Kitabi Momangkilona Wolio
Zaburu 80
Doʼa to Kasalaamatina Miana Israel
80:1-20
To kapalana molaguna. Aose lagu: Kamba-kamba Bakung. Laguna kasakusii. Zaburuna Asaf.
Maasangia urangoa, e Gembalana miana Israel,
e Ingkoo mokapalaina siwuluna Yusuf mboomo gulumana dumba!
Ingkoo mokokauncuramakana i bhawona manga malaaʼekatina kerub,1 utiumbamo tee caheamu
i aroana Efraim, Binyamin, tee Manasye!
Susuakamea o kuasamu
tee uumbamo to upasalaamati ingkami!
E Aulataʼala, pambulimea pendua o kadhaangiamami;
taroakamo o roumu akocahea sabutuna ingkami bhetasalaamati.
E KAWASANA OPU, Aulataʼalana saangua alamu,
sakawana naepia upamuru, moomini o uumatimu adoʼa?
Ingkoo udhawua kaporona inca to kinandena manga incia,
tee lolu mobhari to uwe isumpuna.
Ingkoo umanga pamembali giu
ipotagaliakana manga lipu isaripimami,
tee o musumami uka manga ele-ele.
E Aulataʼalana saangua alamu, pambulimea pendua o kadhaangiamami,
maasangia o roumu akocahea mamudhaakana ingkami tasalaamati.
Uumatimu mboomo puuna angguru Ingkoo ubhawea upalimbaia minaaka i Mesir;
upadhencu manga lipu mosagaanana, kasiimpo o puuna angguru sumai upombulaia.
Ingkoo upekangkiloakea tana to incia,
kulesena atuwu tee apabuke saangua lipu.
Manga gunu asalibumbuakea tee ngkamia-miana,
tee manga rahana atutubhi manga puuna aras momaoge.
Manga rangkana adhola sakawana i tawo,
tee manga lolona akawa i Umala Efrat.
Pokia Ingkoo ubhongka manga tondona
sabutuna bhari-bharia mia molalo amembali atobhe bhakena?
Bhawu abhembarua,
tee bhari-bharia binata maila akandea.
E Aulataʼalana saangua alamu, maimo umbuli i uumatimu,
tontomea minaaka i sorogaa tee ukamatamea!
Maheruakamea o puuna angguru sii,
puuna angguru ipombulamu tee kuasamu,
tee o tunana ipekatangkamu to karomu.
Musu padhamo apale tee atunu puuna angguru sii.
Maasangia manga incia abinasa rampaakanamo kagorampangimu.
Maka taroakamo limamu adhaangia to mia i weta i kaanamu,
siitumo to anana maanusia2 ipekakaamu to karomu.
Tee mboo sumai, ingkami inda bhetasowo minaaka i Ingkoo;
jagania o dhadhimami, sumaimo ingkami bhetasombako.
E KAWASANA OPU, Aulataʼalana saangua alamu, pambulimea pendua o kadhaangiamami,
taroakamo o roumu akocahea mamudhaakana ingkami tasalaamati.
Source notes (2)
- Footnote manga malaaʼekatina kerub: Malaaʼekati igambaraaka mboomo mahaluku mokopani, agambaraaka kalangana Aulataʼala tee umbaana. Apogauakea ande kauncuramakana KAWASANA OPU dhaangia i bhawona manga malaaʼekati kerub. Dhaangia patuna rua malaaʼekati kerub i bhawona sorongana pojanjia tee i piamo itu Musa atarima firimanina Aulataʼala minaaka iwe sumai. Kamata Limb. 25:18-22.
- Footnote anana maanusia: Aipomo mia incia sumai rajana miana Israel atawa amembali uka o Isa, momananeana asarongi karona Anana Maanusia.
Kitabi Momangkilona Wolio. Copyright © 2024 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.