1 Tekwaro 19

Daudi oloyo jo Ammon ki jo Ciria

(2 Cam 10:1-19)

1Ka man otum, Nakac rwot pa jo Ammon oto woko, ci wode oleyo katyene. 2Daudi owaco ni, “Abinyutu cwiny me mar bot Kanun wod pa Nakac, kit mayam wone onyutu cwiny me mar botani.” Ma omiyo Daudi ocwalo lukwena bote kakweyo cwinye pi to pa wone. Ci ka lutic pa Daudi guo bot Kanun i lobo pa jo Ammon kakweyo cwinye. 3Ento rwodi pa jo Ammon guwaco bot Kanun ni, “In itamo ni Daudi ocwalo lukwe cwinyi pi keto deyo ikom woru? Daudi mono pe ocwalo lutice kangiyo piny, ki katuru gang, ki pi roto lobo ducu?” 4Kitmeno omiyo Kanun omako lutic pa Daudi, ci olyelo yer tikgi, ka dok ongolo dye bongogi tung pyergi, ka ocwalogi kwede woko; ci gucito. 5Ka kitito bot Daudi pi jo meno, ci ocwalo dano ka jologi, pien onongo gitye ki lewic madwong tutwal. Ci rwot Daudi owaco ni, “Kong wubed i Jeriko, nio ka yer tikwu otwi olot, ka dong wudwog kany.”

6Ka jo Ammon guneno ni pirgi odoko ngwe marac bot Daudi, ci Kanun ki jo Ammon gucwalo ryal maromo talanta alip acel me pango gadigadi lweny ki wegi aguragura ki bot jo Mecopotamia, wa ki i lobo Arammaaka, ki i Joba. 7Ci gupango gadigadi lweny alip pyere adek wiye aryo. Rwot me Maaka bene, obino ki monye, ci ogony inyim Medeba. Jo Ammon gucoke ki i gangigi, gubino kalweny. 8Ka Daudi owinyo pirgi, ci ocwalo Joab kacel ki mony pa twoni oteka lweny ducu. 9Ci Jo Ammon gubino gurwayo cok ka guryeyo i dog cel me taun madit; ki luker ma gubino guryeyo ken gi, i dye bar.

10Ka Joab oneno mony okace woko ryoryo, tung nyime ki tung ngeye bene, ci oyero jo Icrael ma oyita lweny, ocako ryeyogi gukemo jo Ciria; 11ci oketo jo mudonge bot omine Abicai, gin bene guryeyo gukemo jo Ammon. 12Joab owaco ni, “Kace jo Ciria gubedo tek ikoma, ci i bikonya, ento ka jo Ammon aye gubedo tek ikomi, an abikonyi. 13Bed oteka ma cwinye nwang, wek walweny pi lutuwa, ki pi taun madito pa Lubangawa, Rwot bene otim gin ma oneno ni ber.” 14Kitmeno Joab ki jo ma gitye kwede ducu gurwayo cok ka lweny ikom jo Ciria; ci jo Ciria guringo woko ki inyime. 15Ka jo Ammon guneno jo Ciria guringo woko, ci gin bene gucako ringo woko ki inyim Abicai omin Joab, gudonyo wa i taun madit. Ci Joab odok i Jerucalem.

16Ento ka jo Ciria guneno jo Icrael guloyogi, gucwalo lukwena ci gukelo jo Ciria ma gitye loka kulu Euprate, kacel ki Copak ma lawimony pa Adadejer ma latel wigi. 17Ka kitito pirgi bot Daudi, ci en bene ocoko jo Icrael ducu ongolo kwedgi kulu Jordan, ci obino ikomgi, oryeyo monye orwayo ikomgi. Ka Daudi dong oryeyo monye, ci orwayo kom jo Ciria, gucako lweny kwede. 18Jo Ciria gucako ringo woko ki inyim Icrael. Daudi oneko jo Ciria ma giringo ki gadigadi lweny alip abiro, ki acikari ma giwoto ki tyen gi alip pyere angwen, ka dok oneko Copak ladit me monygi woko bene. 19Ka lutic pa Adadejer guneno ni jo Icrael dong gutyeko loyogi woko, ci guketo lok kuc obedo ikin gi ki Daudi, ci gudoko lutice. Kitmeno jo Ciria pe dok gubedo ki miti me konyo jo Ammon ikare mo keken.