1 Petero 1

Mot

1Waraga man oa ki bot an Petero, lakwena pa Yecu Kricito.

Bot jo pa Lubanga ma oring ayela ma guket ata, ma gin bedo i Ponto, Galatia, Kapadokia, Acia ki Bitunia. 2Lubanga Won aye ma oyerogi pi yube ma en ongeyo con, ma Cwiny mere Maleng dong olonyogi gudoko maleng wek guwiny lok pa Yecu Kricito, dok bene wek kikir remone ikomgi.

Kica ki kuc myero omede botwu.

Gen makwo

3Gipwo Lubanga Won Rwotwa Yecu Kricito! Pien pi kicane madit ma omiyo kinywalowa odoco wek wabed ki gen makwo pi cer pa Yecu Kricito ki ikin jo ma oto, 4ki dok wek wanywak ginaleya ma pe top, ma cilo mo pe ogudu, ma pe bale, ma kikano pirwu i polo. 5Lubanga tye ka gwokowu kiteke pi niyewu, wek wunong lare ma kiyubu, ma binen ikare me agiki piny.

6Wubed ki yomcwiny piman, kadi bed kombedi gwok nyo cwinywu twero cwer pi kare manoknok mo pi kit ma kitye kaomo ki cwinywu i yo mapatpat, 7wek kinen niyewu, kace tye niye me ada. Pien kadi jabu ma kitemo ki mac pe rii nakanaka, ento niyewa pire dit kato jabu, dok bene bikelo botwu pak ki deyo ki woro i ceng ma Yecu Kricito binen iye. 8Kadi pud pe wunene, dong wumare. Dok bene kombedi kadi pe wunene, wuye en kun wubedo ki yomcwiny madit ma pe wace, dok bene me deyo. 9Adwogi me niyewu omiyo wunongo lare me tipuwu.

10Lunebi mayam gutito pi kica ma gibimiyowu yam guyenyo matek, kun gipenyo lok ikom lare man. 11Gin yam gumito ni ginge anga, nyo kit kare mene, ma Cwiny pa Kricito matye i igi tye ka nyutu, ikare ma otito iye pi can ma Kricito biciro, ki pi deyo ma dok bilubu. 12Yam onongo kinyutu botgi ni, kwena ma kimiyogi pe otiko gin ki komgi, ento otiko wun. En aye lok ma kombedi dong jo ma gitito lok me Kwena Maber gutyeko tito botwu pi Cwiny Maleng ma kicwalo ma oa ki i polo; lok ma lumalaika bene guparo me nenone matek tutwal.

Wubed ki kwo maleng

13Pimeno, dong wubed ma wuyube i tamwu, kun wugwoke bene. Wuket genwu ducu ikom kica ma bibino botwu ikare ma Yecu Kricito binen iye. 14Macalo lutino ma luwiny, pe wumii kwowu orwate ki mitiwu mayam kong wubedo kwede ikare ma onongo pud wukwiya piny ca 15Kit macalo ngat ma olwongowu leng, wun bene wubed jo maleng i kitwu ducu; 161 pien coc mayam kicoyo loko ni, “Wubedo jo maleng, pien an aleng.”

17Ngat ma wulwongoni Wonwuni ngolo kop ikom dano acel acel ma pe lenge, kun lubu kit tic ma ngat acel acel otiyo; ma omiyo myero wubed ki lworo inyime kare ducu ma pud wutye kany macalo welo. 18Wun wungeyo ni kityeko kokowu ki ikit pa kwariwu ma pe konyo. Pe kikokowu ki gin ma bale woko, macalo ryal nyo jabu, 19ento kikokowu ki remo pa Kricito me wel madwong marom ki latin romo ma bal mo nyo roc mo pe ikome. 20Lubanga onongo dong otyeko yero en wa con, ma pud pe ocweyo guti me lobo, ka dok onyute woko pirwu ikare man, ma en aye kare me agiki. 21Pire omiyo dong wadoko jo ma geno Lubanga ma ocero Yecu ki ikin jo ma oto, ci omiye deyo; en meno gin ma omiyo niyewu ki genwu tye ikom Lubangani.

22Dong wulonyo cwinywu woko odoko maleng pi lubu lok ada, wek wubed ki mar ma goba pe iye macalo utmego; pimeno myero wumare kekenwu mada ki cwinywu ducu. 23Dong kinywalowu odoco, pe ki kodi ma to woko, ento kinywalowu dong ki kodi ma pe to, pi twero me lok pa Lubanga, en lok matye ki kwo ma rii nakanaka; 242 pien yam kicoyo ni,

“Dano ducu obedo calo lum,

deyogi ducu rom ki deyo pa tur lum.

Lum ner,

ature bene oo woko,

25ento lok pa Rwot ma en oloko bedo matwal.”

Lok meno en aye lok me Kwena Maber mayam kitito botwu.