1 Tekwaro 12

Lukony Daudi i Jiklag

1Daudi oringo ayela pa rwot Caulo wod pa Kic ci ocito wa Jiklag. Ikare ma en tye kunu, jo ma gin twoni oteka lweny ma gubedo kakonye i lweny gubino bote. 2Gin wegi atum, mayam gicelo atero nyo gibayo kidi ki cinggi ma lacuc onyo ma lacam. Gin onongo jo pa Benjamin, ma i kaka pa Caulogi. 3Laditgi obedo Akiejer, ka dok Yoaci gin aryo ducu lutino pa Cema me Gibea; ka dok Jejiel ki Pelet ma awobe pa Ajimavet; ki Beraka, Yeko me Anatot. 4Icmaya me Gibeon, twon oteka ma ikin jo pyere adek ca, dok en ladit ma loyogi. Gin aye Jeremia, Jakajiel, Yokanan, Jojabed me Gedera, 5Elujai, Jerimot, Bealia, Cemaria, Cepatia ma jo Karup; 6Elkana, Icia, Ajarel, Joejer ki Jacobeam, ma gin jo pa Kora, 7ki Joela ki Jebadia, ma gin awobe pa Jerokam me Gedor.

Oteka lweny ma gua ki i kaka pa Gad

8Oteka ma gin ongiyo ki lweny ma ikin jo pa Gad gugware gucito bot Daudi i ka kanene ma i tim. Oyita lweny ma gingeyo lweny ki kwot ki tong, ma wanggi nen calo wang labwor, ma gidwir calo til ma i godi. 9Gin aye: Ejer ma laditgi, me aryone Obadia, me adeke Eliab, 10me angwene Micimana, me abice Jeremia, 11me abicele Atai, me abirone Eliel, 12me aborone Yokanan, me abongwene Elijabad, 13me apare Jeremia, me apar wiye acele Makibanai. 14Jo Gad magi ducu gin ludito maloyo mony; ludito matinone giloyo jo miya, ki maditone loyo jo alip. 15Magi gin aye jo mayam gungolo Jordan i dwe mukwongo, ikare ma onongo piine opong woko libyeny nio wa i tura ci guryemo jo ma gitye i nota ducu, ma tung kunyango ki tung kupotoceng.

Oteka lweny ma gua ki i kaka pa Benjamin ki Juda

16Ka dok jo pa Benjamin mogo, ki pa Juda, gubino bot Daudi i ka kanene. 17Daudi okato woko kajolo wigi, kun waco botgi ni, “Kace wubino bota ki cwiny me wat pi konya, ci abibedo kwedwu ki yomcwiny. Ento kace wubino kaumu wanga wek wumiya bot lumeroka, kadi bed an cwinya leng, ci Lubanga pa kwariwa myero onen ci ongol gire kop ma opore.” 18Ci Cwiny pa Lubanga obino ikom Amacai, ma en aye ladit pa jo pyere adek ca, ci ocako owaco ni,

“Wan wa lwaki, in Daudi,

wabibedo kwedi, in wod pa Yece.

Kuc, kuc obed kwedi,

kuc bene obed ikom lukony in!

Pien Lubangani aye tye kakonyi.”

Ka Daudi ojologi, ci oketogi gubedo ludito me buca monye.

Oteka lweny ma gua ki i kaka pa Manace

19Jo pa Manace mogo guloke tung bot Daudi ikare ma obino ki jo Piliciti kalweny ikom Caulo. Kadi bed kumeno en pe omedo ki konyogi pien ludito pa jo Piliciti guyubu lok ikome, ci guryeme woko, kun giwaco ni, “Kace en biloke dok bot ladite Caulo, ci dong wato woko.” 20Jo pa Manace ma gudonyo bote ikare ma en cito i Jiklag gin ene: Adina, Jojabad, Jediael, Mikael, Jojabad, Eliu ki Jiletai, ma gin aye onongo ludito maloyo wi jo alip ki i Manace. 21Gukonyo Daudi ki lweny ikom buca mony pa luyak; pien onongo gin ducu twoni oteka lweny ma ludito me mony. 22Dano gubedo kabino kakonyo Daudi nino ki nino, nio ka gudoko cwar min mony madit, marom ki mony pa Lubanga.

Mony ma Daudi obedo kwede i Kebron

23Magi gin aye wel dul buca mony mayam gubino ki gilweny i cinggi bot Daudi i Kebron pi dwoko ker pa Caulo i cing Daudi, kit mayam Rwot owaconi. 24Jo pa Juda ma wegi kwot ki tong onongo giromo alip abicel ki miya aboro ma kimiyo jami lweny i cinggi pi lweny. 25Ki jo pa Cimon ma twoni oteka lweny alip abiro ki miya acel. 26Jo pa Levi alip angwen ki miya abicel. 27Ka dok Yekoyada maloyo jo me ot pa Aron obino ki jo alip adek ki miya abiro. 28Jadok latin awobi ma twon oteka obino ki ludito wi mony pyere aryo wiye aryo ma i dog ot pa wone kikome. 29Jo pa Benjamin ma lukaka pa Caulo bene gubino maromo alip adek; jo mapol ki ikomgi yam kong gubedo kacwako kor ot pa Caulo nio wa ikare meno. 30Jo pa Epraim gubino maromo alip pyere aryo ki miya aboro, ma gin oteka lweny ma nyinggi oywek i dog odi pa kwarogi. 31Jo ma i nucu kaka pa Manace gubino maromo jo alip aboro ma kiyerogi ki nyinggi wek gubin kaketo Daudi obed rwot. 32Jo pa Icakar, jo ma onongo gingeyo kare dok gingeyo gin ma myero Icrael otii, bene gubino ki ludito miya aryo ki lukakagi ducu ma ite locgi. 33Jo pa Jabulon bene gubino ki jo ma gunyebe ki lweny maromo alip pyere abic, ma guruke pi lweny ki jami lwenygi ducu pi konyo Daudi ki cwinygi acel. 34Jo pa Naputali bene gubino ki ludito wi mony maromo alip acel ma gitye ki danogi alip pyere adek wiye abiro ma gutingo kwot ki tong. 35Jo pa Dan bene gubino ki jo alip pyere aryo wiye aboro ki miya abicel ma guyube pi lweny. 36Jo pa Acer bene gubino ki jo ma gunyebe ki lweny maromo alip pyere angwen, ma dong guyube pi lweny. 37Jo pa Reuben, jo pa Gad ki nucu kaka pa Manace ma gua loka Jordan bene gubino maromo jo alip miya acel ki pyere aryo ma guruke ki jami lwenygi ducu.

38Lulweny magi ducu gurwayo ma guryeyo ki kore, gubino kwede wa i Kebron ki cwiny mukemo keto Daudi rwot maloyo Icrael ducu. Kitmeno jo Icrael ducu mudonge gubedo ki cwiny acel me keto Daudi obed rwot. 39Ci gubedo ki Daudi kunu pi nino adek kun gicamo, gimato bene, pien onongo utmegigi gutyeko yube pirgi. 40Dok jo ma gicok kwedgi bene, ma gua wa ki i lobo Icakar ki Jabulon ki Naputali gucom ki cam ma guketo iwi kana, kinaga, kana madito ki twoni pur; ma gukelo lwak moko kwon madwong, ki pok otini, ki dog tuga olok mutwone, ki kongo bwino, ki moogu, ki twoni ki romi, pien onongo yomcwiny tye i Icrael.