1 Jo Tecalonika 5:11

Dwogo pa Rwot

1Ento lok ma dok ikom kare, ki nino, utmegiwa, pe myero aco pire botwu, 2pien wun ki komwu dong wungeyo maber ni, nino pa Rwot bibino macalo lakwo ma bino i dyewor. 3Ka dano giwaconi, “Kuc tye, piny okwe mot, gin mo marac pe,” to biturugi atura calo arem me nywal ma turu dako muyac, kalare biloyogi woko. 4Ento wun pe wutye ipiny macol, utmegiwa, matwero miyo ninonu turuwu atura calo lakwo. 5Pien wun ducu wubedo jo me dero, jo me dyeceng; wan pe jo me dyewor nyo me piny macol. 6Pimeno, pe omyero waninu anina macalo jo mukene, ento wabed kaneno piny kun wagwoke. 7Pien jo ma nino, ginino dyewor, jo ma mer ki kongo gimer bene dyewor, 8ento wan jo me dyeceng myero wabed jo ma wagwoke. Waruku niye ki mar gubed nyonyo me gengo korwa, waruku bene gen me lare obed tok wiwa me lweny. 9Pien Lubanga pe oyerowa ni kinigane opot ikomwa, ento ni walare i Rwotwa Yecu Kricito, 10mayam oto pirwa, ni wek kadi ka waneno nyo wanino, wabibedo kwo kacel kwede. 11Pimeno wucuk cwinywu kekenwu, dok wukonye bene kekenwu wek wudong icwinywu, ngat acel acel okony lawote me dongo, kit macalo wutye katimoneni.

Cuko cwiny ki mot me agiki

12Wabako dogwa botwu utmegiwa, wuwor jo matye katic ikinwu ma gicane pirwu i Rwot, kun gipwonyowu. 13Wuket deyo madwong ikomgi pi ticgi, dok wumargi bene. Wubed ki kuc ikinwu kekenwu. 14Dok wabako dogwa botwu, utmegiwa, wujuk jo ma balo kare labongo tic, wucuk cwiny jo ma cwinygi odoko nyap, wukony jo ma goro, wudii cwinywu bene ikom dano ducu. 15Wunen maber ni ngat mo ikinwu pe ocul gin marac pi tim marac ma kitimo ikome, ento kare ducu wutem me timo ber ikinwu kekenwu ki bot jo ducu. 16Cwinywu obed yom kare ducu. 17Wuleg Lubanga ma pe wukeng. 18Wumii pwoc ikit gin ducu, pien meno aye gin ma Lubanga mito ki botwu i Kricito Yecu. 19Pe wugeng Cwiny Maleng me tiyo tice i iwu, 20pe wuca bene lok me nebi ma Lubanga miyo bot dano me atita, 21ento wubed ki wang mabit me neno jami ducu; wumak gin maber matek. 22Wukwer tim maracu ducu.

23Walegoni Lubanga kikome ma en won kuc omiwu wudok jo maleng i yo ducu, ogwok cwinywu ki tipuwu ki komwu wek wubed labongo lok mo maloyowu ikare me dwogo pa Rwota Yecu Kricito. 24Ngat ma olwongowuni gene, dok bitiyo.

25Utmegiwa, wuleg Lubanga pirwa.

26Wumot utmego ducu ki mot me mar. 27Acikowu matek inying Rwot ni, myero wukwan waraga man bot utmego ducu.

28Kica pa Rwotwa Yecu Kricito obed kwedwu.