2 Jon 1

Mot

1Waraga man oa ki bot ladit. Bot mego ma kiyero ki lutinone ma amaro i ada. Pe an keken ento kadi wa jo ducu ma gingeyo lok me ada gimarowu, 2pi lok ada ma bedo icwinywa, dok bene bibedo kwedwa nakanaka.

3Gum ki kica ki kuc ma a ki bot Lubanga Won, ki bot Yecu Kricito ma Wode bibedo kwedwa i ada ki mar.

Lok ada ki mar

4Abedo ki yomcwiny tutwal me nongo ni lutinoni mogo gilubu lok me ada ikit mayam Lubanga Won ocikowa kwede. 51 Kombedi dong alegi in mego, pe macalo dok atye ka coyo boti cik manyen ento pi cik mayam watye kwede con ca nia wa i acaki, ni wan myero wamare kekenwa. 6Man aye mar, ni myero walub cik pa Lubanga; man aye cike, macalo iwinyo nia i acaki, ni omyero wabed ki mar. 7Pien lubwol dano mapol gitye guket woko i lobo, jo ma pe tucu ni Yecu Kricito obino kun tye ki kom dano; kodi danoni gubedo labwol dano, dok bene lakwor pa Kricito. 8Wugwoke kenwu wek gin madong wutyeko tic pire pe orweny woko ki botwu, wek wunong motwu ducu. 9Ngat mo ma pe moko i pwony pa Kricito, ento kato mere akata anyim, dano macalo meno pe tye ki Lubanga; ngat ma moko ikom pwony pa Kricito tye ki jo aryonu ducu, Won ki Wod. 10Ka ngat mo obino botwu ma pe okelo pwony man, pe wujole i ot, dok pe wumote bene. 11Pien ngat ma omote nongo oribe kwede itice marac.

Lok me agiki

12Kadi bed atye ki lok mapol ma myero aco pire botwu, atamo ni myero pe ati ki karatac ki inki, ento atye ki gen me bino ka nenowu, ci dong abilok kwedwu wang ki wang wek yomcwinywa ocobe kakare.

13Lutino pa lameru me amara gumoti.