1 Petero 4

Kwo ma oloke

1Kit macalo Kricito yam ociro arem me kom, wun bene myero wuruke ki tam acel kitmeno, wek kimiwu tek. Pien ngat mo madong ociro arem kom, pe dong mede ki bal, 2wek etyek kare me kwone i lobo man ma pud odong kun pe dok lubu miti maracu ma dano paro, ento cobo gin ma Lubanga mito. 3Myero dong wuwek kare mayam wubedo iye katiyo gin ma jo ma pe ngeyo Lubanga gimaro timo oromwu. Yam wulubu kit me tarwang, ki miti me kom, mero, karama me woro cam ki tuku marac, mat, ki woro jogi. 4Giuru mada pien kombedi dong pe wuribe kwedgi ilok man me miti me kom ma pe juke; meno aye ma omiyo kinywarowu. 5Ento gibidok ilok man bot Lubanga ma oyube pi ngolo kop pa jo makwo ki jo ma oto. 6Man en aye gin ma omiyo yam gitito lok me Kwena Maber kadi wa bot jo ma oto, wek kadi kingolo kop ikomgi macalo kingolo ki jo ducu, gin gubed kwo i cwiny macalo Lubanga.

7Agiki me jami ducu dong cok; pimeno wugwok kitwu, kun wuloyo mitiwu kenwu, wek wumiine i lego Lubanga. 81 Makato ducu wumok matek i mare kekenwu; pien mar umu lwak bal mapol. 9Wubed jo ma jolo welo ngat man ki lawote, kun pe wungur bene. 10Kit macalo ngat acel acel tye ki mote ma kimiye, wutii kwede pi konye kekenwu, macalo lugwok jami mabeco, ma tiyo ki mot me kica ma Lubanga omiyo ma kite patpat. 11Ka ngat mo tito lok, myero otit macalo lok ma oa ki bot Lubanga; ngat mamiyo kony otii macalo ngat ma tiyo kitek ma Lubanga omiyo; wek dano guket deyo ikom Lubanga i yo ducu pi Yecu Kricito. Deyo ki twero bedo mere nakanaka. Amen.

Ciro can pi bedo ngat ma oye Yecu Kricito

12Luwota ma amaro, pe wuur can marom ki mac ma bino ikomwu pi temowu, ma kun wutamo ni meno obedo gin mo mapat tutwal mupoto ikomwu. 13Ento wubed ki yomcwiny ka wuribe i can pa Kricito, wek dok wubed ki yomcwiny madit ikare ma deyone binen. 14Wutye ki gum ka kiyetowu pi nying Kricito, pien nongo cwiny me deyo, ma en Cwiny pa Lubanga, bedo ikomwu. 15Ka ngat mo neno can ikinwu, ci pe omyero obed pi nek, nyo pi kwo, nyo pi timo gin mo marac, nyo pi laro lok i gin pa ngat mo mukene. 16Ento ka kiketo can ikom dano mo pi bedo ngat ma oye Kricito, lewic pe myero omake, ento omii deyo bot Lubanga pi lwonge ki nying meno. 17Pien kare me cako ngolo kop dong oromo, kun cake ki bot jo pa Lubanga. Man ka ocake ki botwa, ci agiki pa jo ma gukwero winyo lok me Kwena Maber ma oa ki bot Lubanga bibedo ningning? 182 Coc mayam kicoyo waco ni,

“Kace bedo tek bot dano ma kite atir me lare,

ci dong ngo ma bitime ikom labalo ma pe lworo Lubanga?”

19Pimeno, jo ma gineno can i yo ma Lubanga mito, ber gumine ken gi i cing Lacwec ma gene, kun gitiyo gin ma atir.