3 Jon 1

Mot

11

Waraga man oa ki bot ladit. Bot larema Gayo ma amaro i ada. 2Larema ma amaro, alego makato ducu ni Lubanga omii ibed maber i gin ducu, dok omii ki in yot kom, ikit yo acel ma itye kede maber icwinyi bene. 3Abedo ki yomcwiny mada ikare ma utmego mogo gubino kany, ma gumiyo caden ma mako kit me ada, kit macalo in giri ilubu lok ada. 4Pe tye gin mo ma dok miya abedo ki yomcwiny madit makato me winyo ni lutinona gitye kalubu lok ada.

Kipwoyo Gayo pi gwoko welo

5Larema ma amaro, in lagen mada itici ma itiyo pi utmegiwa, makatone bot wele ma pe i ngeyogi, 6ma gumiyo caden ikom mari inyim lwak dano ma guye Kricito. Tim ber ikonygi ikit ma myero, i wotgi i tic pa Lubanga. 7Pien gucako wotgi katic pi Kricito, pe gugamo gin mo ki bot jo ma pe guye Lubanga. 8Pimeno, myero wakonyu kodi jo macalo meno, wek omii wan bene wadok lutic wadigi itito lok me ada.

Diotrepe ki Demetrio

9Dong atyeko coyo lok mogo bot lwak dano muye Kricito, ento Diotrepe, ma mito kete kene me bedo latel wigi, pe owinyo doga. 10Ma omiyo ka abino, ci abipoyo wigi i gin ma en obedo katiyone, kun coko lok mogo maracu ikoma. Pe meno keken en kwero bene jolo utmegiwa, kun bene gengo jo ma mito jologi woko, dok ryemogi woko ki ikin lwak dano muye Kricito.

11Larema ma amaro, pe ilub gin marac, lub gin maber. Ngat ma timo gin maber en dano pa Lubanga; ento ngat ma timo gin marac pud peya oneno Lubanga. 12Jo ducu gumiyo caden maber ikom Demetrio, kadi lok ada obedo caden pire; an bene amiyo mera kumeno, in bene ingeyo ni caden ma amiyo obedo ada.

Mot me agiki

13Atye ki lok mapol ma myero aco boti, ento pe amito ni aco ki kalam ki inki. 14Atye ki gen me neni ikin kare macok, ka wek dong wabilok wang ki wang.

15Kuc obed boti. Luremwa gumoti. Mot luremwa, mot ngat acel acel ki nyinge.