1 Tekwaro 10

To pa Caulo ki awobene

(1 Cam 31:1-13)

1Ikare meno jo Piliciti gulwenyo ikom jo Icrael. Ci jo Icrael guringo woko ki inyim jo Piliciti, ci kineko jo Icrael mapol iwi got Gilboa. 2Jo Piliciti guringo korgi gudingo kor Caulo ki awobene, ci guneko Yonacan, Abinadab ki Malkicua, ma gin ducu awobe pa Caulo. 3Lweny ogeto matek i kor Caulo, ci wegi atero gucele woko, guketo ret ikome. 4Ci Caulo owaco bot lating jami lwenye ni, “Wot pala lucwani woko, i coba kwede pil, wek jo ma pe kilirogini, ma gin pe ngeyo Lubanga pe gubin ikoma, koni miyo gibedo ki wayu me yomcwiny ikoma.” Ento lating jami lwenye pe oye, pien lworo omake matek, omiyo Caulo okwanyo pala lucwane kikome ci opoto ogure kwede kekene. 5Ka lating jami lwenye oneno ni Caulo dong oto woko, ci en bene opoto ogure kene ki pala lucwane, oto woko. 6Kitmeno Caulo ki awobene adeki kacel ki jo me ode ducu, guto woko lawangacel ci pe obedo ki ma laloc. 7Ka jo Icrael ducu ma onongo gibedo i nota me Jejreel guwinyo ni mony pa jo Icrael guringo woko, ki dok ni Caulo ki awobene kinekogi woko, ci guringo guweko taun gi woko; ci jo Piliciti gubino gucako bedo i taun gi magu ducu.

8Orwone jo Piliciti gubino ka lunyu bongi ki ikom jo ma kinekogi, ci gunongo kom Caulo ki kom awobene adeki ikom got Gilboa. 9Ci gulunyo jami lweny pa Caulo ki ikome, gucito kwede, wa ki wiye bene ma gutongo, ka gucwalo kwena oromo i lobo pa jo Piliciti ducu pi tero lok me yomcwiny bot jogigi ki bot lwakgi ducu. 10Guketo jami lweny pa Caulo i ot jogigi; ka dok guguro wiye i ot jok Dagon. 11Ento ka jo Jabec-gilead ducu guwinyo gin ma jo Piliciti gutimo ikom Caulo, 12ci oteka lwenygi ducu gua, gukwanyo kom Caulo woko ki kom awobene, guterogi wa i Jabec. Ka guyiko cogogi ite yat kworo matye i Jabec, ci gurii kec pi nino abiro. 131

Kitmeno Caulo oto pien pe obedo lagen; en onongo ongayo wang Rwot woko, pe otiyo gin ma Rwot ociko, dok bene owoto katyet bot lakor tipu pi yero nyime, 14ma pe dong openyo dog Rwot. Pieno omiyo Rwot oneke woko, ci okwanyo ker omiyo bot Daudi ma wod pa Yece.