Ntogozi 94

Chohile mkanti ywa wantu wose

1Zumbe Chohile, ukulihiza chikoda,

Weye Chohile ukulihiza chikoda kwelavyanye,

elo walagise kugamba wawakantila!

2Weye mkanti ywe isi,

inuka uwalihize wata kwefenya saviya vikuwagila!

3Zumbe Chohile, kubula ini wantu wavu nawajendeleze kutendeka weyaho?

Kubula ini Zumbe wantu wavu nawajendeleze kweduvya?

4Wose wakudamanya wavu nawalonge milosi ya kweduvya,

na kulonga kwa wefenyi.

5Zumbe Chohile, wawakoma awantu wako,

wawasulumiza wadya usagule watende wako.

6Wakoma wabanikilwe ni wagosi zawo na wajeni,

na kuwachija wabanikilwe ni watatizawo.

7Awo nawo wagamba, “Zumbe Chohile hakuona,

Chohile ywa Yakobo hakukombaganya.”

8Nyuwe wahezi mgati mwa awantu fanyanyani,

nyuwe mahumbwinya, nampate ubala ini?

9Togola, adamanye idigutwi hakudaha kwiva?

Aumbile idiziso hakudaha kuwona?

10Akukantila awantu mwe izisi hakudaha kuwakwahila?

Akuwahiya wantu aswese fanyanyi?

11Zumbe Chohile, kamanya izifanyanyi za awantu,

kamanya kugamba hayakuwagila chintu.

12Zumbe Chohile, ujimbiko wi mwa yudya akukantilwa ni weye,

mtu ukuhinya kwa sigilizi zako!

13Chani zuwa dya nkunto apate utondowazi,

kubula wantu wavu wasimbilwe bome.

14Kwaviya Zumbe Chohile, hawalemele awantu wakwe,

hawase wadya wakumtimila.

15Kwaviya nkanto nazilavigwe kwa uwagila vituhu,

na wachumile myoyo wose nawaitimile.

16Ni yuhi nanambize kumtowa mntu mwavu?

Ni yuhi endile intendele yangu mwa mta masa?

17Hegu Zumbe Chohile, hanambize,

nasisunguza kwita kwe kwikala hantu hanyamale ha file.

18Umo nafanyanye kugamba, “Chohile ywangu nagwa”,

ungi wako weye Chohile unegamiza.

19Kwangadika ko umoyo wangu yakajenyela,

weye wanihoza na kunibwedeza.

20Weye hukudaha kujesanya na wakanti mayakwili,

wakutula miko ya kugombela wantu wavu.

21Walungana vileke wawebunga wata uwaila,

wawakantila hewena mlema wakomwe.

22Mna Zumbe Chohile ni sumkilo dyangu,

Chohile ywangu nchinga yangu anamila.

23Uyo nawavuzize uwavu wawo wenye,

nawabinde kwachausa cha uwavu wawo.

Zumbe Chohile ywetu nawakome pele!