1 Tekwaro 28

Daudi ociko pi gero Ot pa Lubanga

1Daudi ocoko ludito pa jo Icrael ducu i Jerucalem, ludito maloyo kaka ducu, ludito maloyo dul tic ducu ma gitiyo ite loc pa rwot, ludito maloyo buca mony me jo alip, ki buca mony me jo miya, ludito ma gwoko jami ducu, kacel ki lim makwo ducu, pa rwot ki pa awobene, kacel ki ludito maloyo gangkal, ki jo ma gin twoni oteka, ki jo ducu ma gunyebe ki lweny. 21Ci rwot Daudi oa malo, ocung, ocako waco ni, “Wuwiny an, wun utmega ki wun lwaka. Yam abedo ki tam i cwinya me gero ot kama Canduk me Gicike pa Rwot biywe iye, ki kama kibiketo iye kom pa Lubanga me teno tyene; ci abedo kayubu kit me gerone ducu. 3Ento Lubanga ojuka kun waco ki an ni, ‘In pe i bigero ot mo pi woro nyinga, pien in lalweny, dok ityeko oyo lwak remo madwong.’ 4Kadi bed kumeno, ci Rwot Lubanga pa Icrael yam oyero an ki ikin dogola pa kwarina ducu me bedo rwot maloyo jo Icrael matwal; pien yam oyero Juda wek obed ladit, ki i ot pa Juda en oyero ot pa wora, ki ikin lutino awobe pa wora cwinye okwanyo an me bedo rwot maloyo Icrael ducu. 5Ikom lutino awobena ducu, macalo Lubanga omiya lutino awobe mapol, en oyero iye woda Solomon me bedo iwi komker ma ite ker pa Rwot maloyo Icrael. 6Ci Lubanga owaca ni, ‘Wodi Solomon aye bigera Ot ki dye kale ducu, pien ayero en wek obed woda, ki an bene abibedo wone. 7Abimoko kere bedo matwal, dong kace cwinye bimoko matek me lubu cika ki lok ma angolo ducu, kit ma en tye kalubu ikare man.’ 8Dong acikowu inyim jo Icrael ducu, ki inyim lwak pa Rwot ducu, ma kun nongo Lubanga bene winyo, ni wun wubed kagwoko ki kayenyo cik pa Rwot Lubangawu kare ducu, wek wubed wegi lobo man maberi, ci wek lobo man obed ginaleyawu matwal kadi wa bot likwayowu ma gibilubu ngewu.

9In woda Solomon bene, ber inge Lubanga pa wora, ci itii ki en ki cwinyi ducu ki kero komi ducu; pien Rwot ngiyo cwiny dano ducu, dok ngeyo gin ma cwiny dano yubu ducu ki kit tame ducu. Kace ibiyenyo en, ci in ibinongo kome; ento kace ibwoto en woko, ci en bene bitenyi woko matwal. 10Ber i gwoke matek, pien Rwot dong otyeko yero in pi gero Ot me Kabedo Maleng; bed oteka, wek i tim gin ducu ma omyero i tim.”

11Ci Daudi omiyo bot wode Solomon cal ma kigoyo pi Ot pa Lubanga mayam kigoyo, ki cal odine ducu, ki cal odi kano lim, ki me kicika mamalo ducu, ki me kicika odi matino ducu ma i iye, ki me kicika ma kom me kica bedo iye. 12Dok omiye cal ma nyutu dyekal me Ot pa Rwot ducu kit mayam cwinye otamo, ki kicika odi matino ma orumu ot ducu, ki odi me kano lim ducu ma i Ot pa Lubanga, ki odi me kano lim me mot ma kidyero bot Rwot. 13Ci onyute bene dul tic pa ajwaki ki Lulevi, ki kit kwayi tic ducu ma gitiyo i Ot pa Rwot; ki kit kwayi jami ducu ma gitiyo kwedgi i Ot pa Rwot. 14Daudi onyutu kit mapek pa jabu ma mite pi jami me jabu ma i dog tic acel acel, ki pek pa jami me ryal pi dog tic acel acel, 15ki pek pa lacib mac me jabu, ki mac laputgi, pek me jabu ma mite pi lacib mac acel acel ki lwak lapute ducu, ki pek pa ryal ma mite pi lacib mac acel acel ki lwak lapute ducu, muporo kit tic pa lacib mac acel acel ma kitiyo kwede, 16ki pek me jabu ma mite pi meja acel acel me mugati me aketa inyim Rwot, ki pek me ryal ma mite pi tiyo meja me ryal ducu, 17ki jabu ma kiliyo mabere pi gin lacob ringo, ki becen ducu, ki kikopo ducu; dok pi atabo jabu ducu, ki pekgi acel acel; pi atabo ryal ducu ki pekgi acel acel. 18Daudi bene onyutu kit ma keno tyer me wango odok eceta ma kitiyo ki jabu ma kiliyo malenge, ki kit ma peke myero obed kwede. Ka dok onyute cal gadigadi me jabu pa lukerubi ma giyaro bwomgi me umu Canduk me Gicike pa Rwot. 19Man ducu en onyutu kamaleng pi gin mayam Rwot ocoyo pire ki cinge. Tice ducu myero ki tii ma lubu kit cal meno.

20Daudi dok owaco bot wode Solomon ni, “Bed laco ma cwinyi nwang, wek i tim tic magi ducu. Pe ilwor, pe cwinyi bene oryange: pien Rwot Lubanga, ma en aye Lubangana, tye kwedi. En pe bibwoti ata, dok pe bitenyi ata, nio ka tic ducu ma kibitiyo i Ot pa Rwot bitum. 21Nen, i tye ki lwak dul pa ajwaki ki pa Lulevi pi tiyo tic ducu me Ot pa Lubanga ki jo ducu ma ludiro i kwayi tic ducu, ma gitye ki miti, gin gibinywako tic kwedi; ki dok ludito ki lwak ducu gibiwinyo dogi i lok ducu.”