2 Temceo 3:16

Kare me agiki

1Ento omyero kong iniang man ni, ikare me agiki, peko bibedo madwong. 2Pien dano bibedo ka mare ken gi kun gibedo lumar lim, luwake, lucac, lunywar jo mukene. Pe gibiwinyo lunyodogi, pe gibimiyo pwoc mo, gibibedo jo ma pe leng. 3Pe gibimaro dano wadgi, gibibedo jo ma pe timo kica bot dano, gibibedo lucok dog, jo ma mitigi pe juke, jo ma ger ma gidag gin mo maber, 4luroro, jo matye atata ma pe giparo piny, jo ma gikete malo ken gi ki wake, jo ma maro yomcwiny ma ka maro Lubanga. 5Gibimako dini dok gibilubu ikitgi manen ki woko keken, kun gikwero tekone woko. Poke woko ki ikom jo macalo meno. 6Pien tye jo mogo ikin gi ma giride gidonyo i paco pa dano mukene, ci giloyo tam pa mon mogo ma goro, ma peko me bal obwoyogi woko, ma mitigi tye patpat ci bedo ka ywayogi tungi ki tungi, 7kun gimito pwonye ikare ducu, ento pe dok gitwero niang ilok ada. 81 Jo meno girom ki Yane ki Yambure mayam gupyem ki Moses, pien gin bene gitye ka pyem ki lok ada ikit acelu; ryekogi dong obale woko, niyegi bene pe tye kakare. 9Ento pe gibimede kwede nakanaka, pien mingoginu bingene woko bot lwak, calo pa Yane gin ki Yambure.

Cik pa Paulo me agiki bot Temceo

10Ento in dong ilubu pwonya, kita ki gin ma amito tiyone i kwo man. Ineno niyena, diyo cwinya, mar ma atye kwede, kit ma ayele kwede kun aciro can. 112 Ineno bene kit ma kiuna kwede, ki can ma aneno; dok ingeyo gin ma otime ikoma i Antiokia, i Ikonio, ki Licitra, kit ayelayela mayam aciro; ento Rwot olara ki i gin ducu. 12I ada, jo ma gimito bedo ma gilworo Lubanga, kun gibedo i Kricito Yecu, kibiunugi, 13kun jo maracu ki jo ma lugoba gibimede ki bedo marac makato kare, kun gibwolo dano, ki gin bene kibibwologi. 14Ento in myero imede igin ma kipwonyi kwede, ki madong iye adada, kun ingeyo bene jo mayam gupwonyi iye. 15Ingeyo bene ni, cake i tinoni ingeyo coc maleng mayam kicoyo matwero pwonyi i yo me lare pi ye Kricito Yecu. 16Ginacoya ducu mayam kicoyo, kicoyo pi teko pa Cwiny pa Lubanga. Man konyo me pwony, me juku dano, me tiro kit pa dano, me nyebo dano wek gulub kit ma atir, 17wek dano pa Lubanga obed muteggi, ma bene oyube i yo ducu, maromo tiyo kit tic mo maber ducu.