Alkitab Bahasa Wondama
1 Tesalonika 2
Paulusi nie nanaripi pai na Tesalonika
Maneta pa mia! Matau menduini, toapa amandama so mia tutiri saradidioi va. Menduini toapa aja amandama so mia na Tesalonika varami pa, amasamuai kariria pai e sisiajara na Filipi to manau. Toapa jana siniotu vepau pasia senggavo vavera maso ama, vape tane Allah dionae amamatai va, ave amamo amatopana Kavo Vesie pai maso mia.1 Aso aniau amatopana pasi sive sasara va. Amatopana sanepaja veve rariai va e amatawi mia va. Sovera ea pa, amanggavo ave amatono sane vesieni so siniotu va, vape amatono sane vesieni so Allah, andi siotouru amasanemi pasi pa. Aso Allah dietor toapa amambe vata mo ave amanggavo siepara nie Kavo Vesie pai. Menduini toapa kasa amasasera amatawi vaveri mia tutiri kavavo vianona pasi varami. E ama ma amane sanepaja vekariria va, ave amamo amasamuai pipi. Allah siejo pi ama nanari pasi sive vata! Kota amasasera ria va ave amamo amasamuai sanandika nana mia, pivai nana siniotu vevesiei pasia kota. Vevata diadi amasau piesa maso mia ariri rasul Kristusi. Vape, nana rabua amamasoi tutiri mia pa, amatono ariri mia tutiri mariat, ariri vavi pesi diewawata nie atuma pasia pa. Aso amane sanepaja nei bieba mo so mia pana, amato amatopana Kavo Vesie nana Allah maso mia e kota amatono amane tenam nei maso mia, aso amasanemipai mia mo pana. Maneta pa mia, aja mesanemipai rami, toapa amasasera nanaripi to karakuai mo. Diru sasaar ma amananaripi ave amatono marabati maso siniotu vevesie nana mia kota va, nana rabua amatopana usara Kavo Vesie nana Allah maso mia pa. Amatenam nana sren pai, vetindija pai e amambe sasara va so mia vesanemitiar maso Kristus to manau pa. Mesajo ama vei vea, Allah siejo vava jana kota. Menduini toapa amatono ariri mia siri-siri masi vaveri tutiri baba pesi diono ariri nie atuma pasia pa. Amatono kavo sanepaja maso mia, e amatonae mesanemi pa sikarakuai e amasau ave amamo metenam ariri Allah nie majar pai. Aso siau mia ave mesua nana uta Allah vie pareta ariri Raja pa tutir mesanandiki Nie sasaar pimasa visanggapara pai.
Apa tawana amatopana vesie pai maso Allah kota, nana rabua metadiawa Allah nie kavo aniau amatopana pa, menggor kavo jani nana siniotu va, vape menggor kavo vetindija nana Allah. Andina nienaripi nana sane raro mia vesanemitiar maso Kristus pai. Maneta pa mia, Aso maneta pa mia, mene tenam pai vie ria so Allah nie kuaruvi vesanemitiar na Yudea pasia to manau. Metere marior pai nana mene kaiwasa pai mesari, masi ariri Allah nie kaiwasa na Yudea setere nana siniotu Yahudi pasia pa.2 Siniotu Yahudi jasia ma semu Syen Yesus e nabi pasia, tutiri setono kariria pai maso ama to manau. Setonae Allah sane pa vesie va e semamu tutiri siniotu vura.3 Aso seto vavedioro ama so amatopana Allah nie kavo pai maso kaiwasa Yahudi va pasia ave amamo sesamuai vesie pai. Toapa jana siniotu Yahudi pasia sene tatar pasi sirawai ea veito simasi. Apajoma Allah kiesiou e diono hukuman pai maso sia.
Paulusi dio riama so siejo siniotu Tesalonika pasia vesiri ea
Vape maneta pa mia, nana rabua amamasiepar vurusu mia toura pa, amamasiepar na amandemi nesi vea, vape na amasanemi nesi ma piva. Amatoso amasamuai mia ea e amasasera to karakuai ave amasovera e amasajoro mia ea! Aso amatato amandama so amasajo mia, e jau Paulusi, itato ira vemuandu to manau, vape Bilis pai dio vavedioro ama. Amato amandama so amasajo mia, aso metonae amapir sanetiar e sane vesie tutir amasanemi pa sibaba nana rabua nari Syen Yesus riama pa, e tatosa na Nie aropo pa, metono amasanemi pa sibaba! Vevata mo metonae amasanemi pa sibaba e metonae amasanemi ne siete.
Source notes (3)
- Cross-reference Kis. 16:19-24, 17:1-9
- Cross-reference Kis. 17:5
- Cross-reference Kis. 9:23, 29, 13:45, 50, 14:2, 5, 19, 17:5, 13, 18:12
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.