Juda 1

1Waraga man oa ki bot an Juda ma latic pa Yecu Kricito, ma omin Yakobo. 1

Bot jo ma Lubanga olwongogi ma gibedo i mar pa Lubanga Won, ma Yecu Kricito tye ka gwokogi.

2Kica, kuc ki mar myero omede ameda botwu.

Lupwony ma lugoba

3Lurema, onongo atemo ki tekona ducu me coyo botwu waraga pi lok ikom lare ma wan ducu waribe iyeni, ci aneno ni myero aco waraga man me cuko cwinywu wek wulweny matek pi niye mayam dong kimiyo bot jo pa Lubanga tyen kicel keken madong otyeko lok ducu. 4Pien jo mogo ma pe gilworo Lubanga ma gilibe aliba me donyo ikinwa dong gitye, gin jo ma kop mayam kingolo ikomgi dong kinyutu woko con i coc mayam kicoyo. Gin guloko pwony me kica ma Lubanga omiyowa botwa me bedo pi umu timgi me kwele, dok bene miyo gikwero Yecu Kricito ma en aye Rwotwa dok Laditwa acel keken. 52

Kombedi wun jo mayam dong kimiyo wungeyo lok man con, dong amito dok apo wiwu ni, Rwot mayam olaro jo Icrael ki i lobo Ejipt, ento dok lacene en aye otyeko jo ma pe guye ikome en woko. 6Lumalaika mayam pe gugwoko ka locgi ma kimiyo botgi, ento guweko kabedogi woko, en bene otweyogi ogwokogi kama col ki nyor ma rii nakanaka, nio wa i Nino madit me miyo botgi pwod ki ngolokope ikomgi. 73 Ikit yo acelu yam jo Codom ki Gomora ki taun madongo ma ingetgi, gudonyo i tim me kwele ki miti ma pe rwate ki kit ma obedo me anywali pa dano, ci Lubanga otyekogi woko kun miyo botgi pwod ki ngolo botgi kop me can me mac ma pe to, ci gin dong gubedo macalo lanen bot jo ducu ma miyo pwony me goba ni pwodgi bibedo macalo meno.

8Nen kadi bed kitmeno, jonu bene ikit acelu, i lek ma gin leko, gubalo komgi woko, gukwero woko bene bedo ite twero pa Lubanga, kun dok bene giyeto wegi deyogu ayeta. 94 Ento ikare ma Mikael, lamalaika madit, yam olwenyo ki Catan kun pyem kwede pi yiko kom Moses, en yam pe ongwete pi ngolo kop mo me yet, ento oloko bote ni, “Rwot myero ojuki.” 10Ento jo magi giyeto gin ma pe giniang iye, ento gin ma gingeyo malube ki kit ma kiketogi kwede, ma obedo calo lee ma pe ryek, aye tye ka tyekogi woko. 115 Can malit ikomgi, gin jo ma miyo pwony ma ngako dano! Gin gilubu kit pa Kain ma oneko omine ikare ma Lubanga okwero gin ma en otyero pi nyeko, dok giketo tek mada i tam mogo ma pe atir pi mito lim kit macalo yam Balaam otimo me weko cwiny jo Icrael opyete pi timo bal wek egam lim me tyet, dok bene gito woko pi pyemo kit macalo yam Kora ojemo kwede ikom twero ma Lubanga omiyo ki latice Moses. 12Gikelo lewic i karamawu me mar kun bene gicamo matek ma okato kare labongo lworo, dok bene giparo pi komgi keken. Gubedo calo pol ma pii peke iye ma yamo kolo; girom ki yadi ma nyiggi pe nen ikare me cekgi, ma gibedo calo yat ma kiputu lwitgi woko ma pe twero nyako nyiggi mo, gin yam dong guto kiryo. 13Gical bene ki nam ma twage mager, ki tim me bwamigi kelo bwoyo me lewicgi ma bedo calo yugi ma core idye namgu; gin lakalatwe ma wire atata ma Lubanga otyeko yubu kakagi woko i kabedo macol licuc pi kare ma pe gik. 146

Magi gin aye gin mayam Enoka, ma obedo lakwar Adam me abiro, yam otito pire macalo lanebi ni, “Wunen, Rwot bibino ki lwak malaikane maleng mapol ata alip ki alip, 15kangolo kop ikom jo ducu ma timgi racu, ki kamiyo kop wek oloo jo ducu ma pe gilworo Lubanga pi timgi ducu ma pe giyomo cwiny Lubanga, ki pi lok me gero ducu ma lubalo ma pe gilworo Lubanga guloko ikome.”

16Meno gin jo ma bedo ka ngur angura, ma gipyem apyema, kun gilubu mere mitigi me kom keken, doggi bene opong ki loko lok me wake keken, gidworo dano mo wek ginong gin ma cwinygi mito.

Lok me ciko ki pwony

17Ento wun lurema ma amaro, myero wupo ikom lok mayam lukwena pa Rwotwa Yecu Kricito gutito pire con. 187 Gin yam gutito botwu ni, “Ikare me agiki lucac bibedo tye, ma gibilubu mitigi keken, ma pe gilworo Lubanga.” 19Jo ma kitmeno gin aye lukel apokapoka, gin jo ma miti me kom aye telogi, Cwiny pa Lubanga peke botgi. 20Ento wun luwota, wudong matek i niyewu maleng tutwali, kun wulego Lubanga pi tek pa Cwiny Maleng. 21Wugwoke kenwu i mar pa Lubanga, dok wukur kica pa Rwotwa Yecu Kricito ma telowa nio wa i kwo ma pe tum. 22Wubed ki kica ikom jo mogo ma gitye ka cabe acaba, 23wular jo mogo ki ikom pwony ma ngako dano kit macalo olaro jami ki i mac kun wuceyogi woko aceya ki i mac. Wubed ki kica ikom jo mukene kun wulworo bene, dok wukwer bene kit yogi me bal woko.

Lega me pak

24Bot en Ngat matwero gwokowu miyo pe wupoto, dok matwero miyo wucung labongo roc mo inyim deyone ki yomcwiny, 25deyo, dit, loc ki twer ducu obed bot Lubanga en acel keken, ma Lalarwa, pi Yecu Kricito Rwotwa, cake nia con ki con, nio koni, ki kare ma pe gik. Amen.