1 Tesalonika 1

Tabea

1Maneta na kuaruvi vesanemitiar na Tesalonika pa mia, nana ama Paulusi, Silasi1 e Timotiusi amambui surat ninei maso mia venana Allah Tatamami e Syen Yesus Kristusi pai.

Amambe nadi maso Allah ave diono vesie pai e mari ma vesie pai maso mia.2

Tenam pai e sanetiar nana siniotu Tesalonika pasia

2Tawana amatopana vesie pai maso Allah aso maneta pa mia vura. Nana rabua amambe nadi maso Allah Tatamami e Syen Yesus Kristus pa, amasanemipai mia. 3Nana amane nadi amasanemipai toanetoi metoisara nanaripi mesanemitiar maso Kristusi, e toanetoi mesanemipai siniotu vevesiei pa apajoma menanaripi maso sia, e mepi sanetiar to karakuai mo maso tane Syen Yesus Kristusi na aropo Allah e Tatamami pai. 4Maneta pa mia, amanduini toapa Allah sanepai mia e diri mia to manau, ave membe diadi Allah nie kaiwasa. 5Aso amatopana Kavo Vesie pai maso mia tutiri kavo vea va, vape kota nanapi paja tutiri Wainunu Allah pai. E amasanemitiar vesiri mo, Kavo Vesie ninei ma vata. Menduini toanetoi amananaripi maso mene tenam viate pai, nana rabua amana tutiri mia pa. 6Menda usara amane ria nei tutiri Syen nie ria pai to manau. Mia ma metere kariria mo, vape mesamuai kavo aniau tutiri vesasie, Allah nie Wainunu paini dioni.3 7Apajoma membe ria so siniotu vesanemitiar pasia vura na Makedonia e Akhaya. 8Aso menggavo siepara Syen nie kavo pai raso Makedonia tutiri Akhaya to manau. E kota raupui nanapi toanetoi mesanemitiar maso Allah pai, miesiepar raso uta vura. Apajoma kasa amatopana piesa ea va, aso siniotu pasia setadiawa nanapi mene sanetiar pai to manau. 9Siniotu pasia senggavo nanapi toanetoi menggor ama tutir sane vesie nana papo pa amandama so mia pa. Senggavo nanapi toanetoi memanau mesom karuar pasi pa e mesovera maso Allah ave amamo menanaripi so Allah vetenam tutiri veve vata pai. 10E kota senggavo nanapi toanetoi mepir sanetiar toapa Allah Atu pai riama nana rora wa pa, andina Yesus, Allah dionie tienam riwanea nana voru pai pa. Yesus andi kota dionae tasamuai vesie pai nana Allah nie kasiou nari verama pai.