1 Tekwaro 20

Daudi omako Raba

(2 Cam 12:26-31)

11

I dog oro ma en aye kare ma luker cito kwede kamony, Joab ocako telo wi mony, ci opoto mony ikom jo Ammon, ka dok gucito gurumu Raba. Ento Daudi odong i Jerucalem. Joab olwenyo matek ikom Raba, ci oloyogi. 2Ci Daudi okwanyo lalukana me jabu ki iwi cal jok pa jo Ammon, ma peke onongo cok romo kilo 34 ma got me wel bene onongo tye iye. Ci Daudi okwanyo got me wel meno oketo ikom lalukanane. Ka dok okelo lwak jami ma kiyako ki i taun madit meno i Jerucalem. 3Dok okelo jo ma kimakogi ki i taun madit meno, ci oketogi katic ki mucumeno ki cururu nyonyo ki latong. Daudi obedo katimo jo ma i taun pa jo Ammon ducu kitmeno. Ci Daudi ki lwak ducu gucako dok cen wa i Jerucalem.

Jo pa Daudi guneko oteka lweny

(2 Cam 21:18-22)

4Lacen lweny dok ocake ikom jo Piliciti ma i Gejer; ci Cibekai ma Lakucat oneko Cipai woko, ma onongo en ngat acel ma ikin likwayo pa twon olumani. Ci yam gin oloyo jo Piliciti kitmeno. 52Ka lweny dok ocake ikom jo Piliciti; ci Elkanan wod pa Jair oneko Lami ma omin Goliac ma jo Gat, mayam bol tonge rom ki rii yat lacwe bongo. 6Lweny dok obedo i Gat kama tye iye dano mo ma opute mabor liwau, matye ki nyig cinge abicel, ki nyig tyene bene abicel, tung ryoryo ducu, ci nyig lwet cinge ki tyene ducu romo pyere aryo wiye angwen. En bene yam lakwar twoni olumanu. 7Ka en okati kanywaro jo Icrael ki ngala, ci Yonacan wod pa Cimea ma omin Daudi oneko en woko. 8Jo man gin likwayo pa twoni oluma ma i Gat; gin ducu Daudi kacel ki lutice gutyekogi woko.