1 Jo Korint 15:58

Cer pa Yecu Kricito

1Utmegina, amito poyo wiwu ikom lok me Kwena Maber mayam atito botwu, madong wugamoni, en bene madong niyewu ocung iyeni. 2En lok me Kwena Maber ma keliwu lar, kace wumako matek kit mayam atitiwu kwede, nikwanyo kace onongo wuye menono. 31

Pien yam akelo botwu lok ma pire dit mukwongo, en lok mayam kimiya, ma waco ni, Kricito yam oto pi balwa, kun lubu coc mayam kicoyo iginacoya; 42 dok bene ni kiyike, ka dong kicere woko inino me adeke, kun lubu coc mayam kicoyo, 53 dok ni yam onen bot Petero, ka dok onen bot jo apar wiye aryo ca. 6Ka dok onen bot utmego makato miya abic lawangacel; pol dano mogo ikom jonu pud gitye kwo, kadi bed jo mogo dong guto woko. 7Ka dok onen bot Yakobo, lacene onen bot lukwena ducu. 84 Me agikine ducu, ci bene onen bota, kadi bed abedo calo latin ma kibwogo abwoga. 95 Pien an aye dong pire pe dit matwal ki ikin lukwena ducu, ma onongo pe apore me alwonga ni an lakwena, pien yam aketo can ikom jo pa Lubanga muye Kricito. 10Ento pi kica pa Lubanga omiyo atye kit macalo atye kede ni; kicane matye bota ni yam pe obedo me nonono. Piman yam abedo ka mede kitiyo tic matek tutwal makato jonu ducu; ento pe an aye ma atiyo, ento kica pa Lubanga aye ma otiyo kacel kweda. 11Dong kadi bed onongo an nyo gin jonu, lok ma wan dong watito en enu, dok bene lok ma wun wuye ni en enu.

Cer pa jo ma oto

12Dong kalok me kwenawa tito ni kicero Kricito ki ikin jo ma oto, pingo jo mogo ikinwu giwaco ni cer pa jo ma oto pe tye? 13Kace cer pa jo ma oto pe, ci Kricito bene kara pe kicero. 14Ka Kricito yam pe kicero, ci Kwena ma watito ni dong yo ne peke, kadi wa niyewu bene yo ne peke. 15Medo ki meno, nongo wan bene lucaden me goba ikom Lubanga, pien waloko lok ikom Lubanga ni en ocero Kricito, ento ka dano pe kicero, ci yam Kricito bene pe kicere. 16Pien ka cero jo ma oto peke, nongo Kricito bene yam pe kicero. 17Ka Kricito yam pe kicero, ci kony me niyewu bene peke, nongo pud wutye ibalwu. 18Man dong tyen loke ni, jo ma oto i Kricito nongo dong gurwenyo woko matwal. 19Ka genwa ikom Kricito konyowa i kwo me kare ni keken, ci dong nongo watye marac makato jo ducu.

20Ento i adane, Kricito dong kicero woko ki ikin jo ma oto, en tye macalo wicam mukwongo cek ki ikin jo ma oto. 21Pien dano aye mukelo to, dok bene cer pa jo ma oto dano aye mukelo. 22Pien macalo dano ducu to pi bal pa Adam, en ikit yo acelu jo ducu kibimiyogi kwo pi cer pa Kricito. 23Ento ngat acel acel i kakare: mukwongo Kricito, ma en aye wicam mukwongo cek, ka lacene jo pa Kricito ikare me dwogone. 246 Ka dong agiki piny bio, ma Kricito bimiyo iye ker i cing Lubanga Won, ma nongo dong otyeko turu kit loc ki twero ki tek ducu me cwiny. 257 Pien en myero obed kaloc, nio ka Lubanga biketo lukwore ducu piny ite tyene. 26Lakwor ma kibityeko woko me agiki en aye to. 278 Pien yam kicoyo ni, “Lubanga oketo en obedo lalo jami ducu.” Ka kiwaco ni oketo “jami ducu ite loce,” nen kamaleng ni pe kikwano iye Lubanga kikome, ma oketo jami ducu ite loc pa Kricito. 28Ka dong kityeko keto jami ducu ite loce, en Wod kikome bene kibiketo ite loc pa Lubanga, wek Lubanga dong ocok jami ducu ite loce.

