1 Petero 3

Mon ki coggi

1Kitmeno bene, wun mon wumiine me bedo ite loc pa cogwu, wek kace co mogo ikin gi pe gilubu lok pa Lubanga, ci gitwero loke pi kit pa mon gi, kadi bed wun ki komwu pe wuloko lok mo ki dogwu, 2pien gin bineno kitwu maleng manen me woro. 31 Rukwu pe obed ruk manen ki woko, macalo kedo yer wic, tweyo tiko jabu, ruku bongi mabeco, 4ento rukwu myero obed kit me cwiny ma pe nen. Ruk ma pe bale en cwiny mamwol, ma ling mot; meno aye wele dit inyim Lubanga. 5Pien ikare macon, mon maleng ma gumoko gen gi ikom Lubanga yam giruke kitmeno, kun bene gimine ken gi me bedo ite loc pa coggi, 62 macalo Cara yam winyo lok pa Abraim, kun pake bene ni, “Rwoda.” Wun bene kombedi dong wun lutinone, ka wutiyo gin maber, kun pe gin mo miyowu lworo. 73

Kitmeno bene, wun co wupar pi monwu kun wuparo pirgi, kun wumiyo woro bot dako macalo lawoti ma kome pe tek, pien gin bene ginywako kica pa Lubanga kwedwa ma en aye kelo kwo. Kumeno gin mo pe ma bigengo legawu.

Neno can pi lubu kit ma atir

8Me agikine, wun ducu wubed ki tam acel dok ki cwiny acel. Wumare calo utmego, ma wutye ki kica dok ki cwiny mamwol. 9Pe wudwok tim marac pi tim marac, nyo yet ki yet; ento ma ka timo meno, wuleg gum pa Lubanga obed ikomgi, pien kilwongowu piman, wek wunong gum. 104 Pien yam kicoyo ni,

“Ngat ma maro kwo,

ki ma mito ni eri pi kare malac kun bedo maber,

myero ogwok lebe pe olok gin marac,

ki doge bene pe olok lok me bwola.

11Oa woko ki i gin marac, otii gin maber,

oyeny kuc dok otii matek me nongo ne.

12Pien Rwot neno jo ma kitgi atir,

dok ciko ite, winyo legagi;

ento dag neno jo ma lutim maracu.”

13Anga mono ma bitimowu marac ka wuketo cwinywu me tiyo gin maber? 145 Ento kadi bed wuneno can pi lubu kit ma atir, ci wutye ki gum. Pe wulworgi, dok cwinywu bene pe opoti,6 15ento wuwor Kricito icwinywu macalo Rwotwu. Wubed ma wuyube kare ducu pi dok ilok ma dano bipenyowu kwede ikom gen ma wutye kwede; 16ento wudok iye ki mwolo dok ki woro. Wubed ma cwinywu leng, wek lewic omak jo ma yeto kitwu maber i Kricito, ka kinywarowu. 17Bedo ber ka wuneno can pi timo gin maber, kace Lubanga mito kitmeno, loyo ma wuneno can pi timo gin marac. 18Pien Kricito bene yam oneno can pi bal, kicel ma otyeko lok ducu; en ngat ma kite atir oto pi jo ma kitgi pe atir, wek omii ekelwa bot Lubanga. Yam kineko kome, ento kicere woko i cwiny. 19En yam owoto i cwiny ocito otito lok pa Lubanga bot tipu pa jo matye ibuc, 207 mayam con pe guwinyo Lubanga, kadi bed Lubanga odiyo cwinye ikomgi ikare pa Nua ma onongo en tye ka payo yeya, ma dano manok maromo aboro keken aye gulare ki i pii. 21Gin man cimo batija ma koni larowu; pe me lwoko cilo me kom, ento obedo macalo lega bot Lubanga wek wudok jo ma cwinywu leng, pi cer pa Yecu Kricito, 22madong odok woko ipolo, ikabedo me deyo inget Lubanga tung acuc, kun lumalaika ki twer kiteko ducu gin tye i teloce.