1 Tekwaro 29

Mic ma kimiyo me gero Ot pa Lubanga

11

Rwot Daudi dok owaco bot lwak ducu ma gucoke ni, “Latina Solomon Lubanga gire aye ma oyero, en pud tidi, peya tye ki ngec mo, dok tice bene dit; pien gangkal man pe bibedo pa dano ento pa Rwot Lubanga. 2Pieno dong atyeko yubu jami ducu pi Ot pa Lubangana kit ma atwero, jabu pi jami me jabu, ryal pi jami me ryal, mola pi jami me mola, nyonyo pi jami me nyonyo, bao pi jami me bao, kun amedo iye lwak kidi onik mapol mada, ki lutino kidi me amwona ikom jabu, ki akuku gu, ki godi ma rangigi tye patpat, godi me wel ma kitgi patpat, ki kidi matar bene. 3Dok pien cwinya obedo yom ikom Ot pa Lubangana, omiyo amiyo jami magi me jabu ki me ryal ma oa ki icinga pi Ot pa Lubangana, kun amedo ikom lwak jami ducu ma atyeko yubu pi Ot maleng. 4Amiyo jabu ma peke romo talanta adek, en aye jabu me Opir, ki ryal ma kiliyo maleng ma peke romo talanta alip abiro pi mwono kom Ot pa Rwot, 5ki pi tic ducu ma ludiro bitiyo; jabu pi jami me jabu, ki ryal pi jami me ryal. Kombedi dong koni anga mono ma bikelo jami ma cwinye opwoyoni, ma tin dok dyere kene inyim Rwot?”

6Ci ludito kaka ma i odi pa kwarigi gucako tyero mot ma igi opwoyo, ki ludito maloyo kaka bene gumiyo kitmeno, ki ludito maloyo buca mony me jo alip ki buca mony me jo miya, ki ludito maloyo tic pa rwot. 7Ci gumiyo jami magi pi tic me Ot pa Lubanga: jabu maromo talanta alip abic ki darik alip apar, ki ryal maromo talanta alip apar, ki mola maromo talanta alip aboro, ki nyonyo maromo talanta alip miya acel. 8Jo matye ki godi me wel gumiyogi i ot kano lim ma i Ot pa Rwot, ma Jekiel ma jo pa Gercon aye gwoko. 9Cwiny lwak obedo yom pien lutelagi gumiyo mot ki cwinygi ducu bot Rwot Lubanga. Rwot Daudi bene cwinye obedo yom matek.

Daudi opako Rwot

10Mumiyo Daudi opako Rwot inyim lwak mucoke ducu, kun waco ni, “Kipak in Rwot Lubanga pa kwariwa Icrael, nino ma pe tum. 112Ai Rwot, dit ki tek ki deyo ki loc ki woro ducu meri, pien jami ducu matye i polo ki matye i lobo ducu meri. Ker bene meri, ai Rwot, in kipilo wii pien i loyo jami ducu. 12Lonyo ki deyo ducu a ki boti, dok in aye i loyogi ducu. Twero ki tek ducu tye icingi, dok cingi aye miyo ki dano dit, dok miyo tek ki jo ducu. 13Wan dong wapwoyi, in Lubangawa, kun wapako nyingi me deyo matek.

14Ento an anga, ki lwaka kono gin ango, ma omiyo wabedo ki twero kit man me miyo jamiwa kit ma iwa opwoyoni? Pien jami ducu a ki boti, dok wadwoki giri. 15Pien wan wawelo inyimi, ki lubedo, kit mayam kwariwa tye kwede; ninowa me kwo i lobo ni bene bedo loke calo tipu, ki genwa i kabedowa ni dong pe pien pe watwero kane iye ki bot to. 16Ai Rwot Lubangawa, lwak jami man ducu ma wamiyo pi gero ot pi nyingi maleng gua ki i cingi, dok gin ducu jamini giri. 17An angeyo, ai Lubangana ni, in i temo cwiny dano, dok i pwoyo dano ma cwinye atir; pi cwinya matye atir, omiya atyero boti mot me jami magi ducu; dong atyeko neno lwaki ki wanga, gin ma gitye kanyi, ka gityero jamigi boti kit ma cwinygi omito ki yomcwiny madwong. 18Ai Rwot Lubanga pa kwariwa Abraim ki Icaka ki Icrael, mii cwiny lwaki okem tam ma kit meno nakanaka, dok imii cwinygi okem boti keken. 19Dok i mii bot woda Solomon gum me mako ciki ki cwinye ducu, ki lok ducu ma i cikogu, kun en cobogi ducu; kun i miye gum me gero Otti ma dong atyeko yubu jami pireni.”

20Lacen Daudi owaco bot lwak ducu mucoke ni, “Wupwo Rwot Lubangawu.” Lwak mucoke ducu gucako pwoyo Rwot Lubanga pa kwarigi, ci gukulu wigi piny, guworo Rwot, dok gumiyo woro bot rwot Daudi bene. 21Orwone gutyero gitum awanga bot Rwot, twoni alip acel, nyogi romi alip acel ki lutino romi alip acel, kacel ki gityer amata ma otiko kit gityer acel acel, ki kit lwak gitum mukene mapol pi jo Icrael ducu. 22Ci gucamo dok gumato inyim Rwot inino meno ki yomcwiny madwong tutwal.

Ci guketo Solomon wod pa Daudi me bedo rwot tyen me aryone, kun kiwire ki moo me bedo laker pi Rwot, dok kiwiro Jadok bene me bedo ajwaka pa Lubanga. 233Lacen Solomon obedo rwot iwi komker pa Rwot ma ka wone Daudi; ci obedo ki gumkom, kun jo Icrael giworo doge. 24Ci ludito ducu ki twoni oteka lweny ducu, kacel ki lutino awobe pa rwot Daudi ducu, gucike pi woro rwot Solomon. 25Ci Lubanga omiyo Solomon yweka madit inyim jo Icrael ducu, ci ocako onyo deyo me loc ikome madwong makato mayam pe onen ikom rwot mo keken me Icrael nia wa con.

Ladol lok ikom loc pa Daudi

26Daudi wod pa Yece yam oloyo Icrael ducu kitmeno. 274En oloyo jo Icrael pi mwaka pyere angwen kulu; obedo kaloc i Kebron pi mwaka abiro, ka dok i Jerucalem pi mwaka pyere adek wiye adek. 28Daudi oto ma dong otii woko likong, ikare maber mupong ki lonyo ki deyo; ci wode Solomon aye oleyo katyene. 29Lok kom rwot Daudi ducu nia i acakine nio i agikine kicoyogi i buk me Tekwaro pa Camuel ma lanen ki i buk me Tekwaro pa lanebi Natan, ki i buk me Tekwaro pa Gad ma lanen, 30kacel ki lok kom loce ducu, ki teke ducu, ki lok ducu ma otime ikome, ki ikom Icrael ki ikom ker ducu ma i lobo.