1 Tekwaro 22

1Daudi dok owaci, “Ot pa Rwot Lubanga bibedo kany, ki keno tyer me gitum awanga pi jo Icrael bene bibedo kany.”

Daudi oyubu pi gero Ot pa Lubanga

2Daudi ociko ni kigur lurok ma gibedo i lobo Icrael, ci oketogi i tic me payo godi. Gupayo godi mabeco pi gero Ot pa Lubanga. 3Daudi dok okano lwak nyonyo madwong me yubu cumar pi guru kika me dog gang, ki okol latwe bao, ki lwak mola madwong ma peke pe pime, 4ki lwak bao cedar ma wele pe kwane, pien jo Cidon ki jo Turo gukelo bot Daudi bao cedar madwong tutwal. 5Pien Daudi yam owaco ni, “Latina Solomon pud tidi, peya tye ki ngec mo, dok Ot ma kibigero pi Rwot myero obed me deyo makato ducu, wek ywekane ki deyone orom lobo ducu; ma omiyo an aye omyero ayub kit me gerone.” Pieno Daudi ocako yubu lwak jami madwong tutwal ma pud kwo.

6Ka dok olwongo wode Solomon, ci ociko en pi gero Ot pa Rwot Lubanga pa Icrael. 71Daudi owaco ki Solomon ni, “Woda, onongo abedo ki tam i cwinya pi gero ot mo pi woro nying Rwot Lubanga. 8Ento lok pa Rwot yam oloko bota kun waci, ‘In dong ityeko oyo lwak remo mapol, dok ibedo kalwenyo lweny maditogu mapol; ci in pe i bigero ot mo pi woro an, pien ityeko oyo lwak remo madwong inyima ki iwi lobo. 9Nen ba, in i binywalo latin laco; en bibedo ki kuc, abimiye kuc ma lumeroke ducu pe gibiyele; pieno nyinge bibedo Solomon, dok abimiyo kuc ki yweyo bot Icrael ikarene. 10En aye bigero ot pi woro an. En bibedo woda, ki an abibedo wone, dok abimoko komkere bedo i Icrael matwal.’ 11Eyo latina, Rwot obed kwedi, wek ityek gero Ot pa Rwot Lubangani, kit mayam oloko kwede ikomini. 12Atikane, Rwot aye myero omiyi ryeko ki niang matut, wek ibed kalubu cik pa Rwot Lubangani ka en bene dong omiyi dit me loyo Icrael. 132Dok i bilimo gum kace ibedo kagwoko kit cik ducu ki ngol kop ducu ma ceng Rwot ociko ki Moses pi jo Icrael. Dong bed oteka ma cwinyi nwang. Pe ilwor, cwinyi pe opoti. 14Nen an dong ayele mada ci dong bene atyeko yubu jami magi pi Ot pa Rwot: jabu maromo talanta alip miya acel, ryal maromo talanta milion acel, ki mola ki nyonyo ma peke pe pime, pien gidwong tutwal; ka dok ayubu bao ki got bene. In dok imed mukene ikomgi. 15Dok itye ki lwak lutic mapol. Lupaa godi, lugedo ki godi, lupac ki ludiro tic ducu ma welgi pe kwane, ki jo ma gitye makwiri i ticgi, 16ma gitiyo tic ki jabu, ki ryalgu, ki mola ki nyonyogu. Dong ia malo icak tic cut! Rwot aye obed kwedi.”

17Daudi dok ociko ludito ma i Icrael ducu pi konyo wode Solomon kun waco botgi ni, 18“Rwot Lubanga pe tye kwedwu? Dok pe en aye omiyo ki wun kuc i kabedowu ducu? Dok en aye otyeko miyo wegi loboni icinga omiyo aloyogi; dok jo me lobo man bene dong kitayo ki inyim Rwot wa ki inyim lwake. 19Eyo, kombedi dong wuket cwinywu ki tamwu kayenyo Rwot Lubangawu. Dong wutware malo wucit wunu kagero Kabedo Maleng pa Rwot Lubanga, ka wek Canduk me Gicike pa Rwot ki jami maleng ducu pa Lubanga kikelgi wa i Ot ma dong kigero pi woro nying Rwot.”