Rasul 28

Paulusi niana nu Malta

1Manau na amandama tutir vesie na sasidere pa, avori amanduin toapa nu jani ma sano pa Malta. 2Kaiwasa vemasoi na nu jasia sene kavo pasi siete vesiri maso ama. Senda vedior ama vura tutir vesie e senduri adia pimasa pai maso ama, aso rama pai dio viar e uta pai riewas kota to manau pana. 3Nanapa Paulusi ruiri ai arawa vesanaja pasi, e pisi ajai so adia pai, korou veriris pesi suvi, aso adia pai mias pana, avori kieri Paulusi na vara pa. 4Nanapa kaiwasa vemasoi na nu jasia sesajo korou jani dievakir na Paulusi vara pa, senggavo vavera nana matau sia e setojo, “Siniotu ninei ma ariria siniotu vemamu pesi nina, toanetoi i ma tieisu vurusu kariria venana rawana pai to manau, vape karuar vavi vetindija pai dionie tienam ea va.” 5Vape Paulusi tietapa vara pa apa korou jani tiau avav so adia pai raropa e siemuai marior pesa va. 6Vape semamo toapa nari Paulusi vara pai biebara, pivai vioru tandor e tiawa. Vape setanota to woroi mana tiere piesa va, apa sendiwa sene sanepaja pasi avori setojo Paulusi ma karuar nina.

7Vekasau va nana uta jana, gubernur venana nu jani ma nie kakopa savaru pesa, gubernur pai sano pa Publiusi. I ma siejo e siau ama tutir nie buai pai diete vesiri apa ama nana nie anio pai woroi pa raria toru. 8Nana rabua jana Publius tamani piota tutiri nie tarai pai mias e tiere sane pota apa tawana kie kambu pimasa. Paulusi riara siejo tamani vepota jani, avori vie nadi so Allah e pir vara pa ajai so tamani apa pienam. 9Manau na vava jana vieruana pa, siniotu vepota vura na nu jasia sendama so Paulusi, apa Syen Allah diono panam pai maso sia kota. 10Sia ma setatuana ama mo e setono pi vepau vesiri maso ama, e nana rabua amato amatapai pa, senggor pi vura amasau pasi maso amane rara pai.

Paulusi suvi nana Malta e diepai so Roma

11Amanana na nu Malta sembai toru to manau pa. E amasa na wa pimasa vera na Aleksandria pesi e dievoi na nu jani to manau, nana kasau uta pai riewas pa. Wa pimasa jani nie wa po pa, siemuai pi veveruana i ma “Karuar Veve Asa pa sandu Kastor tutir Poluks.” 12Amatavoi nana Sirakusa e amamasoi na jana raria toru. 13Na jana pa amatapai ea rebasa sasidere pa raso bendar Regium. Kausapa pa wana pai dio sio nana rawa wanamarai pai, apa raria muandu vori amasirieu na Putioli. 14Na jana pa amasamuai kaiwasa vesanemitiar maso Syen Yesus pa esia, sesau ama ave amamasoi na sene anio pai woroi pa ari siri. Avori amanda so Roma. 15Maneta venana Roma vesanemitiar maso Syen Yesus pasia, setadiawa raupui nana ama, apa senda vedior ama raso Uta Vevovo pi pai sano pa Apius1 e Tres Taberne.2 Janama Paulusi siejo sia, tiopana vesie pai maso Allah avori sane raro pa karakuai.

16Manau na amandama so Roma pa, pareta Roma pai dionae Paulusi miesoi mesari nana anio pesi e setamiasa verut pimamuna pesi dieramani.

Paulusi niana Roma

17Manau na raria toru, Paulusi siau siniotu Yahudi veve baba venana Roma pasia. E senduiri sia to manau pa, Paulusi kievo maso sia e diojo, “Maneta pa mia! Ja ma inanari sasara pesa va maso tane kaiwasa nesia, pivai irawaini va tane buai tasamuai nana tata pumi pasia. Vape setapu ja nana Yerusalem e sesiwi jau maso siniotu Roma pasia. 18Manau na sesasera ariri ine kavo pasi pa, seto setavini jau, aso vevata ja ma inanari sasara pesa va ave dionae isamuai hukuman voru pai. 19Vape siniotu Yahudi pasia semajar tutir pareta Roma pai va ave amamo setavini jau, setuva jau apa setonae isasana ine kavo nei maso Kaisar. Vape ja ma isanempai toa va ave ive karaka ine kaiwasa pasia mesari.3 20Apajoma isau ruir ave ikavavo tutiri mia; aso Siniotu Vekor Vesie paina, Andina kaiwasa Israel pasia sepir sanetiar maso I pa, apa isamuai wangga nei pa.” 21Avori senggavo maso i e setojo, “Aja amasamuai surat pesi nana Yudea nanapi au varami. E nana tane maneta pasia aja esi riama na wana e kior raupui nanapi au va, pivai tiopana vava vekariria nanapi au. 22Vape amato amatadiawa nanapi nomu sanepaja pai nana vava ninei, aso amatadiawa toapa na topina vea siniotu pasia sesisiajara nomu aniau jani.”

23Apa sia tutir Paulusi senggutu raria pesi ave sesamuai sia. Nana raria jani siniotu pa sepau sendama so uta Paulusi niana pa. Nana bera pa veito ravinena pa Paulusi tiopa ariri so sia nanapi Allah vie pareta ariri Raja pa. Paulusi kievo nanapi ayat venana Musai nie surat pasi tutir nabi pasia sene surat pasi. Paulusi dio siesera ave diona e sesanemitiar maso Yesus. 24Apa esia ma sesanemitiar kavo Paulusi tiopana pasi, vape esia kota ma sesanemitiar va. 25Apa sembavu vurusu uta jana tutiri sene sanepaja pasi simasi vaveri va. Vape Paulusi andija kievo kavo jana maso sia e diojo tonine, “Vevata mo vitopi Wainunu Sren pai diono pareta maso nabi Yesayai ave amamo tiopa so tatapumi pasia! 26Allah kievo e diojo,

‘Ruara tuopa maso kaiwasa nine sia:

Nari tawana metadiawa kavo ikavora nesi, vape sa menduini va,

nari tawana mesajo pi inanari nesi, vape sa metapusi va vitosi sivediadi pa.4

27Aso kaiwasa nine sia ma senggambarai senduini to manau,

senosa sene taradiau nesi to manau

senggumu sendemi nesi;

masisi sesajo na sendemi e,

setadiawa na sene taradiau e,

sesanemi pasi siruina e,

sesovera ea so Jau,

nari jonae sepanam.’”

28Manau pa Paulusi kievo e diojo, “Maneta pa mia ariria nari menduina toapa raupui nanapi vesie pai nana Allah, andi setopani maso kaiwasa vevesiei veve Yahudi va pasia to manau. Nari senda usarasi!” [29Manau na Paulusi kievo to nine pa, siniotu Yahudi pa sembavu vurusu uta jana avori senggavo vavera nana sia.]

Paulusi tiopan nanapi Allah vie pareta ariri Raja pa

30Taun muandu Paulusi niana Roma, miesoi nana anio matauni viati pai. I ma sane vesie siemuai siniotu verama so i . 31I ma tiopanusara maso sia vura nanapi Syen Allah vie pareta ariri Raja pa e nanapi Syen Yesus Kristusi. Paulusi nienaripi tutiri mietai va, e piesa vevediori ea va.