1 Tekwaro 9

Dano ma gudwogo cen ki i Babilon

1Yam kicoyo nying jo Icrael ducu i Buk me Tekwaro me Icrael. Jo Juda yam kiterogi i opii i lobo Babilon me pwodogi pi bal ma gutito pien onongo gungayo wang Lubanga. 21Jo ma gukwongo dwogo cen ki i opii ikom kabedo me dul lobo mayam kimiyo botgi ki i gangigi gin aye jo Icrael kacel ki ajwaki pa Lubanga, Lulevi, ki lutic i Ot pa Lubanga. 3Jo mogo me kaka pa Juda, Benjamin, Epraim ki Manace bene gucako bedo i Jerucalem. 4Gin aye Utai wod pa Amikud, ma wod pa Omri, wod pa Imri, wod pa Bani ki ikin likwayo pa Perej ma wod pa Juda. 5Dok ikin likwayo pa Cela, Acaya ma obedo latin kayo ki ikin lutino awobene. 6Ki ikin likwayo pa Jera, Jeuel ki lukakagi, gin ducu miya abicel ki pyere abongwen nono. 7Ki ikin jo Benjamin Calu ma wod pa Meculam, wod pa Kodavia, wod pa Kacenua, 8Ibneya wod pa Jerokam, Ela wod pa Uji ma wod pa Mikri, ki Meculam wod pa Cepatia ma wod pa Reuel, wod pa Ibinija, 9kacel ki lukakagi ma lubu yalwakgi, dano miya abongwen ki pyere abic wiye abicel. Gin ducu ludito kaka i odi pa kwarigi.

10Ajwaki pa Lubanga ma gudwogo cen ma gubedo i Jerucalem gin aye Jedaya, Jekoyarib, Jakin 11ki Ajaria wod pa Ilkia ma wod pa Meculam, wod pa Jadok, wod pa Merayot, wod pa Akitub, ma en aye ladit maloyo Ot pa Lubanga; 12ki Adaya wod pa Jerokam ma wod pa Packur, wod pa Malkija; ki Maacai wod pa Adiel ma wod pa Jakajera, wod pa Meculam, wod pa Mecilemit, wod pa Imer; 13kacel ki lukakagi bene ma gin ludito kaka i odi pa kwarigi, gin dano alip acel ki miya abiro ki pyere abicel. Gin jo makwiri tutwal ikom kit me tic i Ot pa Lubanga.

Lulevi ma gubedo i Jerucalem

14Lulevi ma ceng gudwogo cen ma gubedo i Jerucalem gin aye Cemaya wod pa Kacub, ma wod pa Ajrikam, wod pa Kacabia, wod pa Merari; 15ki Bakbakar, Kerec, Galal, ki Matania wod pa Mika ma wod pa Jikri, wod pa Acap; 16ki Obadia wod pa Cemaya ma wod pa Galal, wod pa Jedutun; kacel ki Berekia wod pa Aca wod pa Elkana ma obedo ikin gangi pa jo Netopa.

