Nwoyo Cik 26

Gityer ikare me kac

1“Ka dong wuo i lobo ma Rwot Lubangawu bimiyowu me aleyawu, ma dong wucamo lobo wubedo iye, 21 wubikwanyo dul mo ikom gin mukwongo cek ikom kit cam ducu ma wukayo ki i lobo ma Rwot Lubangawu omiyowu, wubiketo i aduku wucito kwede i kabedo ma Rwot Lubangawu biyero kama biketo nyinge bedo iye. 3Wubicito bot ajwaka pa Lubanga matye katic ikare meno, ci wubiwaco bote ni, ‘Tin atucu bot Rwot Lubangana ni atyeko o i lobo mayam Rwot okwongo pire bot kwariwa ni ebimiyo botwa.’ 4Ci ajwaka bigamo aduku ki i cingi, ci keto piny inyim keno tyer pa Rwot Lubangawu.

5Ci ibidok iye ki inyim Rwot Lubangawu ni, ‘Kwarowa yam dano me lobo Aram, ma lamal gang ata. Yam olak ocito wa i Ejipt obedo kunu ma welgi nok mo; ki kunu en odoko rok madit ki matek ma onya mapol. 6Jo Ejipt gubedo ka timowa magwa marac tutwal, ma giunuwa, guketowa i tic matego me opii. 7Ka yam wakok bot Rwot Lubanga pa kwarowa, ci Rwot owinyo dogwa, oneno kit ma giunuwa kwede, ki aroma ticwa, ki atwomwa. 8Rwot okwanyowa woko ki i Ejipt pi twero me bade, ki cinge ma oryeyo, ki tim ma okelo lworo madwong, ki lwak lanyut ki tango. 9Okelowa wa i kabedo man, omiyowa loboni, en lobo ma miu ma ceko cam mapol. 10Ci dong inen ka tin akelo wi mwaka ma oa i poto ma imiyo bota; ai Rwot.’ Ka dong iketo aduku piny inyim Rwot Lubangani, ci iryebe piny iwore. 11Cwinyi bibedo yom pi jami mabeco ducu ma Rwot Lubangani omiyo boti ki bot jo me odi; ci ibimiyo Lulevi ki lubedo ma gibedo ikinwu bene cwinygi obed yom kacel kwedwu. 122

I mwaka me adeke, ma en aye mwaka me miyo dul acel ikom apar, ibimiyo dul acel me apar me kit cam ducu ma ocek i potoni bot Lulevi, lubedo, lutino kic ki mon to wek gin bene gubed ki cam ma romogi i taunwu ducu. Ka dong ityeko miyone botgi, 13ci ibiwaco bot Rwot Lubangani ni meno, ‘Dong atyeko kobo jami maleng woko ki i oda, amiyo woko bot Lulevi, lubedo, lutino kic ki mon to kun alubu ciki ducu ma imiyo bota. Pe aturu ciki mo, pe bene wiya owil ikomgi. 14Pe acamo gin mo ikom dul acel me apar ikare ma atye kakwero cola, pe akobo gin mo ki i oda ma onongo koma ki keni, pe atyero mogo bot tipu pa lato mo; dong aworo dogi, in Rwot Lubangana, atyeko tiyo gin ducu kit mayam icika kwede. 15Nen piny ki i kabedoni malengi, nia ki i polo, ci imii gum ikom joni Icrael ki ikom lobo ma imiyowa kit mayam ikwongo kwede bot kwariwa, en lobo ma miu maceko cam mapol.’”

Jo pa Rwot

(Nia 34:11-16)

16“Tin Rwot Lubangawu ocikoni wulub cik magi ki gin ma en ongolo ducu, ma omiyo wubigwoke mada kalubugi ki cwinywu ducu ki tipuwu ducu. 17Tin dong wutucu lok ikom Rwot ni en aye Lubangawu, dok ni wubilubu yone ducu kun wugwoko cike ki gin ma en ociko ducu, dok wubiworo doge. 183Dok tin Rwot otucu lok ikomwu ni wun aye wu jone kikome, 19dok en bipilo wiwu makato rok ducu mayam en oketo; kibipake pirwu, nyinge biywek pirwu, en bilimo deyo ikomwu, dok otucuni wun wubibedo rok maleng pi Rwot Lubangawu, kit mayam owaconi.”