1 Tekwaro 24

Tic pa Ajwaki pa Lubanga

1Dul pa likwayo pa Aron gin ene. Lutino awobe pa Aron gin aye Nadab, Abiu, Eleajar ki Itamar. 21Ento Nadab ki Abiu guto woko ikare ma won gi pud kwo, lutinogi bene obedo peke, ma omiyo Eleajar ki Itamar gudoko ajwaki pa Lubanga. 3Ci Daudi opokogi muporo dog ticgi ma kiyerogi iye, kun jo ma konyogi gin aye Jadok matye ikin likwayo pa Eleajar, ki Akimelek ma ikin likwayo pa Itamar. 4Dong kit macalo kinongo jo madito mapol ikin likwayo pa Eleajar makato ma ikin likwayo pa Itamar, gupoko ludito kaka ma i dog odi pa kwarogi apar wiye abicel pi likwayo pa Eleajar, ki ludito kaka ma i odi pa kwarogi aboro pi likwayo pa Itamar. 5Kipokogi ki bolo kwir, marom, pien ludito me Kabedo Maleng ki ludito pa Lubanga yam gubedo ikin likwayo pa Eleajar ki ikin likwayo pa Itamar bene. 6Cemaya wod pa Netanel ma Lalevi, ma obedo karan, yam ocoyo nyinggi ki inyim rwot, ki inyim rwodi, ki ajwaka Jadok, ki Akimelek wod pa Abiatar, ki ludito kaka ma i odi pa kwari pa ajwaki ki pa Lulevi; yam guyero dog ot pa kwarogi acel pi Eleajar ki acel kiyero pi Itamar.

7Kwir mukwongo opoto ikom Yekoyarib, ki me aryo ikom Jedaya, 8me adek ikom Karim, me angwen ikom Ceorim, 9me abic ikom Malkija, me abicel ikom Mijamin, 10me abiro ikom Kakoj, me aboro ikom Abija, 11me abongwen ikom Yecwa, me apar ikom Cekania, 12me apar wiye acel ikom Eliacib, me apar wiye aryo ikom Jakim, 13me apar wiye adek ikom Kupa, me apar wiye angwen ikom Jecebeab, 14me apar wiye abic ikom Bilga, me apar wiye abicel ikom Imer, 15me apar wiye abiro ikom Kejir, me apar wiye aboro ikom Kapijej, 16me apar wiye abongwen ikom Petakia, me pyere aryo ikom Jekejikel, 17me pyere aryo wiye acel ikom Jakin, me pyere aryo wiye aryo ikom Gamul, 18me pyere aryo wiye adek ikom Delaya, me pyere aryo wiye angwen ikom Maajia. 19Dog tic ma kiyero jo magi iye obedo me donyo i Ot pa Rwot, kun gilubu cik mayam kwarogi Aron oketo pirgi, macalo Rwot Lubanga pa Icrael yam ociko en kwede.

20Man obedo lok ikom likwayo pa Levi mudonge: ikin likwayo pa Amram kiyero Cubael; ki ikin likwayo pa Cubael kiyero Jedeya. 21Likwayo pa Rekabia: ikin likwayo pa Rekabia kiyero Icia ma laditgi. 22Ikin likwayo pa Ijar kiyero Celamot; ikin likwayo pa Celamot kiyero Jakat. 23Ikin likwayo pa Kebron kiyero Jeria ma laditgi, me aryone Amajia, me adek Jakajiel, me angwen Jekameam. 24Ikin likwayo pa Ujiel kiyero Mika; ikin likwayo pa Mika kiyero Camir, 25Omin Mika en aye Icia; ikin likwayo pa Icia kiyero Jekaria. 26Ikin likwayo pa Merari kiyero Makali ki Muci. Ikin likwayo pa Jajia kiyero Beno. 27Likwayo pa Merari gin aye Jajia, Beno, Cokam, Jakur ki Ibri. 28Ikin likwayo pa Makali kiyero Eleajar ma pe onywalo awobe. 29Ikin likwayo pa Kic kiyero Jeramel. 30Ikin likwayo pa Muci kiyero Makali, Eder ki Jerimot. Magi gin aye likwayo pa jo Levi, kun lubu dog odi pa kwarigi. 31Jo magi bene ma ludito kaka ma i dog odi pa kwarigi acel acel gubolo kwir, kun ladit bolo kacel ki utmegine ma tino, macalo utmegigi ma likwayo pa Aron gubolo ki inyim rwot Daudi, Jadok, Akimelek ki ludito kaka ma i dog odi pa kwari pa ajwaki ki pa Lulevi.