1 Tekwaro 21

Daudi okwano wel jo Icrael ki Juda

(2 Cam 24:1-25)

1Catan ocung kalweny ikom Icrael, ci ocako piyo Daudi pi kwano wel jo Icrael. 2Kitmeno Daudi owaco bot Joab ki ludito me mony ducu ni, “Wucit kakwano wel jo Icrael, cake ki i Beer-ceba nio kwede wa i Dan, ci wudwok loke ducu bota, wek ange welgi.” 3Ento Joab ojuku Daudi kun wace ni, “Myero Rwot Lubanga aye omed wel lwaki tyen miya kulu, kit ma dong gidwong kwedeni! Pe gin ducu lwaki ce rwoda rwot, gin ducu lutici, rwoda. Ci pingo i mito timo lakit tim macalo man? Pingo i mito ni ikelo bal ikom Icrael?” 4Ento lok pa Daudi obedo tek makato pa Joab. Omiyo Joab oa ocito orumu lobo Icrael ducu, ka odwogo kwede cen wa i Jerucalem. 5Ka Joab ocako miyo wel lwak ma en okwanoni bot Daudi. Jo Icrael ducu onongo giromo milion acel ki alip miya acel ma gin wegi pala lucwan, ki i Juda giromo alip miya angwen ki pyere abiro ma gin wegi pala lucwan. 6Ento Joab pe okwano wel jo pa Levi ki pa Benjamin, pien onongo cwiny Joab dag cik pa rwot.

7Ento cwiny Lubanga pe obedo yom ikom lok meno; ci ocako neko jo Icrael. 8Ci Daudi ocako bako doge bot Lubanga kun waco ni, “Abalo twon bal mo madit pi gin ma dong atyeko tiyone. Kombedi dong alegi, i kwany roc pa latici woko; pien atimo lok man me mingo tutwal.” 9Ci Rwot oloko ki Gad, ma lanen pa Daudi, kun wace ni, 10“Cit i wac bot Daudi ni, ‘Rwot owaco kuman ni, amiini lok adek; in i kwany acel ki ikin gi, wek amii opot ikomi.’” 11Kitmeno Gad obino bot Daudi ci otite lok meno ni, “Rwot owaco kuman ni ‘Kwany acel ma i mitone! 12I mito kec opot pi mwaka adek; nyo lumerokwu oryemwu pi dwe adek, kun ginekowu ki pala lucwan; nyo pala pa Rwot aye opot i loboni ki two gemo pi nino adek kulu, kun lamalaika pa Rwot neko jo ma i lobo Icrael tyeko woko ducu?’ In dong i tam kit lok ma abidok kwede bot Rwot ma ocwala botini.” 13Ci Daudi owaco bot Gad ni, “An dong adonyo i twon can madit ma pe wace. Wek apot icing Rwot, pien kicane dwong; ento pe apot icing dano.”

14Kitmeno Rwot owalo two gemo opoto ikom Icrael; ci jo Icrael guto maromo co alip pyere abiro. 15Ci Lubanga ocwalo lamalaika ikom Jerucalem pi tyekone woko; ento ka dong mito tyekone, ci Rwot oneno, ci ongut ikom gin ma rac man, ci ojuku lamalaika ma lanek pinyi woko, kun wace ni, “Man dong oromo, dong igik nek woko.” Man otime inget laro moyo pa Ornan ma jo Jebuc. 16Ka Daudi oilo wange malo ci oneno lamalaika pa Rwot ocung ikin lobo ki polo, kun owoto pala lucwan otingo ikom Jerucalem. Ci Daudi ki ludongo ducu, gucako ruku bongo cola, gupoto kwede piny aryeba cwiny.

17Ci Daudi owaco bot Lubanga ni, “Pe an aye yam aciko pi kwano wel lwak? An aye yam abalo atyeko tiyo roc madit tutwal, ento lwak romi man, gutimo kit roc ango? Alegi ni, wek cingi opot ikoma ki ikom ot pa kwara keken; pe iwek two gemo opot wa ikom lwaki.”

18Lamalaika pa Rwot dok ociko Gad ni owac ki Daudi wek ocit kacano keno tyer pi Rwot i laro moyo pa Ornan ma jo Jebuc. 19Daudi ocito kunu pi lok pa Gad, ma onongo oloko kit ma Rwot ocike kwede. 20Ikare meno onongo Ornan tye ka dino ngano; ka oloke oneno lamalaika, ci en ki awobene angwen mayam gitye kwede gukane woko. 21Ka Daudi woto cito bot Ornan, ci Ornan oneno; ka oneno Daudi ci oa ki i laro ocito bot Daudi, omiye woro kun oryebe piny inyime. 22Ci Daudi owaco bot Ornan ni, “Miya kabedo man me laro moyo wek acan iye keno tyer pi Rwot, miya awil pi wele kikome, wek two gemo okee woko ki ikom lwak.” 23Ci Ornan owaco bot Daudi ni, “Ber i ter; wek in, rwoda rwot, i tyer iye gin ma i neno ni ber; nen amiyo twon me gitum awanga, ki opam ladin ngano me yen, ki nyig ngano me gityer me moko kwon; amiyogi ducu.” 24Ento rwot Daudi ogamo dog Ornan ni, “Pe kumeno, ento abiwilo i wele kikome; pe abityero jamini ma pe mera bot Rwot, pe abimiyo gitum awanga ma pe awilo ki lima.” 25Kitmeno Daudi ocako miyo bot Ornan cekel me jabu miya abicel ma kipimo pekgi pi wilo kabedonu. 26Ci Daudi ocako cano keno tyer pi Rwot kunu, ka otyero gitum awanga ki gitum me berbedo. Daudi oworo iye Rwot, ci Rwot odok iye ki mac ma oa i polo ma obino ikom keno tyer me gitum awanga. 27Rwot ociko lamalaika, ci orwako pala lucwane i akurane. 28Ikare meno, ka Daudi oneno ni Rwot otyeko doke iye ki i laro moyo pa Ornan ma jo Jebuc, ci obedo katyero gitume ducu kunu. 29Pien kema pa Rwot ma Moses yam otiyo i tim, ki keno tyer me gitum awanga bene onongo pud gitye wa i kabedo me woro Lubanga iwi got matye Gibeon. 30Ento Daudi yam pe cito kunu kapenyo dog Rwot Lubanga, pien obedo kalworo pala lucwan pa lamalaika pa Rwot.