot Rwot Lubangawu. 176

Wupo gin mayam jo Amalek gutimo ikomwu i yoo ikare ma wua woko ki i Ejipt, 18kit mayam gulwenyo kwede ikomwu i yoo ca, ikare ma onongo wuder, ma komwu ducu oloc woko, kit ma gin gungolo kwede wi jo ma gudong i ngewu ma gi goro; gin yam pe gulworo Lubanga wa ki acel. 19Kace Rwot Lubangawu dong omiyo wuywe ki lweny ki merokwu ducu ma orumuwu dyereni, ki i lobo ma Rwot Lubangawu bimiyo wubicamo me aleyawu, ci wubijwayo jo Amalek woko ki i tam pa dano ducu ma gitye piny ite polo. Wiwu pe owil ilok man.”