1 Tekwaro 26

Lugwok dogola me Ot pa Lubanga

1Magi aye tic ma kimiyo ki dul pa lugwok dogola me Ot pa Lubanga ma gin lulevi. Ikin jo pa Kora guyero Mecelemia ma wod pa Kore matye ikin likwayo pa Acap. 2Mecelemia onywalo awobe magi: Jekaria ma latin kayone, ka dok me aryone Jediael, me adeke Jebadia, me angwene Jatiniel, 3me abice Elam, me abicele Yekokanan, me abirone Eliekoenai. 41Obed-edom onywalo awobe magi: Cemaya ma latin kayo, ka dok me aryone Yekojabad, me adeke Joa, me angwene Cakar, me abice Netanel, 5me abicele Amiel, me abirone Icakar, me aborone Peuletai; pien Lubanga omiye gum. 6Ki wode Cemaya bene onywalo awobe ma gubedo rwodi i dog odi pa kwarogi, pien gubedo jo makwiri atika. 7Lutino awobe pa Cemaya gin aye Otini, Repael, Obed ki Eljabad, ma omegigi gubedo jo makwiri, nyinggi Eliu ki Cemakia. 8Jo magi ducu gin aye likwayo pa Obed-edom kacel ki awobegi ki omegigi, jo makwiri ma giromo tic ki ikin jo me ot pa Obed-edom giromo pyere abicel wiye aryo. 9Mecelemia bene obedo ki awobene ki omegine ma gikwiri, gin apar wiye aboro. 10Ki Koca ma ikin likwayo pa Merari onywalo awobe magi: Cimri aye obedo laditgi; kadi pe en aye latin kayo, ento wone oketo en odoko ladit; 11ka dok me aryone Ilkia, me adeke Tebalia, me angwene Jekaria; awobe pa Koca kacel ki omegine, ducu giromo apar wiye adek.

12Lugwok dogola kipokogi i dul malube ki dogola gi, ma dul acel acel tye ki ladite, ci kipoko ki gin tic, kit mayam kipoko ki utmegigi bene ma gubedo katic i Ot pa Rwot. 13Ci dok kibolo kwir ma lubu dog odi pa kwarogi, pi nongo dogola ma gibigwoko, kun dog odi matino ki maditone gitimogi marom. 14Kwir ma kibolo pi dogola ma tung kunyango opoto ikom Celemia. Gibolo kwir bene pi wode Jekaria, ma en lamitam ma ngeyo piny mada, ci kwire opoto pi dogola ma tung kumalo. 15Pa Obed-edom opoto pi dogola ma tung kupiny, ci pa awobene obedo pi ot kano jami. 16Pa Cupim ki Koca opoto pi dogola ma tung kupotoceng, kacel ki dogola ma kilwongo ni Caleket ma i yoo ma dok tung kumalo. Lugwok dogola gukeme ki luwotgi. 17Ki tung kunyango gubedo jo abicel inino acel acel, ki tung kumalo jo angwen inino acel acel, ki tung kupiny bene jo angwen inino acel acel, kacel ki jo aryoaryo i ot kano jami. 18I ot ma tere aperu ma tung kupotoceng onongo kiketo jo angwen inget yoo, ki aryo inget ot ma tere aperu. 19Magi aye dul pa lugwok dogola ma ikin jo pa Kora ki likwayo pa Merari.

Ludito ma gwoko odi me kano lim

20Ikin Lulevi giketo Akija obedo ladit ma gwoko odi me kano lim ma i Ot pa Lubanga, ki odi me kano lim me mot ma kidyero bot Rwot. 21Ikin likwayo pa Gercon likwayo pa Ladan aye gubedo ludito kaka i dog odi pa kwarogi. Laditgi aye Jekieli.

22Lutino awobe pa Jekieli, ma gin aye Jetam ki omine Joel, gubedo ludito ma gwoko odi me kano lim ma i Ot pa Rwot. 23Ikin jo pa Amram, pa Ijar, pa Kebron ki pa Ujiel, 24Cebuel, ma lakwar Gercom ma wod pa Moses, en aye rwot madit ma giketo pi gwoko odi me kano lim. 25Omegine gin ene: ikin likwayo pa Eliejer obedo wode Rekabia, ma wode Jecaya, ma wode Joram, ma wode Jikri, ma wode Celomot.

26Celomot ki omegine gubedo ludito ma gwoko odi me kano mot ducu mayam rwot Daudi odyero bot Rwot, ki mot ma ludito kaka ma i odi pa kwarogi ki ludito ma giloyo buca mony me jo alip, ki buca mony me jo miya, ki lutela wi mony yam gudyero bene. 27Gin yam gudyero mot ma oa ki i lim ma kiyako i lweny ci gudyero me tic i Ot pa Lubanga. 28Dok bene lim ducu mayam Camuel ma lanenpiny, ki Caulo wod pa Kic, ki Abneri wod pa Ner, ki Joab, wod pa Jeruya yam gudyero bot Rwot; mot ducu ma gidyero Celomot ki omegine gubedo ka gwokone.

Ludito tic mukene

29Ikom jo pa Ijar, kiketo Kanania ki awobene pi tic ma woko ma i Icrael me bedo jagi ki lungolkop. 30Ikom jo pa Kebron kiketo Kacabia ki omegine ma gikwiri maromo alip acel ki miya abiro me neno tic ma i Icrael ma loka Jordan tung kupotoceng, pi tic pa Lubanga ki pi tic pa rwot Daudi. 31Ikom jo pa Kebron laditgi obedo Jerija maloyo jo pa Kebron ducu ma ocoko dog odi pa kwarogi ducu. I mwaka me pyere angwen me loc pa Daudi yam kibedo kayenyo jo ma kwiri, ci gunongo jo ma kwiri atika ma ikin gi i Jajer ma i Gilead. 32Rwot Daudi oketo en ki omegine, jo ma kwiri maromo alip aryo ki miya abiro, ma gin ludito kaka ma i odi pa kwarogi, me neno tic pa jo pa Reuben, jo pa Gad ki nucu kaka pa Manace pi lok ducu ma mako tic pa Lubanga ki pi lok pa rwot Daudi.