1 Tekwaro 14

Tic ma Daudi otiyo i Jerucalem

(2 Cam 5:11-16)

1Kiram rwot me Turo yam ocwalo kwena bot Daudi, kun miyo bao yat cedar ki lupaa godi bene ki lupaa bao me gero ot pa Daudi. 2Omiyo Daudi oniang ni Rwot otyeko moko en me bedo rwot maloyo Icrael, dok ni otyeko miyo kere obedo ki deyo madwong pi pilo wi jone jo Icrael.

3Daudi dok omede ki nyomo mon i Jerucalem, ci onywalo awobe ki anyira mukene. 4Magi aye nying lutino ma Daudi onywalogi i Jerucalem. Camua, Cobab, Natan, Solomon, 5Ibar, Elicua, Elpelet, 6Noga, Nepeg, Japia, 7Elicama. Beeliada ki Elipelet.

Daudi oloyo jo Piliciti

(2 Cam 5:17-25)

8Ka jo Piliciti guwinyo ni Daudi dong kityeko wire odoko rwot maloyo jo Icrael ducu, ci lumonygi ducu gucito kamako Daudi; ento Daudi owinyo pirgi, ci okato woko kalweny ikomgi. 9Onongo jo Piliciti gubino gumonyo nota Repaim. 10Ci Daudi ocako penyo dog Lubanga ni, “Ber acit kalweny ikom jo Piliciti? Ci i bimiyogi i cinga?” Ci Rwot ogamo doge ni, “Citi, abimiyogi i cingi.” 11Daudi ocito wa i Baal-perajim, ci oloyogi ki kunu, ci owaco ni, “Lubanga otyeko loyo lumerok woko kun wok ki i cinga, macalo lalele mucore.” Ma omiyo nying kabedo meno kilwongo ni, Baal-perajim. 12Jo Piliciti guringo gutenyo cal jogigi ingegi, ci Daudi omiyo twero me wangogi woko.

13Jo Piliciti dok gudwogo gumonyo nota meno. 14Ka Daudi dok openyo dog Lubanga, ci Lubanga ogamo ni, “Pe i bicito ikomgi atir. Wot i man ngegi ci ipot ikomgi ki kama okemo yadi owak. 15Kace iwinyo kor tyen dano ma gitye kawot lirukruk ma winye wa iwi yadi owak, ci dong i cit kalweny, pien nongo an Lubanga dong atelo nyimwu pi neko mony pa jo Piliciti woko.” 16Ci Daudi otiyo kit ma Lubanga ocike kwede, ci guneko mony pa jo Piliciti nia ki i Gibeon nio wa i Gejer. 17Ci nying Daudi oywek oromo i lobo ducu, ci Rwot omiyo lworo omako rok ducu ikom Daudi.