1 Tekwaro 11

Daudi odoko rwot me Icrael kacel ki me Juda

(2 Cam 5:1-10)

1Lacen jo Icrael ducu gucoke bot Daudi i Kebron, ci guwaco ni, “Nen ba, wan aye wa cogo komi ki ringo komi. 2Ikare macon ca, wa ikare ma onongo Caulo aye rwot ma loyowa, in yam i telo wi jo Icrael ka gicito kalweny, dok i dwokowa paco bene, ci Rwot Lubangani bene nene owaco boti ni, ‘In aye i bibedo lakwa lwaka jo Icrael, dok in i bibedo laker ma loyogi.’” 3Kitmeno ludongo pa jo Icrael ducu gubino bot rwot i Kebron. Rwot Daudi oketo gicike kwedgi i Kebron inyim Rwot, ci guwiro Daudi obedo rwot maloyo jo Icrael, kit mayam Rwot oloko ki i dog Camuel.

Daudi omayo got Cion

41

Daudi ki jo Icrael ducu gucito i Jerucalem, ma en aye Jebuc, kalweny ikom jo Jebuc ma gibedo i lobo kunu. 5Jo ma gibedo i Jebuc onongo guwaco bot Daudi ni, “In pe i bidonyo kany.” Ento Daudi ocito omayo gogo me Cion woko, ci odoko gang kale. 6Daudi owaco ni, “Dano ma bikwongo neko jo Jebuc, en aye bibedo ladit ma lawimony.” Ci Joab wod pa Ceruya ayee otelo wi mony okwongo tero monye kunu ci en odoko laditgi. 7Daudi ocako bedo i cel gogo, ma omiyo kilwongo ni, “Gang kal pa Daudi.” 8Daudi ogero taun madit orumu woko liking, cake ki i Millo. Joab ogero odi mukene ma i taun madit mayam obale. 9Daudi omede odoko dit tutwal, pien onongo Rwot me mony aye tye kwede.

Twoni oteka lweny pa Daudi

(2 Cam 23:8-39)

10Magi aye gin ludito ki ikin twoni oteka lweny pa Daudi, jo mayam gumiyo kony matek i kere, kacel ki jo Icrael ducu, ci guketo en me bedo rwot, kit ma onongo Rwot Lubanga yam oloko ikom Icrael. 11Man aye lok kom twoni oteka lweny pa Daudi: Jacobeam ma jo Kakmon en aye ladit pa jo adeki; en yam okato ki tonge ikom jo miya adek, ci onekogi woko ducu lawangacel. 12Ngat ma lubu en ki ikin twoni oteka lweny adeki en aye Eleajar wod pa Dodo ma jo Akoki. 13En obedo kacel ki Daudi i Pac-dammim ikare ma jo Piliciti gucoke kalweny kunu. Poto onongo tye kunu ma cayiri ocek iye ma bup, ci lwak ocako ringo woko ki inyim jo Piliciti. 14Ento en ocamo co ci ocung i dye poto pi laro jo Icrael, ci ocako neko jo Piliciti, ci Rwot olarogi ki loc madit tutwal.

15Jo adek ki ikin ludito pyere adeki gulor piny wa i got kama Daudi bedo iye i boro Adullam; onongo mony pa jo Piliciti ogony i nota Repaim. 16I karenu onongo Daudi tye i ka kanene, ki cel gogo pa Lupiliciti onongo tye i Beterekem. 17Daudi oloko ki miti madwong ni, “Kono ngat mo ocito otwomo pii ki iwang it me Beterekem matye cok ki dog gang ca, ci omiya amato, kono ber mada!” 18Ci twoni oteka lweny adeki gucito gubaro dye gony pa jo Piliciti, gutwomo pii ki iwang it ma i Beterekem matye cok ki dog gang ca, ci gukelo bot Daudi. Ento Daudi pe omato; otingo oliyo piny inyim Rwot pi gityer amata, 19kun waco ni, “Pe obed kumeno ki inyim Lubangana, an pe myero atim kit man. An aye dok amato remo pa joni? Pien gukelo pii pi dyero komgi.” En aye lok ma omiyo pe omato pii meno. Magi aye gin madito ma twoni oteka lweny adeki yam gutimo.

20Abicai omin Joab onongo ladit ikin jo pyere adeki. Otingo tonge olwenyo ikom jo miya adek ci onekogi woko ducu, ma omiyo nyinge oywek ma mito rom arom ki pa jo adek ca. 21Pieno Abicai olimo yweka madit ki ikom jo pyere adeki, ci odoko ladit wi monygi; ento pe olimo rwom pa jo adek ca.

22Ki Benaya wod pa Yekoyada obedo twon oteka ma i Kabjeel, latim gin madito; en oneko awobe aryo ma gin twoni labwor me Moab. En bene olor odonyo i bur ci oneko iye labwor ikare ma pee ocwer mapek. 23Ka dok oneko Laejipt mo, dano ma kome pek ma bore romo puti abiro ki nucu. Laejipt meno onongo tye ki tonge i cinge marom ki rii yat lacwe bongo; ento en Benaya ocito bote ki odoone, ci oyutu tong woko ki i cing Laejipt, ka oneke kwede woko ki tongenu. 24Benaya wod pa Yekoyada otimo gin madito kitmeno, omiyo nyinge olimo yweka madit ma mito rom aroma ki pa twoni oteka lweny adeki. 25Nyinge oywek ikin jo pyere adeki, ento pe olimo rwom pa jo adek ca. Daudi oketo en obedo ladit pa jo ma gwoko en rwot.

26Twoni oteka lweny ma ikin lumony gin aye Acael ma omin Joab, Elkanan wod pa Dodo me Beterekem, 27Camot me Karod, Kelej ma jo Palti, 28Ira wod pa Ikec me Tekoa, Abiejer me Anatot, 29Cibekai ma Lakucat, Ilai ma jo Akoki, 30Makarai me Netopa, Keled wod pa Baana me Netopa, 31Itai wod pa Ribai me Gibea pa jo Benjamin, Benaya me Piraton, 32Kurai ma bedo i nota ora me Gaac, Abiel me Arba, 33Ajimavet me Bakarum, Eliaba me Caalbon, 34Kacem ma jo Gijon, Yonacan wod pa Cage ma jo Karar, 35Akiam wod pa Cakar ma jo Karar, Elipal wod pa Ur, 36Keper ma jo Mekerat, Akija ma jo Pelon, 37Kejero me Karmel, Naarai wod pa Ejibai, 38Joel omin Natan, Mibkar wod pa Agri, 39Jelek ma jo Ammon, Nakarai me Beerot ma lating jami lweny pa Joab wod pa Jeruya, 40Ira ma jo Itri, Gareb ma jo Itri, 41Uria ma jo Kit, Jabad wod pa Aklai, 42Adina wod pa Cija ma jo pa Reuben, ma ladit ikin jo pa Reuben, en aye obedo ki jone pyere adek bene; 43Kanan wod pa Maaka ki Yocapat ma jo Mitan, 44Ujia ma jo Acitera, Camma ki Jeyel ma awobe pa Ketam me Aroer, 45Jediael wod pa Cimri ki omine Joka, ma Latiji, 46Eliel ma jo Makavi, ki Jeribai ki Jocavia ma awobe pa Elnaam, ki Itima ma jo Moab, 47Eliel ki Obed, ki Jaciel ma jo Mejoba.