1 Tekwaro 17

Lubanga oketo gicike ki Daudi

(2 Cam 7:1-17)

1Ikare ma onongo Daudi dong obedo ki i ode, en ocwalo olwongo lanebi Natan ci ocako waco bote ni, “Nen ba, an dong abedo i ot bao cedar, ento Canduk me Gicike pa Rwot pud bedo i kema.” 2Ci Natan odok iye ki Daudi ni, “Tim gin ducu matye i cwinyi, pien Lubanga tye kwedi.”

3Ento i dyewor meno acelu lok pa Rwot dok obino bot Natan ni, 4“Cit icitit bot latica Daudi ni Rwot owaco kuman ni, ‘In pe ibigera ot me bedo. 5Pien peya abedo i ot mo nia wa ikare ma alaro jo Icrael ki Ejipt dok atelo wigi nio kwede wa onyo, ento abedo ka kobo nia ki i kema man nio wa i kema mukene, ki nia ki i kabedo man nio wa i kabedo mukene. 6Ikabedo ducu ma abedo kawire iye ki jo Icrael ducu, an mono yam kong aloko lok mo bot lungolkop me Icrael mayam acikogi pi kwayo lwaka kun awaco ni, pingo pe kong wugera ot mo me bao cedar? 7Koni dong ibiwaco ki latica Daudi ni, Rwot me mony owaco kuman ni, an yam akwanyi ki kakwat i olet, kama ibedo kaleko iye romi, wek i bed laker maloyo jona jo Icrael; 8dok abedo kalonge kwedi i kabedo ma icito iye ducu, abedo kajwero lumeroki woko ki inyimi. Dok abimiyo nyingi ywek, marom ki nying jo madito ma iwi loboni. 9Dok abimiyo kabedo ki jona jo Icrael; ci abiketogi iye, wek dong gubed i kabedogi kikome, ma pe dong kibiyelogi matwal, wa lulweny magwa bene pe dok bipoto ikomgi, kit macalo ikare ma con ca. 10Nia wa ikare ma con ma aketo lungolkop ma guloyo jona jo Icrael; ci gutayo lumerokgi woko ducu. Ento atuci ni, Rwot bimiyo odi bedo madit. 11Ka kareni oromo me yweyo kacel ki kwarini, ci abiketo wodi mo ma bilubi bedo dit, ci abimoko kere bedo matek. 12En aye bigera ot, an abimoko komkere bedo matwal. 131Abibedo wone, ki en bibedo woda; pe abikwanyo mar mera ma pe loke ki ikome, kit mayam akwanyo ki ikom ngat ma otelo nyimini. 14Ento abimoko en i oda ki i kera matwal; ki komker mere bene dong bimoko matwal.’” 15Ci Natan otito bot Daudi lok magi ducu, ki kit ginanyuta ma onen bote ducu.

Lega me pwoc pa Daudi

(2 Cam 7:18-29)

16Lacen Rwot Daudi ocito obedo piny wa inyim Rwot, ci owaco ni, “Ai Rwot Lubanga, an anga, oda kono gin ango, ma omiyo ikonya nio wa onyooni? 17Pud i bwono kony man ni tidi ki tung boti, Ai Lubanga; ibedo kalok ikom oda ki kit ma bibedo kwede pi kare ma lac matye anyim, dok i nyuta bene likwaya ma anyim, ai Rwot Lubanga. 18An Daudi dok abiwaco kit lok ango ikom deyo ma imiyo bota? Pien in ingeya, an ma abedo laticini. 19Pira keken, ai Rwot, dok pi cwinyi giri keni, omiyo itiyo gin madito magi ducu, me miyo gin madito ducu ma kit man ongene. 20Pe tye ngat mo macalo in, ai Rwot, dok pe tye Lubanga mo, kono in keken, kit mayam wawinyo ki itwani. 21Rok mene ma wi lobo marom ki joni jo Icrael, mayam Lubanga ocito kakokogi wek gubed jone, wek nyingi oywek pirgi, pi tiyo gin madito mamiyo ki dano lworo, ki pi ryemo rok mapol kacel ki lubangagi ki inyim lwaki, mayam in ikokogi ki i Ejipt? 22In ityeko miyo lwaki jo Icrael gudoko joni nakanaka; dok in, ai Rwot, yam idoko Lubangagi.

23Ai Rwot Lubanga, kombedi dong imok lok meri mayam iwaco ikoma ki ikom jo ma i oda matwal, ci dong i tim kit ma ityeko waconi. 24Mok lok ma iwaconi, wek nyingi obed me adwora nakanaka kun giwaco ni, ‘Rwot Lubanga me mony, Lubanga pa Icrael, en aye Lubanga maloyo Icrael.’ Ci ot pa latici Daudi bimoko inyimi matwal. 25Pien in, Lubanga, ityeko nyutu bota ni ibimiyo oda bedo madit; ma omiyo an latici alimo tekcwiny me kelo lega man inyimi. 26Ai Rwot, in aye Lubanga, ci in dong ityeko cike me timo gin man maber pira. 27Pimeno, mi gum ikom dano ma i oda ki yomcwiny, wek gumede ameda kibedo inyimi nakanaka; pien ngat ma in imiye gum, gume bedo nakanaka, ai Rwot.”