1 Tekwaro 27

Ludito mony ma loyo tic pa rwot

1Man aye nying jo Icrael ma ludito kaka ma i odi pa kwarogi, ludito ma giloyo buca mony pa jo alip ki buca mony pa jo miya, ki luditogi mayam gitiyo bot rwot ikom lok ducu ma mako dul pa jo ma gibino ki ma gicito katic kun gitiyo dwe ki dwe pi mwaka ducu, kun dul acel acel wele romo jo alip pyere aryo wiye angwen. 2Jacobeam ma wod pa Jabdiel en aye ladit maloyo dul mukwongo ma tiyo i dwe mukwongo; i dulle tye iye jo alip pyere aryo wiye angwen. 3En yam lakwar Perej, dok obedo ladit maloyo luwi mony ducu pa mony ma gitiyo i dwe mukwongo. 4Dodai ma jo Akoki aye ladit maloyo jo ma tiyo i dwe me aryo ki lakony kore obedo Miklot; i dule tye iye jo alip pyere aryo wiye angwen. 5Ladit me adeke, maloyo jo ma tiyo i dwe me adek, en aye Benaya wod pa ajwaka Yekoyada, en aye laditgi; i dule tye iye jo alip pyere aryo wiye angwen. 6Benaya mayam obedo twon oteka ikin jo pyere adek ca, dok bene en aye ma onongo loyo jo pyere adek ku. Wode Amijabad aye ladit maloyo lwak ma i dule. 7Me angwene obedo Acael ma omin Joab, pi dwe me angwen; ngat ma olube obedo Jebadia ma wode. I dule tye iye jo alip pyere aryo wiye angwen. 8Ladit me abice, pi dwe me abic, en aye Camkut ma jo pa Ijra; i dule tye iye jo alip pyere aryo wiye angwen. 9Me abicele pi dwe me abicel en aye Ira ma wod pa Ikec ma jo Tekoa; i dule tye iye jo alip pyere aryo wiye angwen. 10Me abirone, pi dwe me abiro, en aye Kelej ma jo Pelon, ma ikin likwayo pa Epraim; i dule tye iye jo alip pyere aryo wiye angwen. 11Me aborone, pi dwe me aboro, en aye Cibekai ma jo Kueat, pa jo pa Jera; i dule tye jo alip pyere aryo wiye angwen. 12Me abongwene, pi dwe me abongwen, en aye Abiejer ma jo Anatot, ma Labenjamin; i dule tye iye jo alip pyere aryo wiye angwen. 13Me apare, pi dwe me apar, en aye Makarai ma jo Netopa, ma jo Jera; i dule tye iye jo alip pyere aryo wiye angwen. 14Me apar wiye acele, pi dwe me apar wiye acel, en aye Benaya ma jo Piraton, ma ikin likwayo pa Epraim; i dule tye i iye jo alip pyere aryo wiye angwen. 15Me apar wiye aryone, pi dwe me apar wiye aryo, en aye Keldai ma jo Netopa, likwayo pa Otiniel; i dule tye iye jo alip pyere aryo wiye angwen.

Ludito maloyo wi kaka pa jo Icrael

16Jo maloyo kaka pa Icrael gin ene: ladit maloyo jo pa Reuben en aye Eliejer ma wod, pa Jikri; pi jo pa Cimeon, Cepatia ma wod pa Maaka; 17pi jo pa Levi, en Kacabia ma wod pa Kamuel; pi jo pa Aron, Jadok; 18pi jo pa Juda, Eliu, ma ngat acel ma ikin omegi Daudi; pi jo pa Icakar, Omri ma wod pa Mikael; 19pi jo pa Jabulon, Icmaya ma wod pa Obadia; pi jo pa Naputali, Jeremot ma wod pa Ajriel; 20pi jo pa Epraim, Kocea ma wod pa Ajajia; pi nucu kaka pa Manace, Joel ma wod pa Pedaya; 21pi nucu kaka pa Manace ma i Gilead, Iddo ma wod pa Jekaria; pi jo pa Benjamin, Jaciel ma wod pa Abneri; 22pi jo pa Dan, Ajarel ma wod pa Jerokam. Magi aye ludito maloyo kaka ducu ma i Icrael. 231

Daudi yam pe okwano wel jo ma mwaka me ditogi pe romo pyere aryo, pien Rwot yam ociko ni ebimiyo jo Icrael gibedo mapol macalo lwak lakalatwe me polo. 242Joab ma wod pa Jeruya yam ocako kwano welgi ento pe ocobo; kadi bed kumeno akemo opoto ikom Icrael pi roc man, welgi bene pe kicoyo i buk me tekwaro pa rwot Daudi.

Lukan lim pa rwot

25Ngat maloyo odi me kano lim pa rwot en aye Ajimavet ma wod pa Adiel; ki maloyo odi lim ma i lobo, ma i taun ki gangi madito ki matinone, ki i odi lubele ma ocudu malo likung en aye Yonacan ma wod pa Ujia; 26ki maloyo jo ma gitiyo tic me pur i poto en aye Ejiri ma wod pa Kelub; 27ki maloyo poto olok en aye Cimei ma jo Rama; ki maloyo gin ma ocek i poto olok ma kikano i odi me kano kongo bwino en aye Jabdi ma jo Cipmi. 28Ngat maloyo yadi jeituni ki olam ma i bar Cepela en aye Baal-kanan ma jo Geder, dok ngat maloyo ot kano moo jeituni en aye Yoaci. 29Ngat maloyo lwak dyangi ma kikwayogi i Caron aye Citrai ma jo Caron; ki maloyo lwak dyangi ma i nota ducu aye Capat ma wod pa Adlai. 30Ngat maloyo kinaga aye Obil ma jo Icmael, ki maloyo megi kana aye Jedeya ma jo Meronot. Ngat maloyo romi ki dyegi aye Jajij ma jo Agri. 31Jo magi ducu gin lugwok lim pa rwot Daudi.

Lumiitam bot rwot Daudi

32Yonacan ma okeyo Daudi aye lamitam, pien obedo dano ma niang matut, dok karan bene; en ki Jekiel ma wod pa Kakmoni gubedo lugwok lutino awobe pa rwot. 33Akitopel obedo lamitam pa rwot, ki Kucai ma jo Arki obedo larem rwot. 34Jo ma guleyo katyen Akitopel aye Yekoyada ma wod pa Benaya, ki Abiatar. Joab aye ladit me mony pa rwot.