1 Tekwaro 23

11

Ka Daudi dong otii ma mwakane dong dwong, ci ocako keto wode Solomon wek obedo rwot maloyo Icrael.

Tic pa Lulevi

2Rwot Daudi dok ocoko ludito ma i Icrael ducu kacel ki ajwaki ki Lulevi bene. 3En omiyo kikwano wel Lulevi ducu ma ditogi romo mwaka pyere adek dok kwede malo, ci wel co ducu oromo alip pyere adek wiye aboro. 4Daudi owaco ni, “Jo alip pyere aryo wiye angwen ki ikomgi kibiketogi katic i Ot pa Rwot; jo alip abicel gibibedo jaggi ma giloyo Ot pa Lubanga ki lungolkop; 5jo alip angwen gibibedo lugwok dogola, ki jo alip angwen gibipako Rwot ki jami wer mayam atiyo pi pako Rwot.” 6Ci Daudi opokogi i dul adek muporo awobe pa Levi: Gercom, Kokat ki Merari.

7Lutino awobe pa Gercom gin aye Ladan ki Cimei. 8Lutino awobe pa Ladan gin aye Jekiel ma laditgi, ki Jetam ki Joel, gin adek. 9Lutino awobe pa Cimei gin aye Celomot, Kajiel ki Karan, gin adek. Magi gin aye ludito kaka pa Ladan ma i odi pa kwarogi. 10Lutino awobe pa Cimei gin aye Jakat, Jina, Jeuc ki Beria. Jo angwen nu gin aye lutino awobe pa Cimei. 11Jakat aye onongo laditgi, ki me aryone Jija; ento Jeuc ki Beria pe gunywalo awobe mapol, ma omiyo kikwanogi macalo dog ot ma kwarogi acel.

12Lutino awobe pa Kokat gin aye Amram, Ijar, Kebron ki Ujiel, gin angwen. 132Lutino awobe pa Amram gin aye Aron ki Moses. Aron kidyere me tic pi kwero jami maleng makato, wek en ki lutino awobene guwang odok eceta inyim Rwot matwal, dok guti bote, gulam gum i nyinge matwal. 14Ento lutino awobe pa Moses, ma dano pa Lubanga, yam ki kwanogi ikin kaka pa Levi. 15Lutino awobe pa Moses gin aye Gercom ki Eliejer. 16Lutino awobe pa Gercom: Cebuel aye laditgi. 17Lutino awobe pa Eliejer: Rekabia aye laditgi. Eliejer pe onywalo lutino awobe mukene, ento Rekabia onywalo lutino awobe mapol mada. 18Lutino awobe pa Ijar, Celomit aye laditgi. 19Lutino awobe pa Kebron gin aye Jeria ma laditgi, ki me aryone Amaria, me adeke Jakajiel, ki me angwene Jekameam. 20Lutino awobe pa Ujiel gin aye Mika ma laditgi, ki me aryone Icia.

21Lutino awobe pa Merari gin aye Makali ki Muci. Lutino awobe pa Makali gin aye Eleajar ki Kic, 22Eleajar oto ma pe onywalo awobe, onywalo anyira keken; ento ludogolagi ma awobe pa Kic aye gunyomogi. 23Lutino awobe pa Muci gin aye Makali, Eder ki Jeremot, gin adek.

24Magi aye lutino awobe pa Levi ma i odi pa kwarogi, ma gin ludito kaka ma i odi pa kwarogi kit mayam ki coyogi kwede, ma lubu wel ki nying dano ki acel acel ma ditogi romo mwaka pyere aryo dok kwede malo, ma gibedo katiyo tic i Ot pa Lubanga. 25Pien Daudi onongo owaco ni, “Rwot Lubanga pa Icrael dong omiyo kuc ki jone; ki en bene bibedo i Jerucalem matwal. 263 Pimeno Lulevi pe dong bimite me tingo kema pa Rwot, kadi jami mo ma kitiyo kwede.” 27Pi lok ma Daudi oloko me agikine omiyo kicoyo wel Lulevi ma ditogi romo mwaka pyere aryo ci odok kwede malo. 284En dok owaco ni, “Ticgi bibedo me konyo awobe pa Aron katic i Ot pa Rwot, kun gigwoko dyekal ki kicika odi matinone, gibilonyo jami maleng ducu, dok gibitiyo kit tic mukene ducu ma i Ot pa Lubanga. 29Dok gibikonyo bene me gwoko mugati ma kiketo inyim Rwot, ki moko kwon me gityer me moko kwon, ki capat ma repe ma tobi pe iye, ki gityer me moko kwon ma kitedo i otako nyonyo, ki gityer me moko kwon ma kirubu ki moo, ki me pimo pek ki dwong me gityer mapatpat me Ot pa Lubanga. 30Gin gibicung kamiyo pwoc ki pak bot Rwot jwijwi i odiko ki otyeno kitmeno, 31ki ikare ducu ma gityero gitum awanga bot Rwot i ceng Cabit, ki i Por Dwe, ki inino maditogu, gibicung inyim Rwot kare ducu, kun gilubu wel jo ma kiciko. 32Gibigwoko Kema me Rwate ki Kabedo Maleng kitmeno, dok gibikonyo utmegigi, awobe pa Aron, i ticgi ma i Ot pa Rwot.”