1 Jon 1

Lok me kwo

11

Wan wacoyo botwu lok ikom gin ma obedo tye nia i acaki piny, ma wan ki komwa wawinyo, dok bene waneno ki wangwa. Wanene ada, dok wamulu kome ki cingwa, en Lok me kwo. 22 Kwo meno yam onen woko kamaleng, wan waneno. Wan dong kombedi wabedo cadene, kun watito botwu lok me kwo ma pe tum mayam obedo bot Won, ka dong onen woko botwa. 3Gin ma wan waneno ki ma wawinyo en aye ma watito botwu bene, wek omii wuribe kwedwa. Dong i ribewani, waribe kacel ki Won ki Wode Yecu Kricito. 4Wacoyo lok man wek yomcwinywa ocobe kakare.

Lubanga aye Dero

5Man aye lok me kwena mayam wawinyo ki bot Yecu, ma watye ka titone botwu ni, Lubanga en dero, dok i en pe tye kamo macol kadi ki acel. 6Ka wawaco ni waribe kwede kun pud wawoto i colpiny, nongo wan lugoba, timwa nongo ada bene pe iye. 7Ento ka wawoto i dero, macalo en bene tye i dero, nongo waribe ngat man ki lawote, dok remo pa Wode Yecu Kricito bene lwoko bal ducu woko ki ikomwa.

8Kace wawaco ni wapeke ki bal, meno nongo wabwole abwola kenwa, lok ada nongo pe i iwa. 9Ka watucu balwa, en gene dok kite atir, biweko balwa, dok bilwoko tim maracu matye ikomwa ducu. 10Ka wawaco ni pe wabalo, ci wamiyo Lubanga doko lagoba, loke bene nongo pe i iwa.