1 Jon 2

Kricito lakonywa

1Lutinona, acoyo waraga man botwu wek pe wupot i bal; ento ka ngat mo obalo, watye ki lakony ma cung pirwa bot Lubanga Won, en Yecu Kricito ma kite atir. 2Dok en kikome bene obedo gitum pi kwanyo balwa, pe balwa keken ento kadi wa bal pa jo ma iwi lobo ducu. 3Gin mamiyo waniang maber ni wangeye en aye ni, wan wagwoko cik ma mere. 4Dong dano ma waco ni engeye, ma pe omako cik ma mere, nongo lagoba, ada pe i iye. 5Ento ngat ma lubu loke adada nongo mar pa danoni ikom Lubanga tye ma oromo. Pi lok man watwero niang ada ni watye kacel i wat ki Lubanga: 6ngat ma waco ni etye i en omyero olub kit kwo acelu mayam Yecu olubu. 71

Lurema, an pe atye ka coyo botwu cik mo manyen, ento cik macon mayam watye kwede wa con nia i acaki piny. Cik macon meno en aye lok madong wutyeko winyone ma kitito botwu. 8Kadi bed kumeno, atye ka coyo botwu cik manyen; meno tye ada ki tung bot Kricito ki tung botwu bene, pien colpiny dong tye ka kee woko, ki dero me ada dong tye ka ryeny. 9Dano ma waco ni etye i dero kun dag lawote, nongo pud tye i colpiny aye. 10Ngat ma maro lawote bedo i dero, ma pe iye gin mo mamiyo dano poto i bal. 11Ento ngat ma dag lawote tye i colpiny, dok bene nongo tye kawot ka macol, kun pe ngeyo kama myero ecit iye, pien colpiny nongo oumu wange woko.

12Acoyo waraga man botwu, wun bulu, pien balwu dong kiweko woko pi Kricito. 13Acoyo botwu bene wun wego, pien wungeyo ngat mayam tye con nia i acaki piny. Acoyo botwu wun jo ma pud wutino, pien wuloyo Larac woko.

14Acoyo botwu wun lutino, pien wungeyo Won. Acoyo botwu wun wego, pien wungeyo ngat mayam tye nia i acaki piny. Acoyo botwu wun bulu pien wutek, lok pa Lubanga bedo i iwu, dok bene dong wuloyo Larac woko.

15Pe wumar lobo, kadi gin matye i lobo. Ka dano mo maro lobo, nongo en pe maro Lubanga. 16Pien gin ducu matye i lobo, macalo miti me komwa ma kinywalowa kwede, ki miti marac pi gin ma waneno ki wangwa, ki dok wake ki jami ma watye kwede i kwowa, magi ducu pe gua ki bot Won, ento gucake i lobo kany. 17Lobo tum woko ki mitine ducu; ento ngat ma tiyo gin ma Lubanga mito rii nakanaka.

Lakwor pa Kricito

18Lutinona, man aye dong kare me agiki. Yam kitito botwu ni, lakwor pa Kricito bibino, ento kombedi lukwor pa Kricito dong gubino woko mapol ata; en meno gin ma omiyo wangeyo ni, man dong kare me agiki. 19Gin gua woko ki botwa, pien onongo yam gin pe gubedo dano ma mewa; kono yam gubedo dano ma mewa, kono gumede ki bedo botwa. Ento gin gua woko ki botwa wek onen kamaleng ni gin ducu pe gubedo dano ma mewa.

20Ento wun, Ngat Maleng dong owirowu woko ki Cwiny Maleng, wun ducu dong wutye ki ngec. 21Pe acoyo botwu waraga man pien ni wukwiya lok me ada, ento pien wungeyo, dok wuniang bene ni, pe tye goba mo ma oa i lok ada.

22Dong anga ma lagoba? Ngat ma lagoba en aye dano ma kwero woko ni Yecu pe Kricito ma Lubanga oyero. Meno en aye lakwor pa Kricito, en nongo okwero Won ki Wod. 23Pe tye ngat mo ma kwero Wod ma dok tye gin ki Won. Dano ma oye Wod, nongo tye ki Won bene. 24Wuwek gin ma wuwinyo nia con obed i iwu. Ka inen gin mayam wuwinyo wa con bedo i iwu, wun bene wubibedo i Wod ki i Won. 25Man gin ma en ociko me miyowa, en aye kwo ma pe tum.

26Acoyo man botwu pi jo matwero rwenyowu. 27Ento wun, Cwiny Maleng mayam Kricito owirowu kwede bedo dong i iwu, miyo pe mite ni ngat mo opwonywu; pien Cwiny mayam ki wirowu kwede pwonyowu ilok ducu. En gin me ada, pe goba; macalo yam en opwonyowu, wubed i en.

28Kombedi dong ba, lutinona, wubed i iye, wek ka en dok binen, wabed ki tekcwiny, ma pe lewic makowa inyime ka odwogo. 29Kace wungeyo ni en kite atir, ci myero wuniang ada ni, ngat acel acel ma tiyo gin matye atir nongo Lubanga aye munywalo.