1 Tekwaro 13

Daudi ocito kaomo Canduk me Gicike nia ki i Kiriat Jearim

(2 Cam 6:1-11)

1Daudi yam oyubu lok ki ludito maloyo buca mony me jo alip ki buca mony me jo miya, ki ludito ma i dul acel acel. 2Ci Daudi oloko ki i kacoke pa jo Icrael ducu kun waco ni, “Kace bedo ber botwu, ma Rwot Lubangawa bene mito, ci wacwalu kwena orom kin utmegiwa ma gudong i lobo Icrael ducu, kacel ki ajwaki ki Lulevi ma i taun ma gitye ki lobo me kakwatgi, wek gubin gucoke kacel botwa. 3Ci wek dong wakelu Canduk pa Lubangawa botwa, pien ikare pa Caulo yam watenyo woko ata.” 4Ci kacoke ducu oyeni kitim kitmeno, pien loke onen atir bot lwak ducu. 51Ci Daudi ocoko jo Icrael ducu cake ki i Cikor ma iwang lobo me Ejipt nio wa i yoo ma donyo i Kamat, pi kelo Canduk me Gicike ki i Kiriat-jearim. 62Daudi ki jo Icrael ducu gucito i Baala, ma en aye Kiriat-jearim matye i Juda, kaomo Canduk me Gicike woko ki kunu, en aye Canduk ma kilwongo ki nying Rwot ma bedo iwi komker malo ka wi lukerubi. 7Ci gutingo Canduk me Gicike iwi gadigadi manyen, gukelo woko nia ki i ot pa Abinadab, ci Uja ki Akio gubedo kaleko twoni ma ywayo gadigadi. 8Daudi ki jo Icrael ducu gubedo kayare ki myel ki yomcwiny inyim Lubanga ki kero komgi ducu, ki wero wergu, ki goyo opuk, nanga, ajaa, atego agoya ki kutu tum.

9Ka guo i laro moyo pa Kidon, Uja ocwalo cinge pi mako kom Canduk, pien onongo twoni gucato. 10Ci kiniga omako Rwot ikom Uja, ci oneke woko pien onongo oketo cinge ikom Canduk; ci en oto woko kunu inyim Lubanga. 11Ci kiniga omako Daudi, pien Rwot otuge ikom Uja; ma omiyo kabedo meno kilwongo ni Perej-uja nio wa onyo. 12Daudi obedo ki lworo ikom Lubanga inino meno; kun waco ni, “Abitero Canduk me Gicike wa paco bota ningning?” 13Kitmeno omiyo Daudi pe otero Canduk wa i gangkal pa Daudi, ento ongak kwede woko i ot pa Obed-edom ma jo Gat. 143Canduk me Gicike obedo i ot pa Obed-edom pi dwe adek; ci Rwot omiyo gum bot Obed-edom ki jone ducu.