29Eyo, ka jo ma oto pe gibicer, ci dong jo ma kibatija pi jo ma oto ni gibibedo ningning? Kace cero jo ma oto pe tye kadi ki acel, pingo kono dok kibatija pirgi? 30Pingo wan kono wacung ka marac cawa ducu? 31An mera akeme ki to nino ducu, wutmegina; meno awaco botwu atir, pi wake ma atye kwede ikomwu i Rwotwa Yecu Kricito. 329 Ka kono nene alwenyo ki lee mager i Epeco, macalo dano giwaconi, kono kit kony mene ma anongo iye? Ka cero jo ma oto pe, ci ber dong “wacamu, wamatu, pien diki wabito woko.” 33Pe wuwek kibwolwu: “Bedo ki jo maracu balo kit mabeco.” 34Wudwog cen itam ma atir, ci wugik bal woko cut. Pien jo mogo pe gitye ki ngec mo ikom Lubanga. Awaco man wek lewic omakwu.

Kit kom ma dano bicer kwede

35Gwok nyo ngat mo bipenyo ni, “Jo ma oto kicerogi ningning? Gibibedo ki kit kom macalo ningning?” 36In lamingming! Kodi ma icoyo i potoni pe twero nongo kwo nio ka kong oto woko. 37Gin ma icoyo ni obedo mere kodi nono, kadi bed kodi kal, nyo kit kodi mo keken, pe kom ginapita kikome ma bidongoni. 38Ento Lubanga miyo kom ki kodi meno kit macalo yam en oyero, kodi acel acel ki kit kome mapat. 39Ringo kom gin makwo ducu pe rom; ringo dano pat, ringo lee pat, me pa winyi pat, ki me pa rec bene pat. 40Dok bene tye kom me polo ki kom me lobo; ento deyo pa kom me polo tye ki kite mapat, ki deyo pa kom me lobo bene tye ki kite mapat. 41Ceng tye ki deyone, deyo pa dwe bene pat, ki lakalatwe gu bene gitye ki deyo mapatpat; pien lakalatwe bene kitgi patpat, omiyo deyo ma gitye kwede bene tye patpat.

42Tye bene kitmeno ikom cer pa jo ma oto. Kodi ma kicoyo ni en gin ma top; ento ka dong kicero pe dok to. 43Kicoyo ma nongo deyone peke, kicero ma nongo deyone tye; kicoyo ma nongo pud goro, ento kicero ma nongo dong tye ki tek. 44Kicoyo ikom me lobo man, ci kicero ikom me cwiny. Ka kom me lobo man tye, ci kadi wa kom me cwiny bene tye. 4510 Yam kicoyo ni, “Dano mukwongo, Adam, odoko gin makwo”; ento Adam me agikine odoko cwiny mamiyo kwo. 46Kom me cwiny aye pe kong kwongo bino, ento kom me lobo man, ka dong kom me cwiny bino lacen. 47Dano mukwongo yam kicweyo nia ki i apwa me lobo, ento dano me aryone oa ki i polo. 48Jo me lobo gical ki dano ma gia ki i apwa; kitmeno bene jo me polo gical ki dano ma a ki i polo. 49Dong kit macalo waruku cal pa dano ma oa ki i apwa, kitmeno bene wabiruku cal pa dano ma oa ki i polo. 50Man aye gin ma aloko botwu, wutmegina, ni, gin matye ki kom ki remo pe twero leyo ker pa Lubanga, gin ma top bene pe twero leyo gin mo ma pe top. 5111

Kong wuwiny mung man, ni, pe wan ducu wabito, ento wan ducu kibilokowa woko, 52oyotoyot, pi kare manok mo keken, macalo wang ma tur limicmic, ka buriji me agiki bikok. Pien buriji bikok, ka dong kibicero jo ma oto woko kun pe dok gibito, wan bene kibilokowa woko. 53Pien gin ma bale myero oruke ki gin ma pe bale, ki gin ma to myero oruke ki gin ma pe to. 5412 Ka gin ma bale dong oruke ki gin ma pe bale, dok ka gin ma to dong oruke ki gin ma pe to, ka dong miyo lok mayam kicoyo obicobe kakare ni,

“To dong kimwunyo woko, kiloyo woko matwal. 5513

In to, loci dong tye kwene?

In to, kwir ni dong tye kwene?”

56Kwir me to aye bal, dong tek me bal aye cik. 57Ento myero wapwoyu Lubanga ma miyowa loc pi Rwotwa Yecu Kricito. 58Pimeno, wutmegina ma amaro, wucung matek ma pe wuyenge, kun wumede bene ki tic pa Rwot nino ducu, kun wuniang ni, i Rwotwa yelewani pe me nono.