Zaburu 81

Lagu i Wakutuuna Pebhaanguiana Pojanjia

81:1-17

1To kapalana molaguna. Mboomo lagu Gitit.1 Zaburuna Asaf.

2Sambo-sambomo to Kawasana Opu, o kakaata.

Sambomo tee ukaunde-undemo to Aulataʼala isombana Yakub.

3Lagumo tee upakoonimea o ganda-ganda,

pakoonimea o kecapi momandii upapooseakea tee suarana gambusu.

4Towiimea o torompe i bula mobhaau,

i wakutuuna kainawana bula, i eona raraeata.

5Siitumo saangu katotapu to miana Israel,

saangu hukumu minaaka i Aulataʼala isombana Yakub.

6Incia apatotapua amembali saangu kaudhania to siwuluna Yusuf,

wakutuuna Incia aewangi Tana Mesir.

Iaku kurango suara inda imatauku,2

7"Iaku padhamo kuangka bhawaamu minaaka i awaamu,

tee o limamu kupalapea minaaka i langka kasodhaamu.

8I nuncana kaseke ingkoo ugora, kasiimpo kurambasakako.

Kulawani ingkoo minaaka i tampa rahasiana guntu,

tee Iaku padhamo kuuji ingkoo i matana uwe Meriba.3 Sela

9E uumatiku, rangoa opea iudhaniakaku!

E Israel, ande mpuu ingkoo unda uperangoiaku! 104

Bholi dhaangia i tanga-tangamiu aulataʼala mosagaanana,

tee bholimo usomba dewana lipu mosagaanana.

11Iakumo KAWASANA OPU, Aulataʼalamu,

mobhawako ulimba minaaka i tana Mesir.

Bungkalea ngangamu pekaewa-ewa, tee bhekuantokia kupabukea."

12"Maka, o uumatiku amendeu aperangoiaku,

Israel amendeu atungku i aroaku.

13Sababuna sumai, Iaku kutaroaka manga incia amentagali torosu,

sabutuna manga incia adhadhi aose haejatina karona.

14Ande mpuu o uumatiku aunda aperangoiaku,

ande mpuu Israel aunda adhadhi mboomo kapeeluku,

15sumaimo bhekuagoria to kupekatalo musuna manga incia,

tee kuewangi bhari-bharia bhalina manga incia.

16Manga mia mobancina KAWASANA OPU naile itu bheatungku tee arengku i aroana,

tee kahukumuna to manga incia bheanamisia saʼumurua.

17Maka, bhekudhawuakako kinande minaaka i gandum momalapena mpuu,

tee uka iaku bhekupekambosuakako golana uwani minaaka gunu bhatu."