1 Jon 3

Lutino pa Lubanga

11

Kong wunen kit mar madit ma Won omiyowa, ni kilwongwa ni wan lutino pa Lubanga; man atir, wan watye kumeno! Gin ma omiyo lobo pe ngeyowa, pien onongo yam pe ongeye. 2Lurema, kombedi dong wan lutino pa Lubanga; kit ma wabibedo kwede peya onen, ento wangeyo ni ka en binen, wan bene wabinen calo en, pien wabinene kit ma en tye kwede. 3Dong ngat acel acel matye ki gen man ikom Kricito, lonye kene bedo maleng, macalo Kricito bene leng.

4Dano acel acel ma timo bal nongo turu cik, bal aye turu cik. 52 Wungeyo ni Kricito yam onen wek okwany bal woko; i en kikome bal mo pe iye. 6Ngat mo ma bedo i en pe timo bal; ngat mo ma timo bal nongo pe onene, dok bene nongo pe ongeye.

7Lutinona, pe wuwek ngat mo obwolwu. Ngat ma timo gin matye atir, nongo kite atir, macalo Kricito bene kite atir. 8Ngat ma timo bal, meno nongo dano pa Catan; pien Catan obedo katimo bal nia i acaki piny. Gin ma omiyo Wod pa Lubanga yam onen, en aye pi turu tic pa Catan woko.

9Pe tye ngat mo ma Lubanga onywalo ma timo bal, pien kit pa Lubanga bedo i iye; en pe twero balo, pien nongo Lubanga munywale. 10Man aye gin ma bimiyo kineno jo ma gin lutino pa Lubanga ki jo ma gin lutino pa Catan: ngat ma pe timo gin matye atir pe latin pa Lubanga, kadi wa ngat ma pe maro lawote bene.

Wumare kekenwu

113

Pien man aye lok ma wuwinyo nia i acaki, ni myero wamare kekenwa. 124 Pe wabed calo Kain mayam obedo latin pa Larac, ci oneko omine woko. Gin ango ma omiyo oneke? Pien gin ma en otiyo ducu obedo rac, ento gin ma omine otiyo ducu onongo tye atir. 13Utmegina, pe wubed ki ur ka lobo kwerowu. 145 Wangeyo ni wakato ki i to, wa o dong i kwo, pien wamaro utmegiwa. Dano ma pe ki mar, nongo pud odong i to. 15Ngat ma dag lawote meno lanek, dok bene wungeyo ni, pe tye lanek mo matye ki kwo ma pe tum. 16Man dong miyo waniang ikom mar, pien Kricito omiyo kwo ne pirwa. Wan bene myero wamii kwowa pi utmegiwa. 17Ka ngat mo tye ki jami me lobo man madwong, ce oneno lawote ma piny oloyo, ento okwero miye kony, ci twero waco ningning ni en emaro Lubanga?

18Lutinona, pe wabedu ki mar ilok ma waloko ki dogwa keken, ento wamar dano ki mar me ada manen i tic. 19Man bimiyo wangeyo ni wan jo matye ki ada; ci bimiyo wabibedo ma cwinywa ojing inyime. 20Kace cwinywa ngolo kop loyowa, ci wangeyo ni Lubanga dit kato cwinywa woko, dok ngeyo lok ducu.

Tekcwiny inyim Lubanga

21Lurema, ka cwinywa pe ngolo ni kop oloyowa wabedo ki tekcwiny inyim Lubanga; 22dok bene wanongo gin mo keken ma walege pire, pien wagwoko cike dok watiyo gin ma yomo cwinye. 236 Dong man aye cik ma mere ni, omyero waye nying Wode Yecu Kricito, dok wamare kekenwa, macalo en yam ocikowa. 24Ngat ma gwoko cik pa Lubanga bedo i Lubanga, Lubanga bene bedo i iye. Gin mamiyo wangeyo ni en bedo i iwa, pi Cwiny Maleng ma en omiyo botwa.