1 Tekwaro 16

1Gukelo Canduk me Gicike wa i paco, ci gucibo i kema ma Daudi oyubu pire; ka gucako tyero gitum awanga ki gityer me berbedo inyim Lubanga. 2Ka Daudi otyeko tyero gitum awangagu ki gityer me berbedo, ci olamo gum ikom lwak i nying Rwot. 3Lacen ocako poko jami ki jo Icrael ducu, co wa ki mon; kun dano acel acel kimiye mugati acel, ki ringo angida, ki poki olok mutwone.

4Dok oketo Lulevi mogo pi bedo lutic inyim Canduk me Gicike, pi koro nying Lubanga, ki pi pwoyo en ki me pako Rwot Lubanga pa Icrael. 5Acap aye laditgi, ki me aryone ngat malube obedo Jekaria, Jeyel, Cemiramot, Jekiel, Matitia, Eliab, Benaya, Obed-edom ki Jeyel, gin aye lugo nanga ki opuk. Acap onongo goyo atego agoya, 6ki Benaya ki Jakajiel ma ajwaki pa Lubanga gin aye lukut tum teretere inyim Canduk me Gicike pa Rwot. 7Ikare meno en aye nino ma Daudi okwongo ciko ni Acap ki utmegine gubed kawero wer me pwoyo Rwot.

Wer me pwoc pa Daudi

(Jab 105:1-15; 96:1-13; 106:1,47-48)

8Wumii pwoc bot Rwot, wulwong nyinge,

wumii tice ma en otiyo ongene i rok ducu!

9Wuwer bote wer me pako en,

wutit bene pi tice me aura ducu!

10Wuket deyo ikom nyinge maleng;

jo ma yenyo Rwot cwinygi obed yom!

11Wubin bot Rwot wek wunong teko ki bote,

wubed inyime nakanaka.

12Wupo ikom tic me aura ma en ceng otiyo ducu,

ginaura mayam otiyo ki kop ma ongolo,

13wun likwayo pa Abraim mayam latice,

wun lutino pa Yakobo ma en oyerowu.

14En aye Rwot Lubangawa;

kop ma en ongolo oromo wi lobo ducu.

15Wupo ikom gicikene ma bedo ri nakanaka,

ikom lok mayam en ociko, pi yalwak alip ki alip, 161

en gicike ma oketo ki Abraim,

ki lok mayam en okwongo ki Icaka, 172

ma omoko odoko cik bot Yakobo,

wek obed gicike ki Icrael matwal,

18kun waco ni, “Abimiyo lobo Kanaan botwu,

obed lobo me aleyawu.”

19Ikare ma pud gin nok, ma welgi tidi,

ma pud gin lubedo i lobo meno,

20ma giwire ikin lobo mapatpat,

ite ker bene mapatpat. 213

Lubanga pe oye ngati mo odiyogi;

ojuku luker mapol pirgi kun waco ni,

22“Pe wugud kom jo ma an awirogi,

pe wutim lunebina marac!”

23Wuwer bot Rwot, wun lobo ducu!

Wutit pi lar ma mere nino ducu.

24Wutuc deyone bot lurok,

wutit tice me aura bot rok ducu!

25Rwot aye dit, myero kipake tutwal,

myero kilwore makato lubanga mukenegu ducu.

26Pien lubanga pa rok ducu gin gubedo cal jogi apaya,

ento Rwot aye oketo polo.

27Deyo ki dit tye bote,

tek ki yomcwiny tye kama en bedo iye.

28Wun kaka me rok ducu, wumii deyo bot Rwot,

wumii deyo ki tek bot Rwot!

29Wumii deyo bot Rwot muporo nyinge;

wukel gityer, wubin wa inyime!

Wuwor Rwot pien en opore me awora;

30komwu myero omyel inyime, wun lobo ducu;

i ada, lobo bene ocung matek ma pe yenge.

31In polo bed ki yomcwiny ki lobo bene obed ma cwinye yom!

Wuwac ikin rok ni, “Rwot tye laloc!”

32Wek nam omor, ki gin acweya ducu matye iye,

poto bene oum, ki jami ducu matye iye!

33Yadi ma i bunga ducu gibiwer ki yomcwiny inyim Rwot,

pien en obibino kangolo kop ikom lobo. 344

Wumii pwoc bot Rwot, pien en ber;

mar mere ma pe loke bedo nakanaka!

35Wuwac bene ni,

“Larwa, Ai Lubanga lalarwa,

i cokwa ci i larwa ki ikin lurok,

wek wapwo nyingi maleng, waum ka wapaki.

36Kipwo Rwot Lubanga pa Icrael,

nia con ki con nio nino ma pe tum!”

Lwak ducu gugamo ni, “Amen!” Ci gupako Rwot.

Kiketo Lulevi pi tic ikom Canduk me Gicike

37Daudi oweko ki Acap ki utmegine me bedo katic inyim Canduk me Gicike pa Rwot wek gubed katiyo kunu matwal inyim Canduk me Gicike kit ma mite kwede inino acel acel. 38Ka dok Obed-edom wod pa Jedutun, ki utmegine pyere abicel wiye aboro, ki Koca gin gubedo lugwok dogola.

39Daudi oweko ni Jadok ajwaka pa Lubanga ki utmegine ma gin ajwaki pa Lubanga inyim kema pa Rwot i ka woro Lubanga iwi got matye i Gibeon. 40Odiko ki otyeno omyero gin otim gitum awanga bot Rwot iwi keno tyer me gitum awanga, kun gilubu lok ducu ma kicoyo i Cik pa Rwot mayam ociko ki jo Icrael. 41Eman ki Jedutun gunywako tic kwedgi, kacel ki jo mukene mayam kiyerogi ki nyinggi pi miyo pwoc bot Rwot pi mar mere ma bedo nakanaka. 42Eman ki Jedutun onongo gitye ki tum ki atego agoya pi wer agoya, ki jami agoya mukene ma gigoyo ikare me wero wer maleng. Lutino awobe pa Jedutun yam kiketogi pi gwoko dogola Ot pa Rwot. 435

Ci lwak ducu guket, dano acel acel odok i ode, ki Daudi bene odok i pacone kalamo gum ikom jone.