1 Petero 2:9

Got makwo ki rok ma kiyero

1Pimeno, dong wubwot rac cwiny ducu, ki kit me goba ducu, ki kit me adwala, nyeko ki kit yet ducu. 2Wumit cak magili me cwiny, calo lutino lukere ma pud kinywalogi nyen, wek omii wudong nio i lare; 31 pien dong wutyeko bilo ber pa Rwot.

4Wubin bote, en got makwo mayam dano gukwero, ento ki bot Lubanga obedo got me wel ma en oyero. 5Wubin macalo godi makwo, wek kiged kwedwu ci wudok ot me cwiny pa Lubanga, wek wubed ajwaki maleng pa Lubanga, ka wutyer gin tum me cwiny ma Lubanga pwoyo, pi Yecu Kricito; 62 pien yam kicoyo ni,

“Nen, dong aketo got me wel i Cion,

ma ayero me got me twok ot,

ngat ma oye en, lewic pe bimako.” 73

Pimeno, ki tung botwu wun jo ma oye en, Kricito obedo me wel; ento ki bot jo ma pe guye en, tye macalo yam kicoyo ni:

“Got ma lugedo gukwero,

en aye odoko got madit mapire tek.” 84

Odoko bene,

“got mamiyo dano yoke ka giwoto,

ki got mamiyo dano poto.”

Giyoke pien gukwero winyo lok pa Lubanga, macalo onongo yam kiyubu pirgi wa con. 95

Ento wun wubedo rok ma ki yero, ajwaki pa Rwot, rok maleng, jo pa Lubanga kikome, wek wutit pi tic me deyo pa ngat ma olwongowu nia ki i piny macol wek wudony i lengone me aura. 106 Yam onongo pe wubedo jo pa Lubanga, ento kombedi dong wudoko jone; yam pe kitimo botwu kica, ento kombedi dong kitimo kica botwu.

Wubed calo opii pa Lubanga

11Wun ma amaro, abako doga botwu macalo wun welo, pe wun jo me lobo man, wukwer miti me kom woko ma lwenyo ki tipuwu. 12Wubed ki kit maber ikin Lurok, wek kace kiyetowu ni wun lutim gin marac, gunen tic maber ma wutiyo, wek bene gumi deyo bot Lubanga i nino ma en bibino kangolo kop iye.

13Pi Rwotwa, myero wumiine me bedo ite loc me twero ducu matye ikin dano, bot laloc madit, pien en aye maloyo jo ducu, 14ki bot luloc ma en ocwalogi pi keto can ikom jo ma lutim maracu, ki pi pwoyo jo ma timo gin ma atir. 15Pien Lubanga mito ni wutii gin ma atir, wek wumii jo maming ma gikwiya piny guling woko. 16Wubed macalo jo ma lone ken gi, ento pe wutii ki locken meno pi timo gin marac; wubed giwu macalo opii pa Lubanga. 17Wuwor dano ducu. Wumar luwotwu. Wulwor Lubanga. Wuwor laloc madit.

Lapor me can ma Kricito olimo

18Wun opii, wumiine kenwu ite loc pa luditowu ki kit woro ducu, pe bot jo ma lukica ki jo mamwol keken, ento bot jo mager bene. 19Man aye gin ma kipwoyo, kace dano ciro arem ma nongo cwinye tye ikom Lubanga, ka kiune ma nongo pe obalo. 20Kipwoyowu pi ngo, ka wudiyo cwinywu ma nongo kipwodowu pi bal? Ento kace wudiyo cwinywu ma nongo wutye kaneno can pi timo gin maber, meno aye Lubanga pwoyo. 21Pien kilwongowu pi gin meno; pien Kricito bene yam oneno can pirwu, oweko botwu lapor maber me aluba, wek wulub kore. 227 Bal mo peke ma en otimo, doge bene pe oloko lok goba. 238 Ikare ma dano guyete, en pe oyetogi. Ikare ma en oneno can, pe oburu dano; ento omine kene bot ngat ma ngolo kop atir. 249 Ento en otingo balwa ikome kene ikom yatariya, wek wan wagik timo bal, ka dong wabed kwo ikit ma atir. Pi pwod ma kipwode kwede omiyo wucang. 25Pien yam onongo wungak wurwenyo woko calo romi, ento kombedi dong wudwogo bot Lakwat ki Lagwok tipuwu.