1 Jon 4:7

Cwiny me ada ki me goba

1Lurema, pe wuye kit cwiny ducu, ento kong wutemgi, wunen ka gin cwiny ma oa ki bot Lubanga, pien lunebi mapol ma lugoba dong guket gucito woko i lobo. 2Wubingeyo Cwiny pa Lubanga kit man: cwiny ducu ma tucu ni Yecu Kricito yam obino kun tye ki kom dano, meno Cwiny pa Lubanga. 3Ento cwiny ma pe tucu Yecu kitmeno, pe oa ki bot Lubanga. Meno cwiny pa lakwor pa Kricito mayam wuwinyo pire, ni tye kabino, kombedi dong tye i lobo. 4Lutinona, wun lutino pa Lubanga, dong wutyeko loyogi woko; pien ngat matye i iwuni dit kato ngat matye i lobo. 5Lupwony me goba magi gubedo jo me lobo, en ma omiyo gin ma giloko obedo me lobo, lobo bene winyogi. 6Wan jo pa Lubanga; ngat ma ngeyo Lubanga winyo lokwa, ento ngat ma pe en dano pa Lubanga pe winyo lokwa. Meno aye gin mamiyo wangeyo poko cwiny me ada ki cwiny me goba.

Lubanga aye mar

7Lurema, myero wamare kekenwa, pien mar a ki bot Lubanga, ngat matye ki mar nongo en latin pa Lubanga, dok ngeyo Lubanga. 8Ngat ma pe ki mar, nongo en pe ngeyo Lubanga, pien Lubanga aye mar. 9Gin mayam onyutu mare botwa en ene, Lubanga ocwalo Wode acel keken i lobo wek omii wabed kwo pi en. 10Man en aye mar, pe ni wan wamaro Lubanga, ento en aye omarowa, ci ocwalo Wode me bedo gityer me kwanyo bal woko ki ikomwa. 11Lurema, ka Lubanga dong omarowa kit man, wan bene myero wamare kekenwa. 121 Pe tye dano mo mayam oneno Lubanga; ka wamare kekenwa, ci Lubanga bedo i iwa, mare bene bedo muteggi i iwa.

13Gin mamiyo wangeyo ni wabedo i en, ki en i iwa, pien omiyowa Cwiny ma mere. 14Wan bene waneno, dok wamiyo caden ni, Lubanga Won ocwalo Wode me bedo Lalar me lobo. 15Dano ma tucu ni Yecu en Wod pa Lubanga, Lubanga bedo i en, ki en bene bedo i Lubanga. 16Man omiyo wangeyo mar ma Lubanga tye kwede ikomwa, dok waye ni en marowa.

Lubanga aye mar, ngat ma bedo i mar bedo i Lubanga, Lubanga bene bedo i en. 17Marwa dong otyeko tegi, wek wabedo ki tekcwiny inino me ngolo kop, pien kit macalo Yecu obedo kwede, meno bene en aye kit macalo wan watye kwede i lobo man. 18Lworo mo pe i mar, ento mar ka dong oteggi ryemo lworo woko; pien lworo bino pi lworo pwod, dong dano ma lwor, nongo mare pud peya oteggi. 19Gin ma omiyo wabedo ki mar, pien en okwongo marowa. 20Kace dano mo waco ni emaro Lubanga, kun dag lawote, nongo en lagoba; pien ngat ma pe maro lawote ma en oneno kome, pe twero maro Lubanga ma pe oneno kome. 21Cik man wanongo ki bote ni, dano ma maro Lubanga myero omar lawote bene.