1 Tekwaro 15

Yube me kobo Canduk me Gicike

(2 Cam 6:12-22)

1Daudi ogero odine i taun madit pa Daudi, ci oyubu kabedo pi Canduk me Gicike, ocako guru kema pire. 21 Ci Daudi owaco ni, “Dano mukene pe bitingo Canduk me Gicike, ento Lulevi keken, pien Rwot yam oyerogi pi tingo Canduk pa Rwot ki pi tic bote matwal.”

3Daudi olwongo jo Icrael ducu i Jerucalem, pi kelo Canduk pa Rwot i kabedone ma en oyubu pire. 4Ci Daudi olwongo likwayo pa Aron ki Lulevi kacel. 5Ikin likwayo pa Kokat ma Lalevi gin ene: Uriel ma laditgi, kacel ki utmegine miya acel ki pyere aryo; 6ikin likwayo pa Merari, Acaya ma laditgi, kacel ki utmegine miya aryo ki pyere aryo; 7ikin likwayo pa Gercon, Joel ma laditgi, kacel ki utmegine miya acel ki pyere adek; 8ikin likwayo pa Elicapan, Cemaya ma laditgi, kacel ki utmegine miya aryo; 9ikin likwayo pa Kebron, Eliel ma laditgi, kacel ki utmegine pyere aboro; 10ikin likwayo pa Ujiel, Aminadab ma laditgi, ki utmegine miya acel ki apar wiye aryo. 11Daudi dok olwongo ajwaki pa Lubanga Jadok ki Abiatar, ki Lulevi magi: Uriel, Acaya, Joel, Cemaya, Eliel ki Aminadab, 12ci Daudi owaco botgi ni, “Wun aye ludito kaka ma i dog odi pa kwarowu ma jo pa Levi; wulonye kekenwu wubed maleng, wun kacel ki utmegiwu, wek wukel Canduk pa Rwot Lubanga pa Icrael, i kabedo ma atyeko yubune pire. 13Ikare mukwongo ca Rwot Lubanga otuge ikomwa ki kiniga ci opwodowa, pien pe wun aye nongo myero wutingo ikare meno, pien onongo pe wa penyo doge ikit ma Cik mito.” 14Kitmeno ajwaki pa Lubanga ki Lulevi gulonye keken gi pi kelo Canduk pa Rwot Lubanga pa Icrael. 152Pieno Lulevi gucako tingo Canduk me Gicike, gulebo ki tale iwi gwokgi, kit mayam Moses ocikogi kwede, macalo Rwot owaco.

16Daudi dok ociko ludito pa Lulevi pi yero utmegigi wek gubed luwer ma gibigoyo jami wer malongo; nanga ki opuk ki atego agoyagu, dok bene me wer ki dwon malongo ki yomcwiny. 17Kitmeno Lulevi gucako yero Eman wod pa Joel, ka dok Acap wod pa Berekia ki ikin utmegine. Ikin likwayo pa Merari guyero utmegigi magi, Etan wod pa Kucaya; 18ka dok guyero utmegigi ma i dul me aryo, gin aye Jekaria, Jajiel, Cemiramot, Jekiel, Uni, Eliab, Benaya, Maaceya, Matitia, Elipeleku ki Mikneya, ki lugwok dogola Obed-edom ki Jeyel. 19Luwer magi Eman, Acap ki Etan ticgi obedo me goyo atego mola; 20Jekaria, Ajiel, Cemiramot, Jekiel, Uni, Eliab, Maaceya ki Benaya ticgi obedo me goyo nanga ikit me Alamot; 21ento Matitia, Elipeleku, Mikneya, Obed-edom, Jeyel ki Ajajia gin ticgi obedo me telo wer ki opuk ikit me Ceminit. 22Kenania, ma en aye latelwer pa Lulevi, tice me nyutu kit me wer pien en onongo ladiro i wer. 23Berekia ki Elkana yam gin lugwok dogola me Canduk me Gicike. 24Cebania, Jocapat, Netanel, Amacai, Jekaria, Benaya ki Eleajar, ma gin ducu ajwaki pa Lubanga, ticgi me kutu tum inyim Canduk me Gicike, Obed-edom ki Jekia gin bene gubedo lugwok dogola me Canduk me Gicike.

Kitero Canduk me Gicike i Jerucalem

25Kitmeno Daudi ki ludongo pa jo Icrael, ki ludito mony maloyo jo alip, gucako wot me cito kaomo Canduk me Gicike pa Rwot nia ki i ot pa Obed-edom ma cwinygi yom matek. 26Gutumu twoni abiro ki nyogi romi abiro, wek Lubanga okony Lulevi ma gutingo Canduk me Gicike pa Rwot. 27Daudi onongo oruke ki jor me camanini mabere, kit macalo Lulevi ducu ma gutingo Canduk me Gicike bene guruke, kacel ki luwer, ki Kenana ma latelwer pa luwer ducu. Daudi onongo otweyo pyere ki epod me camanini. 28Ci jo Icrael ducu gukelo Canduk me Gicike pa Rwot kitmeno, ma giwayo ma rwate ki koko bila, koko tum, ki koko atego agoyagu, kun giwero ki nanga ki opukgu malongo.

29Ka Canduk me Gicike pa Rwot obino wa i gangkal pa Daudi, ci Mikal ma nya pa Caulo obolo wange woko ki iwang dirica oneno rwot Daudi ka myelo ma cwinye yom, ci obedo kacayo Daudi ki i cwinye.