17Lugwok dogola Ot pa Lubanga ma nongo gubedo i Jerucalem gin aye Calum, Akub, Talmon, Akiman ki lukakagi, ma Calum aye laditgi. 18Nio wa ikare meno onongo gubedo lugwok dogola Ot pa Lubanga ma Rwot wok ki iye, itung kunyango. Magi aye lugwok dogola gang pa Lulevi. 19Calum wod pa Kore, ma wod pa Ebiacap, wod pa Kora, kacel ki lukakagi ma i dog ot pa kwarogi, ma gin likwayo pa Kora, gin aye gubedo lugwok dog kema, kit macalo kwarigi yam gubedo ludito ma giloyo gony pa Rwot kun gigwoko dogola me donyo. 20Ikare macon onongo Finekaci wod pa Eleajar en aye obedo ladit ma loyogi; ci Rwot onongo tye kwede. 21Jekaria wod pa Mecelemia en aye onongo lagwok dogola ma donyo i Kema me Rwate. 22Jo magi ducu mayam kiyerogi me bedo lugwok dogola onongo gin romo dano miya aryo ki apar wiye aryo. Kicoyo nyinggi i buk me tekwarogi ki igangigi kama onongo yam gibedo iye. Nongo rwot Daudi ki Camuel ma lanebi aye yam gumoko kwarigi me bedo i dog tic man, pien gubedo dano ma kigenogi tutwal. 23Kitmeno gin ki likwayogi gubedo ludito tic maloyo dogola Ot pa Rwot, en aye ot me kema pa Rwot, kun gitiyo macalo lukurpiny. 24Lugwok dogola kiketogi i kabedo angwen, tung kunyango, tung kupotoceng, tung kumalo ki tung kupiny. 25Lukakagi ma i gangigi aye onongo gibino me leyo tic kun gikonye keken gi pi nino abiro ma giloke aloka kwedgi. 26Pien lugwok dogola madito onongo gibedo kunu kare ducu, gin aye Lulevi ma giloyo kicika odi matinone ki odi kano lim ma i Ot pa Lubanga. 27Odi butugi orumu Ot pa Lubanga, pien tic me kuru piny obedo meggi, gin bene gigwoko layab me yabo ot odiko ki odiko.

Lulevi mukene

28Jo mogo ikin gi onongo gigwoko jami ma kitiyo kwedgi i Ot pa Lubanga. Ikare ducu ma kidwokogi cen ki ma kikwanyogi woko, onongo gikwanogi. 29Jo mukene ikin gi kiketogi me loyo jami ma bedo i Ot pa Lubanga, ki jami tic maleng ducu, dok giloyo bene moko kwon mapwote, ki kongo bwino, ki moo, ki odok eceta, ki angwece. 30Jo mukene ma gin lutino pa ajwaki giyubu jami me aruba pi angwece. 31Matitia, dano acel ma ikin Lulevi, ma en latin kayo pa Calum ma jo Kora, en aye obedo lalo tic me tedo mugati ma apadani, pien en dano ma gene. 32Lukakagi mogo ma gin jo Kokat giloyo mugati ma kiketo inyim Rwot; ticgi obedo me yubune Cabit ki Cabit.

33Magi aye luwer, ma gin ludito kaka i odi pa kwarigi; yam gibutu i kicika odi ma tinone ma i Ot pa Lubanga, ma pe gitiyo tic mukene, pien yam gibedo i dog tic dyeceng ki dyewor. 34Magi aye ludito kaka i odi pa kwarigi ma i kaka pa Lulevi, ma lubu yalwakgi, gin aye ludito mayam gibedo i Jerucalem.

Tekwaro pa Caulo

(1 Tek 8:29-38)

35Jeyel ma won Gibeon yam bedo i Gibeon; nying dakone Maaka, 36latin awobine me kayo en Abudon, ka dok Jur, Kic, Baal, Ner, Nadab, 37Gedor, Akio, Jeker, ki Miklot; 38Miklot aye won Cimeam. Jo magi bene yam gubedo ma gukeme ki lukakagi ma gibedo i Jerucalem, kacel ki lukakagi. 39Ner onywalo Kic, Kic onywalo Caulo, Caulo onywalo Yonacan, Malkicua, Abinadab ki Ecibaal. 40Yonacan onywalo Meribaal, Meribaal onywalo Mika. 41Lutino awobe pa Mika gin aye Piton, Melek, Takrea ki Akaj. 42Akaj onywalo Jara, Jara onywalo Alemet, Ajimavet ki Jimri. Jimri onywalo Moja, 43Moja onywalo Binea; ma wode Repaya, ma wode Eleaca, ma wode Ajel. 44Ajel yam tye ki lutino awobe abicel, ma nyinggi ene: Ajrikam, Bokeru, Icmael, Cearia, Obadia ki Kanan. Jo magi aye lutino awobe pa Ajel.