1 Jon 5

Waloyo lobo pi niyewa

1Dano acel acel ma ye ni Yecu en Kricito ma Lubanga oyero, danonu latin pa Lubanga, dok dano mo ma maro ngat ma onywalo latin, maro latine bene. 2Ka wamaro Lubanga, ma walubu cike bene, meno miyo wangeyo ni wamaro lutino pa Lubanga. 31 Pien maro Lubanga en aye gwoko cike. Dok cike bene pe nuruwa, 4pien dano acel acel ma Lubanga onywalo loyo lobo. Gin ma waloyo kwede lobo en aye niyewa. 5Anga mono maloyo lobo? Pe ngat ma ye ni, Yecu aye Wod pa Lubanga?

Caden ikom Kricito

6Yecu Kricito aye ngat mayam obino ki pii ki remo. Pe obino ki pii keken, ento ki pii kacel ki remo bene. 7Dong tye caden adek: 8Cwiny Maleng, pii ki remo; gin adeki ducu lok me cadengi orwate. 9Wan waye lok me caden ma dano gimiyo, ento caden pa Lubanga dit kato meggi woko. Man aye lok me caden pa Lubanga, ma en omiyo ikom Wode. 10Dong ngat ma ye Wod pa Lubanga tye ki caden i iye kene. Ngat ma pe ye Lubanga, nongo omiyo Lubanga odoko lagoba, pien nongo en pe oye lok me caden ma Lubanga omiyo ikom Wode. 112 Caden meno en ene ni, Lubanga dong omiyowa kwo ma pe tum, dok kwo meno tye i Wode. 12Ngat matye ki Wod tye ki kwo ma pe tum, ngat ma pe ki Wod pa Lubanga, pe tye ki kwo ma pe tum.

Kwo ma pe tum

13Acoyo lok man botwu, wun jo ma oye nying Wod pa Lubanga, wek wunge ni wutye dong ki kwo ma pe tum. 14Gin ma jingo cwinywa inyim Lubanga en aye ni, ka walege gin mo kun walubu gin ma en mito, ci en winyo legawa. 15Dong ka wangeyo ni en winyo legawa, wangeyo ni dong watyeko nongo gin ma walego bote.

16Kace ngat mo oneno omine nyo lamine ka tye katimo bal mo ma pe tero dano i to, en bilego Lubanga, ci Lubanga bimiye kwo pi jonu ma balgi pe tero dano i toni. Tye bal ma tero dano i to; pe awaco ni myero waleg Lubanga pi kodi bal macalo meno. 17Gin marac ducu ma dano timo, meno dong bal, ento tye bal mogo ma pe tero dano i to.

18Wangeyo ni dano ma Lubanga onywalo pe dok bedo katimo bal, ento Wod pa Lubanga gwoke maber, miyo Larac pe gude.

19Wangeyo ni wan lutino pa Lubanga, dok wangeyo ni lobo ducu tye ite loc pa Larac.

20Dok wangeyo ni Wod pa Lubanga dong obino, ci omiyowa niang me ngeyo ngat ma en aye ada. Dok wan wabedo i ngat matye ada, pien wabedo i Wode, en aye Yecu Kricito. Man aye Lubanga me ada, dok man en kwo ma pe tum. 21Lutinona, wugwoke pe wuwor jogi.