1 Tekwaro 18

Daudi oloyo lweny mapol

(2 Cam 8:1-18)

1Lacen Daudi dok otayo jo Piliciti, oloyogi, ci omayo taun madit me Gat ki gangi matino ma ingete ki i cing jo Piliciti. 2Daudi dok otayo jo Moab, ci jo Moab gudoko lutice, kun giculu mucoro bote.

3Daudi dok otayo Adadejer rwot me Joba, ma tung Kamat, mayam omito mayo dog kulu me Euprate. 4Ci Daudi omako gadigadi lwenye alip acel, ki wegi aguragura alip abiro, ki acikari ma giwoto ki tyen gi alip pyere aryo ongolo odon tyen aguraguragi ducu mayam giywayo gadigadi lwenygi, ento oweko mogo manok odong maromo ywayo gadigadi miya acel.

5Ka jo Ciria me Damaciko gubino kakonyo kor Adadejer rwot me Joba, ci Daudi oneko jo Ciria alip pyere aryo wiye aryo. 6Daudi oketo lumony i cel gogo i lobo Ciria ma ite loc me Damaciko; ci jo Ciria gudoko lutic pa Daudi, kun giculu mucoro bote. Rwot Lubanga obedo kamiyo tek me bwoyo lobo bot Daudi kama yam ocito iye ducu. 7Daudi yam oyako lwak kwot me jabu ki bot jo pa Adadejer ci otingogi, ci oterogi i Jerucalem. 81Daudi oyako lwak mola mapol ki i taun madito magi, Tibat ki Kun, ma onongo yam Adadejer loyogi. Man aye nyonyo bronze mayam Solomon oyubu kwede lagwok pii madit me nyonyo bronze, ki wir, ki agulu me mola.

9Ka rwot Tou me Kamat owinyo ni Daudi otyeko tayo mony pa Adadejer woko ducu liweng, 10ci ocwalo wode Adoram bot rwot Daudi ka mote, ki pi pwoyo en pi lweny ikom Adadejer ki me loyo en woko; pien yam Adadejer obedo kalweny ki Tou tyen mapol. Dok ocwalo lwak jami mapol me jabu, ki me ryal ki me mola bene. 11Jami magi ducu rwot Daudi yam odyerogi pi woro Rwot. Daudi odyerogi kacel ki ryal ki jabu mayam oyakogi ki bot jo Edom, jo Moab, jo Ammon, jo Piliciti ki jo Amalek.

12Dok Abicai wod pa Jeruya oneko jo Edom alip apar wiye aboro i nota me Kado. 13Ci oketo lumony i cel gogo me Edom; ma oweko jo Edom ducu gudoko lutic pa Daudi. Rwot omiyo Daudi obwoyo lobo kama yam ocito iye ducu.

14Daudi oloyo jo Icrael ducu kitmeno; en obedo kangolo kop atir dok kakare ikom lwake ducu. 15Joab wod pa Jeruya obedo ladit me mony; ki Yekocapat wod pa Akilud obedo laco lok ma time; 16Jadok wod pa Akitub ki Akimelek wod pa Abiatar gubedo ajwaki pa Lubanga; Cavica obedo karan, 17ki Benaya wod pa Yekoyada obedo ladit maloyo jo Keret ki jo Pelet; ki awobe pa Daudi gubedo ludito maloyo tic pa rwot.