Ntogozi 135

Ntogozi kwa Chohile

1Mtogoleni Zumbe Chohile!

Ditogoleni idizina dyakwe, nyuwe wandima wakwe,

2nyuwe mkusankana mndani mwe Inyumba ya Zumbe Chohile,

mwe izinyuwa ze Inyumba ya Chohile ywetu.

3Mtogoleni Zumbe Chohile kwaviya ni ywedi,

dichemeleni ntogozi idizina dyakwe kwaviya vyawagila.

4Kwaviya Zumbe Chohile kamsagula Yakobo atede ywakwe,

wantu wa Izulaeli watende ugoli wakwe mwenye.

5Simanya kugamba Zumbe Chohile ni mkulu,

Zumbe ywetu ni mkulu kujinka milungu yose.

6Zumbe Chohile adamanya chochose akunga,

kwembingu na mweisi,

mwe ibahali ne imizumilizo yakwe.

7Nuyo akuhosa maingu yakwele kulawa uhelo we isi,

adamanya lumwemwe hamwenga na fula,

na kwigala nkung'unto kulawa aho aikiye.

8Nuyo akomile welekwa wa nkongo,

wa wantu na wanyama uko kweisi ya Misili.

9Uko adamanyaga vilagiso na mpituko,

kumkantila seuta na wandima wakwe wose.

10Nuyo atowaga si zilozize,

kakoma maseuta wata nguvu.

11Seuta Sihoni ywa Waamoli,

na Ogu seuta ywa Bashani,

na maseuta wose wa Kanani.

12Aguhaga izisi zawo na kuwenka awantu wakwe,

chani zitende wa Waizulaeli.

13Zumbe Chohile, zina dyako dyekala kale na kale,

nokumbukwe ni ivyeleko vyose.

14Zumbe Chohile nawagombele wantu wakwe,

na kuwawonela mbazi wandima wakwe.

15Milungu ya wantu we izisi ntuhu idamanywa kwa mayuwe ya chumbu na zahabu,

idamanywa kwa mikono ya wantu.

16Amatukulu yawo yana milomo mna hayakudaha kulonga,

yana meso mna hayakudaha kuwona.

17Yana magutwi mna hayakudaha kwiva,

naho hayakudaha kuhema.

18Wadya wakuidamanya nawaligane nayo,

seivyo wose wakuikiya msuhi.

19Nyuwe wantu wa Izulaeli,

mtogoleni Zumbe Chohile, nyuwe walavyantambiko,

mtogoleni Zumbe Chohile.

20Nyuwe Walawi, mtogoleni Zumbe Chohile,

nyuwe mkumvikila mtogoleni Zumbe Chohile!

21Mtogoleni Zumbe Chohile kulawa Sayuni,

mtogoleni uyo akwikala Yelusalemu.

Mtogoleni Zumbe Chohile.